RCB vs GT IPL 2026 Final: സൂര്യൻ അസ്തമിക്കുമ്പോഴും ശനിയാഴ്ച വൈകുന്നേരം അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ രജത് പാട്ടിദാറും ദേവ്ദത്ത് പടിക്കലും ദിനേഷ് കാർത്തിക്കിന്റെ മേല്‍നോട്ടത്തില്‍ ഗ്രൗണ്ടില്‍ പരിശീലനം തുടരുകയായിരുന്നു.

ഈ രണ്ട് താരങ്ങളുടേയും ആവേശം അവരുടെ ശരീര ഭാഷയില്‍ പ്രകടമായിരുന്നു. അതുപോലെ തന്നെയായിരുന്നു അവരുടെ ശാന്തതയും. ആ ഒരു കോമ്പിനേഷൻ, 'പരിഭ്രാന്തിയില്ലാത്ത ഉത്കണ്ഠ,' കഴിഞ്ഞ രണ്ട് സീസണുകളായി ഈ റോയല്‍ ചലഞ്ചേഴ്സ് ബെംഗളൂരുവിന്റെ നിർണ്ണായക സവിശേഷതയായി മാറിയിരിക്കുന്നു.

ആർസിബി ഇന്നത്തെ ഫൈനലിലേക്ക് എത്തുന്നത് നിലവിലെ ചാമ്പ്യന്മാരായാണ്. ഈ സീസണില്‍ തങ്ങളെ ഇതിനകം ഒരു തവണ പരാജയപ്പെടുത്തിയ ഒരു വേദിയിലേക്കാണ് കലാശപ്പോരാട്ടത്തിന് റോയല്‍ ചലഞ്ചേഴ്സ് ബെംഗളൂരു എത്തിയിരിക്കുന്നത്. ഏപ്രിലില്‍ ഇവിടെ നടന്ന ലീഗ് ഘട്ട മത്സരത്തില്‍ ആർസിബി 155 റണ്‍സിന് പുറത്തായിരുന്നു. ഗുജറാത്ത് നാല് വിക്കറ്റുകള്‍ ബാക്കിനില്‍ക്കെ ആ ലക്ഷ്യം മറികടക്കുകയും ചെയ്തു.

ഫൈനല്‍ യഥാർഥത്തില്‍ ആർ‌സിബിയുടെ ഹോം ഗ്രൗണ്ടായ ബെംഗളൂരുവിലെ ചിന്നസ്വാമി സ്റ്റേഡിയത്തിലാണ് നിശ്ചയിച്ചിരുന്നത്. എന്നാല്‍ ലോജിസ്റ്റിക് ആവശ്യങ്ങള്‍ ചൂണ്ടിക്കാണിച്ച്‌ ബിസിസിഐ ഇത് അഹമ്മദാബാദിലേക്ക് മാറ്റുകയായിരുന്നു. അതിനാല്‍ നിലവിലെ ചാമ്പ്യന്മാർ കിരീടത്തിനായി പോരാടുക സ്വന്തം ഗ്രൗണ്ടിലല്ല. മറിച്ച്‌ ഗുജറാത്തിന്റെ മണ്ണിലാണ്, തങ്ങളെ തകർക്കാൻ കെല്‍പ്പുള്ളതാണെന്ന് ആർസിബിക്കെ അറിയാവുന്ന ഒരു പിച്ചില്‍. കഴിഞ്ഞ അഞ്ച് സീസണുകളില്‍ നാലാം തവണയാണ് അഹമ്മദാബാദ് ഐപിഎല്‍ ഫൈനലിന് ആതിഥേയത്വം വഹിക്കുന്നത്. പരിചിതത്വത്തിന്റെ ആശ്വാസമില്ലാതെ എത്തുന്ന ഒരേയൊരു ടീം ആർ‌സിബിയാണ്.

മുൻകാലങ്ങളിലെ ആർ‌സിബിയെ അസ്വസ്ഥമാക്കുമായിരുന്ന തരത്തിലുള്ള ഒരു കാര്യമാണ് പരിചിതമല്ലാത്ത പിച്ചില്‍ കളിക്കുക എന്നത് . എന്നാല്‍ ഈ ടീം വെറും പേരിന്റെ പ്രശസ്തിയില്‍ മാത്രം കെട്ടിപ്പടുത്ത ഒന്നല്ല. ഇതിന്റെ ഉദാഹരണം കഴിഞ്ഞ ചൊവ്വാഴ്ച ധർമ്മശാലയില്‍ കണ്ടതാണ്. 16 വർഷമായി താൻ എറിയുന്ന അതേ സീം അപ്പ് ആക്ഷനില്‍ പന്തെറിയുന്ന ഈ സീസണിലെ 15 മത്സരങ്ങളില്‍ നിന്ന് 26 വിക്കറ്റുകള്‍ നേടിയ 36 വയസ്സുകാരനായ ഭുവനേശ്വർ കുമാർ. 97 റണ്‍സിന് 3 വിക്കറ്റ് എന്ന നിലയില്‍ ടീം നില്‍ക്കെ ക്രീസിലെത്തി 33 പന്തില്‍ 93 റണ്‍സ് നേടിയ രജത് പാട്ടിദാർ, ഐപിഎല്‍ ചരിത്രത്തിലെ 90 റണ്‍സോ അതില്‍ കൂടുതലോ റണ്‍സ് നേടുന്ന ഏറ്റവും വേഗതയേറിയ ഇന്നിംഗ്സ് ആയിരുന്നു അത്. ഈ രണ്ടും യാദൃശ്ചികമായി സംഭവിച്ചതല്ല.

പ്രശസ്തരായ കളിക്കാരെ ഒന്നിച്ച്‌ കൂട്ടുന്നത് അവസാനിപ്പിച്ച്‌ കൃത്യമായി നിർവചിക്കപ്പെട്ട റോളുകള്‍ നല്‍കി ടീം പടുത്തുയർത്താൻ തുടങ്ങിയ ഒരു ഫ്രാഞ്ചൈസിയുടെ ഫലമായിരുന്നു ഇവ രണ്ടും. ഈ സ്ക്വാഡ് രൂപപ്പെടുത്തിയതിന് പിന്നിലെ ചിന്താഗതി ചിന്നസ്വാമി സ്റ്റേഡിയം രൂപപ്പെടുത്തിയ വ്യക്തതയെയാണ് പ്രതിഫലിപ്പിക്കുന്നത്. ഉയർന്ന സ്കോറിംഗ്, ചെറിയ ബൗണ്ടറികള്‍, പേസിന് അനുകൂലമായ സാഹചര്യം.

ഭുവനേശ്വർ സ്വിംഗും പവർപ്ലേ വിക്കറ്റുകളും നല്‍കി ആർ‌സിബിക്ക് ആദ്യമേ നിയന്ത്രണം നല്‍കുന്നു. സമ്മർദ്ദം നിലനിർത്താൻ ജോഷ് ഹേസല്‍വുഡ് തന്റെ ലെങ്തുകള്‍ ബുദ്ധിപൂർവ്വം മാറ്റുന്നു. യാഷ് ദയാലിന്റെ അഭാവത്തില്‍ മൂന്നാം സീമറുടെ റോള്‍ റാസിഖ് സലാം ദാർ നിശബ്ദമായി നിറവേറ്റി. സ്പിന്നില്‍ സുയാഷ് ശർമ്മയും ക്രുണാല്‍ പാണ്ഡ്യയും ഒരേ ആവശ്യത്തിനായി വ്യത്യസ്ത ആയുധങ്ങള്‍ കൊണ്ടുവരുന്നു, മധ്യ ഓവറുകളിലെ നിയന്ത്രണവും ബാറ്റിംഗിന് അനുകൂലമായ സാഹചര്യങ്ങളില്‍ വിക്കറ്റുകള്‍ നേടലും.

ബാറ്റിംഗും ഇതേ കൃത്യതയെ പ്രതിഫലിപ്പിക്കുന്നു. വിരാട് കോഹ്‌ലി ടീമിന് സ്ഥിരത നല്‍കുകയും നങ്കൂരമിടുകയും ചെയ്യുന്നു. ദേവ്ദത്ത് പടിക്കല്‍ ടോപ്പില്‍ ആധിപത്യം സ്ഥാപിക്കുന്നു. ടിം ഡേവിഡ് അവസാന ഘട്ടത്തില്‍ റണ്‍സ് സ്കോറിംഗ് വേഗത കൂട്ടുന്നു. ജിതേഷ് ശർമ്മ ഫിനിഷിംഗിന് ആഴം നല്‍കുന്നു. ഏറ്റവും പ്രശസ്തമായ ഒരു ഇലവനെ ഒരുക്കുക എന്നതല്ല ലക്ഷ്യം. മറിച്ച്‌ ഏറ്റവും കാര്യക്ഷമമായ ഒന്നായി മാറുക എന്നതാണ്.

ഞായറാഴ്ച വിജയിച്ചാല്‍, തുടർച്ചയായി ഐപിഎല്‍ കിരീടങ്ങള്‍ നേടുന്ന ക്യാപ്റ്റന്മാരുടെ പട്ടികയില്‍ എംഎസ് ധോണിക്കും രോഹിത് ശർമ്മയ്ക്കുമൊപ്പം രജത് പാട്ടിദാറിന്റെ പേരും ഇടംപിടിക്കും. ശനിയാഴ്ച നടന്ന മത്സരത്തിന് മുൻപായുള്ള വാർത്താസമ്മേളനത്തില്‍ രജത്തിനോട് ഇതിനെക്കുറിച്ച്‌ ചോദിച്ചിരുന്നു. മറുപടി രജത്തിന്റെ സ്വഭാവത്തിന് ചേർന്നതായിരുന്നു. 'ഇല്ല, മറ്റൊരു ക്യാപ്റ്റൻ എന്താണ് ചെയ്തതെന്നോ അല്ലെങ്കില്‍ ആരോടെങ്കിലും മത്സരിക്കണമെന്നോ ഞാൻ ഒരിക്കലും ചിന്തിച്ചിട്ടില്ല. എന്റെ യാത്ര ഒരു റോളർകോസ്റ്റർ പോലെയായിരുന്നു, പക്ഷേ ഞാൻ അതില്‍ ശ്രദ്ധ കേന്ദ്രീകരിച്ചിട്ടില്ല. നിലവിലുള്ള സാഹചര്യത്തില്‍ എനിക്ക് ഏറ്റവും മികച്ചത് എന്ത് ചെയ്യാൻ കഴിയും എന്നതിലാണ് ഞാൻ ശ്രദ്ധ കേന്ദ്രീകരിക്കുന്നത്. ഇപ്പോള്‍, എന്റെ ശ്രദ്ധ ഫൈനലിലും നാളെ എന്റെ പരമാവധി നല്‍കുന്നതിലും മാത്രമാണ്.'