ഒറ്റനോട്ടത്തില്‍ ഇത് വലിയൊരു പ്രശ്നമായി തോന്നില്ലെങ്കിലും, സ്ഥിരമായി രാത്രി വൈകി അത്താഴം കഴിക്കുന്നത് നിങ്ങളുടെ ഹൃദയാരോഗ്യത്തെയും മെറ്റബോളിസത്തെയും ഉറക്കത്തെയുമെല്ലാം സാരമായി ബാധിക്കുമെന്നാണ് ഹൃദ്രോഗവിദഗ്ധർ മുന്നറിയിപ്പ് നല്‍കുന്നത്.

1. ശരീരത്തിന്റെ സ്വാഭാവിക താളത്തെ തെറ്റിക്കുന്നു

നമ്മുടെ ശരീരം 24 മണിക്കൂറുമുള്ള ഒരു ബയോളജിക്കല്‍ ക്ലോക്ക് അനുസരിച്ചാണ് പ്രവർത്തിക്കുന്നത്. രാത്രി സമയങ്ങളില്‍ ശരീരം വിശ്രമത്തിലേക്കും വീണ്ടെടുക്കലിലേക്കും കടക്കേണ്ടതാണ്. ഈ സമയത്ത് രക്തസമ്മർദം സ്വാഭാവികമായി കുറയുകയും മെറ്റബോളിക് പ്രവർത്തനങ്ങള്‍ മന്ദഗതിയിലാവുകയും ചെയ്യും. എന്നാല്‍ രാത്രി 9 മണിക്ക് ശേഷം ആഹാരം കഴിക്കുമ്പോള്‍, ശരീരം വിശ്രമിക്കേണ്ട സമയത്തും ദഹനപ്രക്രിയയ്ക്കായി കൂടുതല്‍ ജോലി ചെയ്യേണ്ടി വരുന്നു. ഇത് ശരീരത്തിന്റെ സ്വാഭാവിക താളത്തെ അപ്പാടെ തെറ്റിക്കുന്നു.

2. ഉയർന്ന രക്തസമ്മർദവും ഹൃദയാഘാത സാധ്യതയും

ഉറങ്ങുന്ന സമയത്ത് രക്തസമ്മർദം താഴുന്നത് ഹൃദയത്തിന് വിശ്രമം നല്‍കാൻ അത്യാവശ്യമാണ്. എന്നാല്‍ വൈകി ഭക്ഷണം കഴിക്കുന്നത് രാത്രിയിലും രക്തസമ്മർദം ഉയർന്ന നിലയില്‍ തന്നെ തുടരാൻ കാരണമാകുന്നു. ഇത് ധമനികളിലെ സമ്മർദം വർധിപ്പിക്കുകയും ദീർഘകാലാടിസ്ഥാനത്തില്‍ ഹൃദയാഘാതം, പക്ഷാഘാതം എന്നിവയ്ക്കുള്ള സാധ്യത വർധിപ്പിക്കുകയും ചെയ്യും.

3. അസിഡിറ്റിയും മോശം ഉറക്കവും

ഭക്ഷണം കഴിഞ്ഞ് അധികം വൈകാതെ കിടന്നുറങ്ങുന്നത് ആസിഡ് റിഫ്ലക്സിനും ദഹനക്കേടിനും കാരണമാകും. നെഞ്ചെരിച്ചിലും അസ്വസ്ഥതയും കാരണം ഉറക്കം തടസപ്പെടുമ്പോള്‍ അത് രാത്രിയില്‍ ഹൃദയമിടിപ്പ് വർധിക്കുന്നതിലേക്കും രക്തസമ്മർദം പെട്ടെന്ന് ഉയരുന്നതിലേക്കും നയിക്കുന്നു. ശരിയായ ഉറക്കം ലഭിക്കാത്തത് ശരീരത്തില്‍ വീക്കം, ഹോർമോണ്‍ വ്യതിയാനം എന്നിവ ഉണ്ടാക്കുകയും ഹൃദയത്തിന് കൂടുതല്‍ ആയാസം നല്‍കുകയും ചെയ്യും.

4. പ്രമേഹവും അമിതവണ്ണവും

രാത്രി സമയങ്ങളില്‍ ശരീരത്തിന് ഗ്ലൂക്കോസ് പ്രോസസ് ചെയ്യാനുള്ള ശേഷി കുറവായിരിക്കും. വൈകി കഴിക്കുന്ന ആഹാരത്തിലെ അന്നജവും കൊഴുപ്പും കൃത്യമായി ഊർജമായി മാറാതെ ശരീരത്തില്‍ കൊഴുപ്പായി അടിഞ്ഞുകൂടുന്നു. ഇത് ഇൻസുലിൻ പ്രതിരോധത്തിലേക്ക് നയിക്കുകയും ടൈപ്പ്-2 പ്രമേഹം, അമിതവണ്ണം എന്നിവയ്ക്കുള്ള സാധ്യത ഇരട്ടിയാക്കുകയും ചെയ്യുന്നു.

ഹൃദയത്തെ സംരക്ഷിക്കാൻ എന്ത് ചെയ്യണം?

അത്താഴം പരമാവധി രാത്രി 7 മണിക്കും 8 മണിക്കും ഇടയില്‍ കഴിച്ചുതീർക്കാൻ ശ്രമിക്കുക. അത്താഴം കഴിഞ്ഞ് കുറഞ്ഞത് 2 മുതല്‍ 3 മണിക്കൂറിന് ശേഷം മാത്രം ഉറങ്ങാൻ കിടക്കുക. ഇത് ദഹനം സുഗമമാക്കാനും മികച്ച ഉറക്കം ലഭിക്കാനും സഹായിക്കും.

രാത്രിയില്‍ എണ്ണപലഹാരങ്ങളും കൊഴുപ്പുകൂടിയ ഭക്ഷണങ്ങളും മൈദ അടങ്ങിയ ആഹാരങ്ങളും പൂർണമായും ഒഴിവാക്കുക. ദഹിക്കാൻ എളുപ്പമുള്ള ലഘുഭക്ഷണം ശീലമാക്കുക.നിലനിർത്താനുള്ള ഏറ്റവും എളുപ്പമുള്ള വഴി.

DISCLAIMER: മുകളിലുള്ള ലേഖനം അറിവ് നല്‍കുന്നതിന് മാത്രമുള്ളതാണ്, പ്രൊഫഷണല്‍ മെഡിക്കല്‍ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങള്‍ക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.