നമ്മുടെ വീട്ടുപറമ്ബുകളില് സുലഭമായി കാണപ്പെടുന്ന ഒന്നാണ് പപ്പായ. ആരോഗ്യത്തിന് ഏറെ ഗുണകരമായ ഈ ഫലം പ്രമേഹരോഗികള്ക്കും ഉത്തമമാണെന്ന് പല പഠനങ്ങളും തെളിയിച്ചിട്ടുണ്ട്.
എന്നാല് പ്രമേഹരോഗികള്ക്കിടയിലുള്ള പ്രധാന സംശയമാണ്, പച്ച പപ്പായയാണോ അതോ പഴുത്ത പപ്പായയാണോ രക്തത്തിലെ പഞ്ചസാരയുടെ അളവ് നിയന്ത്രിക്കാൻ കൂടുതല് അനുയോജ്യം എന്നത്.
പപ്പായയില് സ്വാഭാവികമായ മധുരം അടങ്ങിയിട്ടുണ്ടെങ്കിലും, ഇതിന്റെ ഗ്ലൈസെമിക് ഇൻഡക്സ് മിതമായ നിലയിലാണ് (ഏകദേശം 60). അതുകൊണ്ട് തന്നെ പ്രമേഹരോഗികള്ക്ക് പരിമിതമായ അളവില് പപ്പായ കഴിക്കുന്നത് സുരക്ഷിതമാണ്. ഇതില് അടങ്ങിയിരിക്കുന്ന ആന്റിഓക്സിഡന്റുകള്, ഫൈബർ, വൈറ്റമിൻ സി എന്നിവ ഹൃദയാരോഗ്യത്തിനും പ്രതിരോധശേഷിക്കും ഗുണകരമാണ്.
പച്ച പപ്പായ
പലപ്പോഴും തോരനായും കറിയായും നമ്മള് ഉപയോഗിക്കുന്ന പച്ച പപ്പായ പ്രമേഹരോഗികള്ക്ക് ഒരു മികച്ച ഓപ്ഷനാണ്. പഴുത്ത പപ്പായയെ അപേക്ഷിച്ച് പച്ച പപ്പായയില് പഞ്ചസാരയുടെ അളവ് വളരെ കുറവാണ്. ഇവയില് ധാരാളം നാരുകള് അടങ്ങിയിട്ടുണ്ട്. ഇത് രക്തത്തിലേക്ക് പഞ്ചസാര ആഗിരണം ചെയ്യപ്പെടുന്നതിന്റെ വേഗത കുറയ്ക്കുന്നു. ഇതിലെ പപ്പൈൻ എന്ന എൻസൈം ദഹനം സുഗമമാക്കാൻ സഹായിക്കുന്നു.
പഴുത്ത പപ്പായ
പഴുത്ത പപ്പായ രുചികരവും വൈറ്റമിനുകളാല് സമ്ബന്നവുമാണ്. എന്നാല് ഇതില് പച്ച പപ്പായയെക്കാള് കൂടുതല് മധുരം അടങ്ങിയിട്ടുണ്ട്. മിതമായ അളവില് കഴിക്കുന്നത് ഗുണകരമാണെങ്കിലും, പ്രമേഹം കൂടുതലായുള്ളവർ ഡോക്ടറുടെ നിർദേശം തേടേണ്ടതാണ്. പഴുത്ത പപ്പായയിലെ ലൈകോപീൻ എന്ന ആന്റിഓക്സിഡന്റ് കോശങ്ങളുടെ സംരക്ഷണത്തിന് സഹായിക്കുന്നു.
ഏതാണ് മികച്ചത്?
പ്രമേഹമുള്ളവർ മരുന്നുകള്ക്കൊപ്പം തങ്ങള്ക്ക് അനുയോജ്യമായ കൃത്യമായ ഭക്ഷണക്രമം നിശ്ചയിക്കാൻ ഒരു ന്യൂട്രീഷ്യനിസ്റ്റിനെയോ ഡയറ്റീഷ്യനെയോ സമീപിക്കുന്നതാണ് ഏറ്റവും ഉത്തമം. പപ്പായ പച്ചയായും പഴുത്തതായും കഴിക്കുന്നത് നല്ലതാണ്. കാരണം ഇവ രണ്ടിലും ആരോഗ്യത്തിന് ആവശ്യമായ സ്വാഭാവിക വൈറ്റമിനുകളും ധാതുക്കളും അടങ്ങിയിട്ടുണ്ട്. നിത്യേനയുള്ള ഭക്ഷണത്തില് പച്ചപ്പപ്പായ ഉള്പ്പെടുത്തുന്നതാണ് കൂടുതല് നല്ലത്, എന്നാല് പഴുത്ത പപ്പായ മിതമായ അളവില് മാത്രം കഴിക്കാൻ ശ്രദ്ധിക്കുക.
പഴുത്ത പപ്പായ പ്രമേഹരോഗികള്ക്ക് ദോഷകരമാണോ?
പഴുത്ത പപ്പായ പ്രമേഹരോഗികള്ക്ക് ദോഷകരമല്ല. ഇത് രക്തത്തിലെ പഞ്ചസാരയുടെ അളവ് വർധിപ്പിക്കുമെങ്കിലും, ദീർഘകാല ആരോഗ്യത്തിന് ആവശ്യമായ സുപ്രധാന വൈറ്റമിനുകളും ധാതുക്കളും ഇതില് അടങ്ങിയിട്ടുണ്ട്. എന്നാല്, ഇതിന്റെ അളവ് നിയന്ത്രിക്കേണ്ടത് അത്യാവശ്യമാണ്. ചെറിയ അളവില് മാത്രം കഴിക്കുന്നതാണ് ഉചിതം.
പപ്പായയുടെ ഗുണങ്ങള് പൂർണമായും ലഭിക്കുന്നതിനായി പ്രോട്ടീൻ അല്ലെങ്കില് കൊഴുപ്പ് അടങ്ങിയ ഭക്ഷണങ്ങളോടൊപ്പം ഇത് കഴിക്കാൻ ശ്രദ്ധിക്കുക. കൂടാതെ, അമിതമായി പഴുത്ത പപ്പായ ഒഴിവാക്കണം; കാരണം അതിലെ അമിതമായ മധുരം രക്തത്തിലെ പഞ്ചസാരയുടെ അളവ് പെട്ടെന്ന് ഉയരാൻ കാരണമായേക്കാം.
പഴങ്ങള് രാവിലെ അല്ലെങ്കില് ഉച്ചയ്ക്ക് മുൻപായി കഴിക്കുന്നതാണ് ഉത്തമം. രാത്രി വൈകി മധുരമുള്ള പഴങ്ങള് ഒഴിവാക്കാൻ ശ്രമിക്കുക.
DISCLAIMER: മുകളിലുള്ള ലേഖനം അറിവ് നല്കുന്നതിന് മാത്രമുള്ളതാണ്, പ്രൊഫഷണല് മെഡിക്കല് നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങള്ക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.