Dailyhunt Logo
  • Light mode
    Follow system
    Dark mode
    • Play Story
    • App Story
ദേശീയ മാധ്യമദിനം: മാധ്യമസ്വാതന്ത്ര്യം ഉയര്‍ത്തിപ്പിടിച്ച സുപ്രധാന സുപ്രിംകോടതി വിധികള്‍

ദേശീയ മാധ്യമദിനം: മാധ്യമസ്വാതന്ത്ര്യം ഉയര്‍ത്തിപ്പിടിച്ച സുപ്രധാന സുപ്രിംകോടതി വിധികള്‍

തേജസ് 12 mins ago
ദേശീയ മാധ്യമദിനം: മാധ്യമസ്വാതന്ത്ര്യം ഉയര്‍ത്തിപ്പിടിച്ച സുപ്രധാന സുപ്രിംകോടതി വിധികള്‍

ന്യൂഡല്‍ഹി: നവംബര്‍ 16 ദേശീയ മാധ്യമദിനമായി ആചരിക്കുമ്പോള്‍ രാജ്യത്ത് മാധ്യമസ്വാതന്ത്ര്യത്തിന്റെ പ്രാധാന്യം ഉയര്‍ത്തിപ്പിടിച്ച സുപ്രിംകോടതിയുടെ സുപ്രധാന വിധികള്‍ വീണ്ടും ചര്‍ച്ചയാകുന്നു.

മാധ്യമങ്ങളുടെ സ്വതന്ത്രമായ പ്രവര്‍ത്തനത്തിനും മാധ്യമപ്രവര്‍ത്തകരുടെ അവകാശങ്ങള്‍ക്കും ഭരണഘടനാപരമായ സംരക്ഷണം ഉറപ്പാക്കുന്നതില്‍ സുപ്രിംകോടതി നിര്‍ണായകമായ ഇടപെടലുകള്‍ നടത്തിയിട്ടുണ്ട്. മാധ്യമപ്രവര്‍ത്തനത്തില്‍ സര്‍ക്കാര്‍ അനാവശ്യമായി ഇടപെടുന്നത്, നിരീക്ഷണ സംവിധാനങ്ങള്‍ ഉപയോഗിച്ച്‌ മാധ്യമപ്രവര്‍ത്തകരുടെ സ്വകാര്യതയിലേക്ക് കടന്നുകയറുന്നത്, വാര്‍ത്തകള്‍ പ്രസിദ്ധീകരിക്കുന്നത് തടയുന്ന കോടതി ഉത്തരവുകള്‍ എന്നിവയെല്ലാം മാധ്യമസ്വാതന്ത്ര്യത്തിന് ഭീഷണിയാകാമെന്ന് വിവിധ വിധികളിലൂടെ കോടതി വ്യക്തമാക്കിയിട്ടുണ്ട്.

ഭരണഘടനയില്‍ മാധ്യമസ്വാതന്ത്ര്യത്തിന് പ്രത്യേകമായി ഒരു മൗലികാവകാശം അനുവദിച്ചിട്ടില്ലെങ്കിലും, ഭരണഘടനയുടെ 19(1)(എ) അനുച്ഛേദം ഉറപ്പുനല്‍കുന്ന അഭിപ്രായപ്രകടനത്തിനും ആശയവിനിമയത്തിനുമുള്ള സ്വാതന്ത്ര്യത്തില്‍ മാധ്യമസ്വാതന്ത്ര്യവും ഉള്‍പ്പെടുന്നതാണെന്നാണ് സുപ്രിംകോടതിയുടെ നിരന്തരമായ നിലപാട്.

1962ലെ സാകല്‍ പേപ്പേഴ്സ് വേഴ്സസ് യൂനിയന്‍ ഓഫ് ഇന്ത്യ കേസില്‍ മാധ്യമസ്വാതന്ത്ര്യം അഭിപ്രായസ്വാതന്ത്ര്യത്തിന്റെ അവിഭാജ്യ ഘടകമാണെന്ന് സുപ്രിംകോടതി വ്യക്തമാക്കി. പത്രങ്ങളുടെ പ്രചാരണവും പ്രചാരവും നിയന്ത്രിക്കുന്ന നടപടികള്‍ ഭരണഘടന ഉറപ്പുനല്‍കുന്ന അവകാശങ്ങളുടെ ലംഘനമാകാമെന്നും കോടതി ചൂണ്ടിക്കാട്ടി.

1972ലെ ബെന്നറ്റ് കോള്‍മാന്‍ വേഴ്സസ് യൂനിയന്‍ ഓഫ് ഇന്ത്യ കേസിലും മാധ്യമസ്വാതന്ത്ര്യവുമായി ബന്ധപ്പെട്ട നിര്‍ണായക നിരീക്ഷണങ്ങള്‍ സുപ്രിംകോടതി നടത്തി. പ്രസിദ്ധീകരണത്തിന് മുന്‍പുള്ള നിയന്ത്രണങ്ങള്‍ മാധ്യമസ്വാതന്ത്ര്യത്തിന് വിരുദ്ധമാണെന്ന് കോടതി വ്യക്തമാക്കി. മാധ്യമങ്ങളെ മാത്രം ലക്ഷ്യമിട്ട് അവയുടെ പ്രവര്‍ത്തനവും പ്രചാരവും പരിമിതപ്പെടുത്തുന്ന തരത്തിലുള്ള നിയമങ്ങളും നിയന്ത്രണങ്ങളും അംഗീകരിക്കാനാകില്ലെന്നും വിധിയില്‍ പറഞ്ഞു.

പത്രങ്ങള്‍ക്ക് സ്വതന്ത്രമായി വാര്‍ത്തകള്‍ പ്രസിദ്ധീകരിക്കാനും പ്രചരിപ്പിക്കാനും അവകാശമുണ്ടെന്ന് വ്യക്തമാക്കിയ കോടതി, ജീവനക്കാരെ തിരഞ്ഞെടുക്കുന്നതിലുള്ള സ്വാതന്ത്ര്യം പരിമിതപ്പെടുത്തുക, പുതിയ പത്രങ്ങള്‍ ആരംഭിക്കുന്നത് തടയുക, സര്‍ക്കാരിന്റെ സഹായം നിര്‍ബന്ധിതമാക്കുക തുടങ്ങിയ നടപടികള്‍ അഭിപ്രായസ്വാതന്ത്ര്യത്തിന് വിരുദ്ധമാകുമെന്ന് നിരീക്ഷിച്ചു.

ജനാധിപത്യത്തില്‍ മാധ്യമങ്ങളുടെ പങ്ക്: അധികാരത്തോട് സത്യം വിളിച്ചുപറയുക

2023ല്‍ മാധ്യമം ബ്രോഡ്കാസ്റ്റിങ് ലിമിറ്റഡ് വേഴ്സസ് യൂണിയന്‍ ഓഫ് ഇന്ത്യ കേസില്‍ മാധ്യമസ്വാതന്ത്ര്യത്തിന്റെ ജനാധിപത്യപരമായ പ്രാധാന്യം സുപ്രീംകോടതി വിശദീകരിച്ചു. മലയാളം വാര്‍ത്താ ചാനലായ മീഡിയവണിന്റെ സംപ്രേഷണ വിലക്ക് നീക്കിയ ഈ വിധി മാധ്യമസ്വാതന്ത്ര്യവുമായി ബന്ധപ്പെട്ട ഏറ്റവും പ്രധാനപ്പെട്ട സമീപകാല വിധികളിലൊന്നാണ്.

ജനാധിപത്യത്തിന്റെ സുഗമമായ പ്രവര്‍ത്തനത്തിന് സ്വതന്ത്ര മാധ്യമങ്ങള്‍ അനിവാര്യമാണെന്ന് കോടതി ചൂണ്ടിക്കാട്ടി. ഭരണകൂടത്തിന്റെ പ്രവര്‍ത്തനങ്ങളെ നിരീക്ഷിക്കുകയും അധികാരകേന്ദ്രങ്ങളോട് സത്യം വിളിച്ചുപറയുകയും ചെയ്യുക എന്നത് മാധ്യമങ്ങളുടെ പ്രധാന ഉത്തരവാദിത്വമാണ്. പൊതുതാല്‍പര്യമുള്ള വിഷയങ്ങളില്‍ കൃത്യമായ വിവരങ്ങളും വസ്തുതകളും ജനങ്ങളിലെത്തിക്കുന്നതിലൂടെ ജനാധിപത്യത്തില്‍ ശരിയായ തീരുമാനങ്ങളെടുക്കാന്‍ പൗരന്മാരെ മാധ്യമങ്ങള്‍ സഹായിക്കുന്നുവെന്നും കോടതി വ്യക്തമാക്കി.

മാധ്യമസ്വാതന്ത്ര്യത്തിന് നിയന്ത്രണം ഏര്‍പ്പെടുത്തുന്നത് ജനങ്ങളുടെ ചിന്തകളെയും അഭിപ്രായങ്ങളെയും ഒരേ ദിശയിലേക്ക് നയിക്കുന്നതിന് ഇടയാക്കും. സാമൂഹിക-സാമ്പത്തിക വിഷയങ്ങളിലും രാഷ്ട്രീയ ആശയങ്ങളിലും ഒരേ രീതിയിലുള്ള കാഴ്ചപ്പാട് മാത്രം നിലനില്‍ക്കുന്നത് ജനാധിപത്യത്തിന് ഗുരുതരമായ അപകടമുണ്ടാക്കുമെന്നും വിധിയില്‍ നിരീക്ഷിച്ചു.

'സ്വതന്ത്ര മാധ്യമങ്ങള്‍ ശക്തമായ ജനാധിപത്യ റിപ്പബ്ലിക്കിന്റെ നിലനില്‍പ്പിന് അനിവാര്യമാണ്. ഭരണകൂടത്തിന്റെ പ്രവര്‍ത്തനങ്ങളിലേക്ക് വെളിച്ചം വീശുന്നതില്‍ മാധ്യമങ്ങള്‍ക്ക് നിര്‍ണായക പങ്കുണ്ട്. സത്യം വിളിച്ചുപറയുകയും പൗരന്മാര്‍ക്ക് വസ്തുതകള്‍ മുന്നിലെത്തിക്കുകയും ചെയ്യേണ്ടത് മാധ്യമങ്ങളുടെ കടമയാണ്' എന്നായിരുന്നു കോടതിയുടെ നിരീക്ഷണം.

മാധ്യമപ്രവര്‍ത്തകരുടെ വാര്‍ത്താ സ്രോതസ്സുകള്‍ സംരക്ഷിക്കപ്പെടണം

മാധ്യമസ്വാതന്ത്ര്യവുമായി ബന്ധപ്പെട്ട മറ്റൊരു നിര്‍ണായക ഇടപെടലായിരുന്നു 2021ലെ പെഗാസസ് കേസ്. മനോഹര്‍ ലാല്‍ ശര്‍മ വേഴ്സസ് യൂണിയന്‍ ഓഫ് ഇന്ത്യ കേസില്‍ മാധ്യമപ്രവര്‍ത്തകരുടെ ഫോണ്‍ ഉള്‍പ്പെടെയുള്ള ഉപകരണങ്ങള്‍ നിരീക്ഷിക്കുന്നതിലൂടെ മാധ്യമസ്വാതന്ത്ര്യത്തിന് ഗുരുതരമായ പ്രത്യാഘാതങ്ങളുണ്ടാകാമെന്ന് സുപ്രീംകോടതി മുന്നറിയിപ്പ് നല്‍കി.

മാധ്യമപ്രവര്‍ത്തകര്‍ക്ക് വിവരങ്ങള്‍ കൈമാറുന്ന സ്രോതസ്സുകളുടെ രഹസ്യസ്വഭാവം സംരക്ഷിക്കുക എന്നത് മാധ്യമസ്വാതന്ത്ര്യത്തിന്റെ അടിസ്ഥാന വ്യവസ്ഥകളിലൊന്നാണെന്ന് കോടതി വ്യക്തമാക്കി.

വിവരങ്ങള്‍ കൈമാറുന്നവരുടെ വ്യക്തിത്വവും സ്വകാര്യതയും സംരക്ഷിക്കപ്പെടുന്നില്ലെങ്കില്‍ മാധ്യമങ്ങളുമായി സഹകരിക്കാന്‍ അവര്‍ മടിക്കുമെന്നും അതുവഴി പൊതുതാല്‍പര്യമുള്ള വിഷയങ്ങള്‍ ജനങ്ങളിലെത്തിക്കുന്ന മാധ്യമങ്ങളുടെ പ്രവര്‍ത്തനം തടസ്സപ്പെടുമെന്നും കോടതി ചൂണ്ടിക്കാട്ടി.

അനുപാതവിരുദ്ധമായ സര്‍ക്കാര്‍ നിരീക്ഷണം മാധ്യമപ്രവര്‍ത്തനത്തെ ഭയപ്പെടുത്തുകയും സ്വയം നിയന്ത്രണത്തിലേക്ക് നയിക്കുകയും ചെയ്യുമെന്ന് കോടതി നിരീക്ഷിച്ചു.

മാധ്യമങ്ങള്‍ ജനാധിപത്യത്തിന്റെ കാവല്‍ക്കാരായി പ്രവര്‍ത്തിക്കുന്നതിനാല്‍ അവയുടെ സ്വതന്ത്രമായ പ്രവര്‍ത്തനത്തെ ബാധിക്കുന്ന നിരീക്ഷണങ്ങള്‍ ജനങ്ങള്‍ക്ക് കൃത്യവും വിശ്വസനീയവുമായ വിവരങ്ങള്‍ ലഭിക്കുന്നതിനുള്ള അവകാശത്തെയും ബാധിക്കുമെന്നും വിധിയില്‍ വ്യക്തമാക്കി.

ബ്ലൂംബെര്‍ഗ് കേസ്: വാര്‍ത്തകള്‍ തടയുന്ന ഇടക്കാല ഉത്തരവുകളില്‍ ജാഗ്രത വേണം

മാധ്യമങ്ങള്‍ക്കെതിരായ മാനനഷ്ടക്കേസുകളില്‍ വാര്‍ത്തകള്‍ പ്രസിദ്ധീകരിക്കുന്നത് തടയുന്ന ഇടക്കാല ഉത്തരവുകള്‍ പുറപ്പെടുവിക്കുന്നതില്‍ വിചാരണക്കോടതികള്‍ അതീവ ജാഗ്രത പുലര്‍ത്തണമെന്ന് 2024ലെ ബ്ലൂംബെര്‍ഗ് ടെലിവിഷന്‍ പ്രൊഡക്ഷന്‍ സര്‍വീസസ് ഇന്ത്യ പ്രൈവറ്റ് ലിമിറ്റഡ് വേഴ്സസ് സീ എന്റര്‍ടെയ്ന്‍മെന്റ് എന്റര്‍പ്രൈസസ് ലിമിറ്റഡ് കേസില്‍ സുപ്രീംകോടതി നിര്‍ദേശിച്ചു.

ഒരു വാര്‍ത്തയോ ലേഖനമോ പ്രസിദ്ധീകരിച്ചതിന്റെ പേരില്‍ അത് നീക്കം ചെയ്യാന്‍ കോടതി ഉത്തരവിടുന്നത് എഴുത്തുകാരന്റെ പ്രസിദ്ധീകരണാവകാശത്തെ മാത്രമല്ല, പൊതുജനങ്ങളുടെ അറിയാനുള്ള അവകാശത്തെയും ബാധിക്കുമെന്ന് കോടതി ഓര്‍മിപ്പിച്ചു.

വലിയ സാമ്പത്തിക ശേഷിയുള്ള സ്ഥാപനങ്ങള്‍ നിയമനടപടികള്‍ ഉപയോഗിച്ച്‌ തങ്ങളെക്കുറിച്ചുള്ള പൊതുതാല്‍പര്യമുള്ള വിവരങ്ങള്‍ പുറത്തുവരുന്നത് തടയാന്‍ ശ്രമിക്കുന്ന പ്രവണതയും കോടതി ചൂണ്ടിക്കാട്ടി. ഇത്തരം നടപടികളെ എസ്.എല്‍.എ.പി.പി (SLAPP - Strategic Litigation Against Public Participation) കേസുകള്‍ എന്നാണ് വിശേഷിപ്പിക്കുന്നത്. പൊതുചര്‍ച്ചകളിലും ജനകീയ ഇടപെടലുകളിലും പങ്കാളികളാകുന്നവരെ നിയമനടപടികളിലൂടെ നിശ്ശബ്ദരാക്കാനുള്ള ശ്രമങ്ങളാണിവ.

മാധ്യമങ്ങളുടെ അഭിപ്രായസ്വാതന്ത്ര്യവും വ്യക്തികളുടെ അഭിമാനവും സ്വകാര്യതയും തമ്മില്‍ സന്തുലിതാവസ്ഥ നിലനിര്‍ത്തേണ്ടതുണ്ടെങ്കിലും മാധ്യമപ്രവര്‍ത്തനത്തിനുള്ള ഭരണഘടനാപരമായ സംരക്ഷണം കുറച്ചുകാണാനാകില്ലെന്ന് കോടതി വ്യക്തമാക്കി.

വാര്‍ത്ത പ്രസിദ്ധീകരിക്കുന്നത് തടയുന്ന ഇടക്കാല ഉത്തരവുകള്‍ പുറപ്പെടുവിക്കുന്നതിന് മുമ്പ് അതീവ ഗൗരവത്തോടെ കാര്യങ്ങള്‍ പരിശോധിക്കണം. പ്രസിദ്ധീകരിക്കാന്‍ ഉദ്ദേശിക്കുന്ന ഉള്ളടക്കം ദുരുദ്ദേശ്യപരമാണെന്നോ വ്യക്തമായും അടിസ്ഥാനരഹിതവും തെറ്റാണെന്നോ ബോധ്യപ്പെടാതെ ഇത്തരം ഉത്തരവുകള്‍ പുറപ്പെടുവിക്കരുതെന്നും കോടതി നിര്‍ദേശിച്ചു.

പ്രത്യേകിച്ച്‌ എതിര്‍കക്ഷിയുടെ വാദം കേള്‍ക്കാതെ ഏകപക്ഷീയമായി (Ex-parte) വാര്‍ത്തകള്‍ തടയുന്ന ഉത്തരവുകള്‍ പുറപ്പെടുവിക്കുന്നത് അസാധാരണ സാഹചര്യങ്ങളില്‍ മാത്രമായിരിക്കണം. സാധാരണ സാഹചര്യങ്ങളില്‍ വിശദമായ വിചാരണയ്ക്കുശേഷമോ അല്ലെങ്കില്‍ എതിര്‍കക്ഷിക്ക് വാദം അവതരിപ്പിക്കാന്‍ അവസരം നല്‍കിയ ശേഷമോ മാത്രമേ ഇത്തരം നിയന്ത്രണങ്ങള്‍ ഏര്‍പ്പെടുത്താവൂ എന്നും കോടതി വ്യക്തമാക്കി.

കോടതി നടപടികള്‍ റിപ്പോര്‍ട്ട് ചെയ്യാന്‍ മാധ്യമങ്ങള്‍ക്ക് അവകാശമുണ്ട്

കോടതിമുറികളില്‍ നടക്കുന്ന വാക്കാലുള്ള പരാമര്‍ശങ്ങളും വാദപ്രതിവാദങ്ങളും റിപ്പോര്‍ട്ട് ചെയ്യാന്‍ മാധ്യമങ്ങള്‍ക്ക് അവകാശമുണ്ടെന്ന് 2021ലെ ഇലക്ഷന്‍ കമ്മീഷന്‍ ഓഫ് ഇന്ത്യ വേഴ്സസ് എം ആര്‍ വിജയ ഭാസ്‌കര്‍ കേസില്‍ സുപ്രീംകോടതി വ്യക്തമാക്കി.

കോവിഡ് മഹാമാരിക്കാലത്ത് തിരഞ്ഞെടുപ്പ് റാലികള്‍ അനുവദിച്ചതുമായി ബന്ധപ്പെട്ട് മദ്രാസ് ഹൈക്കോടതി നടത്തിയ വാക്കാലുള്ള പരാമര്‍ശമാണ് കേസിന് പശ്ചാത്തലമായത്. തിരഞ്ഞെടുപ്പ് കമ്മീഷനെതിരെ കൊലക്കുറ്റത്തിന് കേസെടുക്കണമെന്ന തരത്തിലുള്ള പരാമര്‍ശം ഹൈക്കോടതി നടത്തിയതിനെ തുടര്‍ന്നുണ്ടായ വിവാദത്തിനിടെ, കോടതികളിലെ വാക്കാലുള്ള പരാമര്‍ശങ്ങള്‍ മാധ്യമങ്ങള്‍ റിപ്പോര്‍ട്ട് ചെയ്യുന്നത് തടയണമെന്ന ആവശ്യവുമായാണ് തിരഞ്ഞെടുപ്പ് കമ്മീഷന്‍ സുപ്രീംകോടതിയെ സമീപിച്ചത്.

എന്നാല്‍ ഈ ആവശ്യം അംഗീകരിക്കാന്‍ കോടതി തയ്യാറായില്ല. കോടതികളിലെ നടപടികള്‍ റിപ്പോര്‍ട്ട് ചെയ്യുന്നത് മാധ്യമസ്വാതന്ത്ര്യത്തിന്റെ ഭാഗമാണെന്നും പൗരന്മാരുടെ അറിയാനുള്ള അവകാശവുമായും ജുഡീഷ്യറിയുടെ ഉത്തരവാദിത്വവുമായും അതിന് ബന്ധമുണ്ടെന്നും സുപ്രീംകോടതി വ്യക്തമാക്കി.

കോടതികള്‍ നിര്‍ണായകമായ ഭരണഘടനാപരമായ ഉത്തരവാദിത്വങ്ങളാണ് നിര്‍വഹിക്കുന്നത്. പൗരന്മാരുടെ അവകാശങ്ങളെ മാത്രമല്ല, നിയമം നടപ്പാക്കേണ്ട എക്‌സിക്യൂട്ടീവിന്റെ പ്രവര്‍ത്തനങ്ങളെയും കോടതികളുടെ ഇടപെടലുകള്‍ സ്വാധീനിക്കുന്നുണ്ട്. അധികാരത്തിന്റെ ഏകപക്ഷീയമായ വിനിയോഗം തടയാന്‍ കോടതികള്‍ ശരിയായ രീതിയില്‍ പ്രവര്‍ത്തിക്കുന്നുണ്ടെന്ന് ഉറപ്പാക്കാന്‍ ജനങ്ങള്‍ക്ക് അവകാശമുണ്ടെന്നും കോടതി ചൂണ്ടിക്കാട്ടി.

കോടതികളില്‍ നടക്കുന്ന നടപടികളെക്കുറിച്ചുള്ള വിവരങ്ങള്‍ പൊതുജനങ്ങള്‍ക്ക് ലഭ്യമാകേണ്ടത് ഈ ഉത്തരവാദിത്വം ഉറപ്പാക്കുന്നതില്‍ പ്രധാനമാണ്. അതുകൊണ്ടുതന്നെ കോടതി നടപടികളെക്കുറിച്ച്‌ റിപ്പോര്‍ട്ട് ചെയ്യാനും അഭിപ്രായം പറയാനും മാധ്യമങ്ങള്‍ക്ക് സ്വാതന്ത്ര്യമുണ്ടെന്ന് കോടതി നിരീക്ഷിച്ചു.

'അഭിപ്രായപ്രകടനത്തിനും ആശയവിനിമയത്തിനുമുള്ള സ്വാതന്ത്ര്യം ജുഡീഷ്യല്‍ സ്ഥാപനങ്ങളിലെ നടപടികള്‍ റിപ്പോര്‍ട്ട് ചെയ്യുന്നതിനും ബാധകമാണ്' എന്നായിരുന്നു സുപ്രീംകോടതിയുടെ സുപ്രധാന നിരീക്ഷണം.

മാധ്യമസ്വാതന്ത്ര്യം നിയന്ത്രിക്കാന്‍ കോടതിയുടെ അവഹേളനാധികാരം ഉപയോഗിക്കാനാകില്ല

2025ലെ വിക്കിമീഡിയ ഫൗണ്ടേഷന്‍ ഇന്‍ക്. വേഴ്സസ് എഎന്‍ഐ. മീഡിയ പ്രൈവറ്റ് ലിമിറ്റഡ് കേസിലും മാധ്യമസ്വാതന്ത്ര്യവുമായി ബന്ധപ്പെട്ട സുപ്രധാന നിലപാടാണ് സുപ്രീംകോടതി സ്വീകരിച്ചത്.

ഒരു വിക്കിപീഡിയ പേജ് നീക്കം ചെയ്യണമെന്നാവശ്യപ്പെട്ട് ഡല്‍ഹി ഹൈക്കോടതി കോടതിയലക്ഷ്യ നടപടികളില്‍ പുറപ്പെടുവിച്ച ഉത്തരവ് സുപ്രീംകോടതി റദ്ദാക്കി. മാധ്യമങ്ങള്‍ എന്ത് പ്രസിദ്ധീകരിക്കണം, എന്ത് നീക്കം ചെയ്യണം എന്ന കാര്യത്തില്‍ നിര്‍ദേശങ്ങള്‍ നല്‍കുന്നത് ജുഡീഷ്യറിയുടെ ചുമതലയല്ലെന്ന് കോടതി വ്യക്തമാക്കി.

കോടതികള്‍ പൊതുജനങ്ങള്‍ക്ക് തുറന്നിട്ടുള്ള സ്ഥാപനങ്ങളാണ്. കോടതിയുടെ പരിഗണനയിലുള്ള വിഷയങ്ങള്‍ (Sub Judice) പോലും പൊതുജനങ്ങള്‍ക്കും മാധ്യമങ്ങള്‍ക്കും ചര്‍ച്ച ചെയ്യാമെന്നും കോടതി നിരീക്ഷിച്ചു.

ജുഡീഷ്യറിയും മാധ്യമങ്ങളും ജനാധിപത്യത്തിന്റെ അടിസ്ഥാന തൂണുകളാണ്. ഉദാര ജനാധിപത്യ വ്യവസ്ഥ നിലനില്‍ക്കണമെങ്കില്‍ ഈ രണ്ട് സ്ഥാപനങ്ങളും പരസ്പരം ശക്തിപ്പെടുത്തണം. മാധ്യമങ്ങളുടെ നിരീക്ഷണവും വിമര്‍ശനവും പൊതുചര്‍ച്ചകളും ജനാധിപത്യത്തിന്റെ അനിവാര്യ ഘടകങ്ങളാണെന്നും കോടതി വ്യക്തമാക്കി.

സര്‍ക്കാരിനെ വിമര്‍ശിച്ചാല്‍ മാധ്യമങ്ങളെ ഭരണകൂടവിരുദ്ധരെന്ന് മുദ്രകുത്താനാകില്ല

മീഡിയവണിന്റെ സംപ്രേഷണ വിലക്ക് നീക്കിയ 2023ലെ മാധ്യമം ബ്രോഡ്കാസ്റ്റിങ് കേസില്‍ സുപ്രീംകോടതി നടത്തിയ മറ്റൊരു പ്രധാന നിരീക്ഷണം മാധ്യമലോകത്ത് ഏറെ ശ്രദ്ധ നേടിയിരുന്നു.

സര്‍ക്കാരിനെ വിമര്‍ശിക്കുന്നു എന്ന കാരണത്താല്‍ മാത്രം ഒരു മാധ്യമസ്ഥാപനത്തെ 'ഭരണകൂടവിരുദ്ധം' (Anti-establishment) എന്ന് വിശേഷിപ്പിക്കാനാകില്ലെന്ന് കോടതി വ്യക്തമാക്കി.

മാധ്യമങ്ങള്‍ ഭരണകൂടത്തെ പിന്തുണയ്ക്കണം എന്ന പ്രതീക്ഷയാണ് ഇത്തരം പ്രയോഗങ്ങള്‍ക്ക് പിന്നിലെന്നും കോടതി നിരീക്ഷിച്ചു. സര്‍ക്കാരിന്റെ നയങ്ങളെയും നടപടികളെയും വിമര്‍ശിക്കാനുള്ള അവകാശം മാധ്യമങ്ങള്‍ക്കുണ്ട്. ഭരണകൂടത്തിന്റെ കാഴ്ചപ്പാടുകളുമായി യോജിക്കുന്നില്ലെന്ന കാരണത്താല്‍ ഒരു മാധ്യമസ്ഥാപനത്തിന് സുരക്ഷാ അനുമതി നിഷേധിക്കുന്നത് അഭിപ്രായസ്വാതന്ത്ര്യത്തെയും മാധ്യമസ്വാതന്ത്ര്യത്തെയും ഭയപ്പെടുത്തുന്ന നടപടിയാണെന്നും കോടതി ചൂണ്ടിക്കാട്ടി.

ഒരു മാധ്യമസ്ഥാപനം സ്വീകരിക്കുന്ന നിലപാടുകളുടെ പേരില്‍ അതിന്റെ പ്രവര്‍ത്തനം തടയുന്നത് ഭരണഘടനാപരമായി അനുവദിക്കാനാവില്ലെന്ന ശക്തമായ സന്ദേശമാണ് ഈ വിധിയിലൂടെ സുപ്രീംകോടതി നല്‍കിയത്.

മാധ്യമപ്രവര്‍ത്തകന്റെ സോഷ്യല്‍ മീഡിയ വിവരങ്ങള്‍ തേടിയ യുപി പോലിസിന്റെ നടപടി റദ്ദാക്കി

മാധ്യമപ്രവര്‍ത്തകരുടെ സ്വകാര്യ വിവരങ്ങളും വാര്‍ത്താ സ്രോതസ്സുകളും സംരക്ഷിക്കുന്നതുമായി ബന്ധപ്പെട്ട് അടുത്തിടെ സുപ്രീംകോടതി നടത്തിയ മറ്റൊരു ഇടപെടലും ശ്രദ്ധേയമായി.

അയോധ്യയിലെ രാമക്ഷേത്രവുമായി ബന്ധപ്പെട്ട സംഭാവനകളുടെ മോഷണ ആരോപണത്തെക്കുറിച്ച്‌ റിപ്പോര്‍ട്ട് ചെയ്ത മാധ്യമപ്രവര്‍ത്തകന്‍ അഭിഷേക് ഉപാധ്യായയുടെ സോഷ്യല്‍ മീഡിയ ഉപയോഗവുമായി ബന്ധപ്പെട്ട വിവരങ്ങള്‍ ആവശ്യപ്പെട്ട് ഉത്തര്‍പ്രദേശ് പൊലീസ് സമൂഹമാധ്യമ പ്ലാറ്റ്ഫോമായ 'എക്സ്' (X)ന് നോട്ടീസ് നല്‍കിയിരുന്നു.

തന്റെ വാര്‍ത്തകളുടെ ഉറവിടങ്ങള്‍ കണ്ടെത്താനാണ് പോലിസ് ശ്രമിക്കുന്നതെന്ന ആശങ്ക മാധ്യമപ്രവര്‍ത്തകന്‍ പ്രകടിപ്പിച്ചിരുന്നു.

എന്നാല്‍ അദ്ദേഹത്തിനെതിരെ പിന്നീട് രജിസ്റ്റര്‍ ചെയ്ത റോഡ് റേജ് സംഭവവുമായി ബന്ധപ്പെട്ട എഫ്.ഐ.ആറിന് മുമ്പുള്ള കാലയളവിലെ സോഷ്യല്‍ മീഡിയ വിവരങ്ങളാണ് പൊലീസ് ആവശ്യപ്പെട്ടിരുന്നത്. അതിനാല്‍ ഇത്തരം സ്വകാര്യ വിവരങ്ങള്‍ ശേഖരിക്കേണ്ടതിന്റെ ആവശ്യകതയും ന്യായീകരണവും പൊലീസ് വ്യക്തമാക്കിയിട്ടില്ലെന്ന് സുപ്രീംകോടതി വിലയിരുത്തി.

അനുപാതികതയുടെ തത്വം (Principle of Proportionality) അടിസ്ഥാനമാക്കി പരിശോധിച്ച കോടതി, മാധ്യമപ്രവര്‍ത്തകന്റെ സ്വകാര്യ വിവരങ്ങള്‍ കണ്ടെത്താനുള്ള പൊലീസ് നടപടി ന്യായീകരിക്കാനാവില്ലെന്ന് ചൂണ്ടിക്കാട്ടി നോട്ടീസ് റദ്ദാക്കി.

മാധ്യമസ്വാതന്ത്ര്യം ജനാധിപത്യത്തിന്റെ ജീവശ്വാസം

മാധ്യമസ്വാതന്ത്ര്യം മാധ്യമപ്രവര്‍ത്തകരുടെ മാത്രം അവകാശമല്ലെന്നും ജനങ്ങളുടെ അറിയാനുള്ള അവകാശവുമായി അഭേദ്യമായി ബന്ധപ്പെട്ടതാണെന്നും സുപ്രീംകോടതിയുടെ വിവിധ വിധികള്‍ വ്യക്തമാക്കുന്നു.

സര്‍ക്കാരിനെയും അധികാരകേന്ദ്രങ്ങളെയും വിമര്‍ശിക്കാനുള്ള അവകാശം, വാര്‍ത്തകളുടെ ഉറവിടങ്ങള്‍ സംരക്ഷിക്കാനുള്ള സ്വാതന്ത്ര്യം, കോടതികളിലെ നടപടികള്‍ റിപ്പോര്‍ട്ട് ചെയ്യാനുള്ള അവകാശം, പൊതുതാല്‍പര്യമുള്ള വാര്‍ത്തകള്‍ പ്രസിദ്ധീകരിക്കുന്നതിനെ അനാവശ്യമായി തടയരുതെന്ന നിര്‍ദേശം എന്നിവയെല്ലാം ശക്തമായ ജനാധിപത്യത്തിന്റെ അടിസ്ഥാന ഘടകങ്ങളാണ്.

മാധ്യമങ്ങള്‍ അധികാരത്തെ ചോദ്യം ചെയ്യുമ്പോഴും ഭരണകൂടത്തിന്റെ പ്രവര്‍ത്തനങ്ങളെ നിരീക്ഷിക്കുമ്പോഴും മാത്രമാണ് ജനാധിപത്യത്തിലെ അവരുടെ കാവല്‍ക്കാരന്റെ ദൗത്യം പൂര്‍ണമാകുന്നത്. വിമര്‍ശനങ്ങളെ നിശ്ശബ്ദമാക്കുന്നതും വാര്‍ത്തകള്‍ തടയുന്നതും മാധ്യമപ്രവര്‍ത്തകരെ നിരീക്ഷിക്കുന്നതും ആത്യന്തികമായി ബാധിക്കുന്നത് പൊതുജനങ്ങളുടെ അറിയാനുള്ള അവകാശത്തെയാണ്.

Dailyhunt
Disclaimer: This content has not been generated, created or edited by Dailyhunt. Publisher: Thejas News