മേടമാസത്തിലെ കന്നി അയനത്തിന് സമാന്തരമായി സൂര്യൻ രാശിചക്രത്തിന്റെ മധ്യരേഖയിലൂടെ കടന്നുപോകുന്ന വേളയിലാണ് വിഷു ആഘോഷിക്കുന്നത്. കാർഷിക സംസ്‌കാരത്തിന്റെ ഭാഗമായ ഈ ഉത്സവം പ്രകൃതിയും മനുഷ്യനും തമ്മിലുള്ള അഭേദ്യമായ ബന്ധത്തെ വിളിച്ചോതുന്നു.

കൊന്നപ്പൂക്കളുടെ മഞ്ഞവെളിച്ചവും കണിവെള്ളരിയുടെ നന്മയും ഒത്തുചേരുന്ന വിഷുക്കണി കാണുന്നതോടെ ഒരു വർഷം മുഴുവൻ നീണ്ടുനില്‍ക്കുന്ന ഐശ്വര്യം കൈവരുമെന്നാണ് വിശ്വാസം. പഴയകാലത്ത് കൃഷിയിറക്കുന്നതിനും വിത്തുവിതയ്ക്കുന്നതിനുമുള്ള തുടക്കമായിരുന്ന വിഷു, ഇന്ന് ലോകമെമ്ബാടുമുള്ള മലയാളികളെ ഒന്നിപ്പിക്കുന്ന ഒരു സാംസ്‌കാരിക ഉത്സവമായി മാറിയിരിക്കുന്നു.

കുടുംബാംഗങ്ങള്‍ ഒത്തുചേർന്ന് കൈനീട്ടം കൈമാറുന്നതും വിഭവസമൃദ്ധമായ സദ്യ ആസ്വദിക്കുന്നതും വിഷുവിന്റെ മാറ്റ് കൂട്ടുന്നു. ജീവിതത്തിലെ കഷ്ടപ്പാടുകള്‍ നീങ്ങി വരാനിരിക്കുന്ന നാളുകള്‍ സന്തോഷത്തിന്റേതാകണമെന്ന പ്രാർത്ഥനയോടെയാണ് ഓരോ മലയാളിയും വിഷുവിനെ വരവേല്‍ക്കുന്നത്. ജാതിമത ഭേദമന്യേ കേരളീയർക്ക് പ്രിയപ്പെട്ടതാണ് ഈ വസന്തോത്സവം.

ഐതിഹ്യങ്ങളാലും ആചാരങ്ങളാലും സമ്ബന്നമായ വിഷു, ഓരോ വർഷവും നന്മയുടെയും സമൃദ്ധിയുടെയും പുതിയ സന്ദേശവുമായാണ് എത്തുന്നത്. എല്ലാ മലയാളികള്‍ക്കും വരാനിരിക്കുന്ന വിഷു ഒരു പുത്തൻ തുടക്കമാകട്ടെ എന്ന് ആശംസിക്കുന്നു.

മലയാള മാസം മേടം ഒന്നാം തീയതിയാണ് സാധാരണ വിഷു ആഘോഷിക്കുന്നത്. മേടമാസം ഒന്നാം തീയതിയായ 2026 ഏപ്രില്‍ 14 ന് ചൊവ്വാഴ്ച രാവിലെ 9 മണി 32 മിനിറ്റിന്/ ഉദയാല്പരം 8 നാഴിക 8 വിനാഴികയിലാണ് ചതയം നക്ഷത്രത്തില്‍ ഇക്കൊല്ലത്തെ മേടസംക്രമം നടക്കുന്നത്. അതായത് സൂര്യൻ മീനം രാശിയില്‍ നിന്നും മേടം രാശിയില്‍ പ്രവേശിക്കുന്നത്.

സൂര്യോദയത്തിന് ശേഷം ആദിതൃസംക്രമം വന്നതിനാല്‍ വിഷുക്കണിയും വിഷു ആഘോഷവും തൊട്ടടുത്ത ദിവസമായ ഏപ്രില്‍ 15 ന് ബുധനാഴ്ചയാണ് ആഘോഷിക്കേണ്ടത്. സംക്രമ സമയത്ത് ചന്ദ്രൻ കൃഷ്ണപക്ഷ ദ്വാദശിയില്‍ ചതയം നക്ഷത്രത്തിലാണ് എന്ന് ജ്യോതിഷഭൂഷണം എസ്. ശ്രീനിവാസ് അയ്യർ പറയുന്നു.

രാത്രിയിലെ പതിനാലാമത്തെ മുഹൂർത്തമാണത്. അതായത്, സൂര്യോദയം 6 മണിക്കൂറാണെങ്കില്‍ പുലർച്ചെ 4:24ന് ബ്രഹ്മമുഹൂർത്തം തുടങ്ങും, 5:12 ന് അവസാനിക്കും.

വിഷുവിനെ സംബന്ധിച്ച്‌ പ്രധാനമായും രണ്ട് ഐതിഹ്യങ്ങളാണുള്ളത്. ഒന്ന്, ശ്രീകൃഷ്ണൻ നരകാസുരനെ വധിച്ചതിന്റെ ആഹ്ലാദസൂചകമായി ആഘോഷിക്കുന്നു എന്നത്. മറ്റൊന്ന്, രാവണന്റെ തടവിലായിരുന്ന സൂര്യദേവൻ മോചിതനായി നേരെ കിഴക്കുദിച്ചു തുടങ്ങിയതിന്റെ ഓർമ്മ പുതുക്കലാണിത്. ശാസ്ത്രീയമായി നോക്കിയാല്‍, പകലും രാത്രിയും തുല്യമായി വരുന്ന പ്രതിഭാസവുമായി ഇതിന് ബന്ധമുണ്ട്.

മലയാളിയെ സംബന്ധിച്ചിടത്തോളം വിഷു ഒരു കൊയ്ത്തുത്സവം എന്നതിലുപരി പുതിയൊരു കൃഷിക്കാലത്തിന്റെ തുടക്കം കൂടിയാണ്. വിഷു ദിവസം പുലർച്ചെ കണി കണ്ടതിനു ശേഷം കർഷകർ പാടത്തിറങ്ങി കൃഷിപ്പണികള്‍ തുടങ്ങുന്നതിനെ 'വിഷുച്ചാല്‍' എന്ന് വിളിക്കുന്നു. പുതിയ സീസണിലെ ആദ്യത്തെ വിത്തുവിതയ്ക്കാൻ ഉത്തമമായ ദിവസമാണിത്. വിഷു സംക്രമ സൂര്യനെ അടിസ്ഥാനമാക്കി അടുത്ത ഒരു വർഷത്തെ മഴയും വിളവും എങ്ങനെയായിരിക്കുമെന്ന് പഴയകാലത്ത് കണക്കുകൂട്ടിയിരുന്നു.

കാലാവസ്ഥാ വ്യതിയാനത്തെക്കുറിച്ച്‌ ഓർമ്മിപ്പിക്കുന്ന ഒരു ഉത്സവം കൂടിയാണ് വിഷു. വേനല്‍ക്കാലത്തിന്റെ പാരമ്യത്തില്‍, കുടിവെള്ളത്തിന് ദൗർലഭ്യം നേരിടുന്ന സമയത്താണ് വിഷു വരുന്നത്. അതുകൊണ്ട് തന്നെ പ്രകൃതിയെ സംരക്ഷിക്കേണ്ടതിന്റെയും ജലം കരുതേണ്ടതിന്റെയും ആവശ്യകത ഈ ആഘോഷം നമ്മെ ഓർമ്മിപ്പിക്കുന്നു.