പച്ചക്കറികള്‍ തിരഞ്ഞെടുക്കുമ്പോള്‍ ചുരയ്ക്ക ഒരുപക്ഷേ നിങ്ങളുടെ ആദ്യത്തെ ചോയ്‌സ് ആയിരിക്കില്ല. വിറ്റാമിൻ സിയുടെയും മറ്റ് നിരവധി അവശ്യ അമിനോ ആസിഡുകളുടെയും മികച്ച ഉറവിടമാണ് ചുരയ്ക്ക.

ഏകദേശം 92% വെള്ളവും അടങ്ങിയിരിക്കുന്നതിനാല്‍ ജലാംശം നിലനിർത്താൻ ചുരയ്ക്ക ഒരു മികച്ച പച്ചക്കറിയാണ്. ചൂടുകാലത്ത് കഴിക്കുന്നത് നിർജ്ജലീകരണം ഒഴിവാക്കാൻ സഹായിക്കും. നാരുകളുള്ളതും ദഹനത്തെ സഹായിക്കുന്നതുമായതിനാല്‍, ചുരയ്ക്ക ദഹനവ്യവസ്ഥയ്ക്ക് നല്ലതാണ്. ക്രമരഹിതമായ മലവിസർജ്ജനം അനുഭവപ്പെടുന്നവർക്ക് ഇത് ഗുണം ചെയ്യും.

ശരീരഭാരം കുറയ്ക്കാൻ ശ്രമിക്കുന്ന ഏതൊരാള്‍ക്കും ചുരയ്ക്ക നല്ലൊരു ഓപ്ഷനാണ്. ഉയർന്ന അളവിലുള്ള നാരുകളും കുറഞ്ഞ കലോറിയും ഉള്ളതിനാല്‍, വിശപ്പ് കുറയ്ക്കുകയും അമിതമായി ഭക്ഷണം കഴിക്കുന്നത് തടയുകയും ചെയ്യുന്നു. എളുപ്പത്തില്‍ പലവിധത്തില്‍ പാകം ചെയ്യാവുന്ന ഒന്നാണ് ചുരയ്ക്ക്.

ചുരയ്ക്ക ചില്ല (Lauki Chilla)

ചുരയ്ക്ക ഗ്രേറ്റ് ചെയ്തത് കടലമാവില്‍ ചേർത്തിളക്കി പാനില്‍ ചുട്ടെടുക്കുന്ന മൊരിഞ്ഞ ചില്ലകള്‍ എളുപ്പത്തില്‍ തയ്യാറാക്കാവുന്ന ഒരു പ്രഭാതഭക്ഷണമാണ് അല്ലെങ്കില്‍ ലഘുഭക്ഷണമാണ്. പുതിന ചട്ണിയോടൊപ്പം ഇത് കഴിക്കാവുന്നതാണ്.

ചുരയ്ക്ക കോക്കനട്ട് കറി (Lauki Coconut Curry)

നേരിയ തോതില്‍ മസാലകള്‍ ചേർത്ത തേങ്ങാപ്പാലില്‍ വേവിച്ചെടുക്കുന്ന ചുരയ്ക്ക കറി ഒരേ സമയം ഉന്മേഷവും ആശ്വാസവും നല്‍കുന്ന ഒന്നാണ്. ചൂടുള്ള ഉച്ചസമയങ്ങളില്‍ ചോറിനൊപ്പം കഴിക്കാൻ ഇത് വളരെ മികച്ചതാണ്.

ചുരയ്ക്ക ഹല്‍വ (Lauki Halwa)

ചുരയ്ക്ക ഉപയോഗിച്ച്‌ മനോഹരമായ ഒരു ഡെസേർട്ടും തയ്യാറാക്കാം. പാല്, ഏലയ്ക്ക, അണ്ടിപ്പരിപ്പ് എന്നിവ ചേർത്ത് കുറുക്കിയെടുക്കുന്ന ഈ പരമ്പരാഗത ഹല്‍വ വളരെ രുചികരവും സുഗന്ധമുള്ളതുമാണ്. വേനല്‍ക്കാലത്ത് ഇത് തണുപ്പിച്ച്‌ വിളമ്പാൻ ഏറ്റവും അനുയോജ്യമാണ്.

ചുരയ്ക്ക കബാബ് (Lauki Kebabs)

ചിരകിയ ചുരയ്ക്ക ഉരുളക്കിഴങ്ങും മസാലകളും ചേർത്ത് മിക്സ് ചെയ്ത്, കട്ട്ലറ്റ് രൂപത്തിലാക്കി പാനില്‍ ഫ്രൈ ചെയ്തെടുക്കുക. പുറംഭാഗം മൊരിഞ്ഞതും ഉള്‍ഭാഗം മൃദുവായതുമായ ഈ വിഭവം ചായയ്‌ക്കൊപ്പം കഴിക്കാൻ പറ്റിയ മികച്ചൊരു പലഹാരമാണ്.