തിരുവനന്തപുരം: സംസ്ഥാനത്ത മഴ നിലയ്ക്കാത്ത സാഹചര്യത്തില് ജനങ്ങള് അതീവ ജാഗ്രത കാണിക്കണമെന്ന് മുഖ്യമന്ത്രി പിണറായി വിജയന് അഭ്യര്ത്ഥിച്ചു.
സംസ്ഥനത്തുടനീളം ഇന്ന് (ഒക്ടോബര് 17 )വരെ ഇടിമിന്നലിനും ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കിയിട്ടുണ്ട്. അറബിക്കടലില് ലക്ഷദീപിനു സമീപം രൂപം കൊണ്ട ന്യൂനമര്ദ്ദം നിലവില് ശക്തി കുറഞ്ഞു. എങ്കിലും വൈകുന്നേരം വരെ മഴ തുടരാന് സാധ്യതയുള്ളതായാണ് കാലാവസ്ഥാ പ്രവചനം. കേന്ദ്ര കാലാവസ്ഥാ വകുപ്പിന്റെ രാവിലെ 10ന് ് പുറപ്പെടിവിച്ച മുന്നറിയിപ്പ് പ്രകാരം ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര് പാലക്കാട് മലപ്പുറം, കോഴിക്കോട് എന്നീ ജില്ലകളില് മഞ്ഞ അലേര്ട്ടാണ് പ്രഖ്യാപിച്ചിട്ടുള്ളത്.
സംസ്ഥാനത്താകെ 105 ദുരിതാശ്വാസ കാംപുകള് തുറന്നിട്ടുണ്ട്. ആവശ്യം വന്നാല് കൂടുതല് ക്യാംപുകള് അതിവേഗം തുടങ്ങാന് സജ്ജീകരണമൊരുക്കിയിട്ടുമുണ്ട്.
ദേശീയ ദുരന്ത പ്രതികരണ സേനയുടെ ഓരോ ടീമുകളെ പത്തനംതിട്ട, ആലപ്പുഴ, ഇടുക്കി, എറണാകുളം, തൃശൂര്, മലപ്പുറം ജില്ലകളില് വിന്യസിച്ചിട്ടുണ്ട്. ഇതുകൂടാതെ 5 ടീമിനെക്കൂടി ഇടുക്കി, കോട്ടയം, കൊല്ലം, കണ്ണൂരും, പാലക്കാട് ജില്ലകളില് വിന്യസിക്കാനായി നിര്ദ്ദേശം നല്കിയിട്ടുണ്ട്.
ഇന്ത്യന് ആര്മിയുടെ രണ്ടു ടീമുകളില് ഒരു ടീം തിരുവനന്തപുരത്തും, ഒരെണ്ണം കോട്ടയത്തും വിന്യസിച്ചിട്ടുണ്ട്. ഡിഫെന്സ് സെക്യൂരിറ്റി കോര്പ്സിന്റെ ടീമുകള് ഒരെണ്ണം കോഴിക്കോടും ഒരെണ്ണം വയനാടും വിന്യസിച്ചിട്ടുണ്ട്. എയര്ഫോഴ്സ്നേയും നേവിയെയും അടിയന്തിര സാഹചര്യം നേരിടാന് സജ്ജരായിരിക്കാന് നിര്ദ്ദേശം നല്കി. സന്നദ്ധസേനയും സിവില് ഡിഫെന്സും അടിയന്തര സാഹചര്യങ്ങള് അഭിമുഖീകരിക്കാന് സജ്ജമായിട്ടുണ്ട്.
എന്ജിനിയര് ടാസ്ക് ഫോഴ്സ് ടീം ബാംഗ്ലൂര് നിന്നും മുണ്ടക്കയത്തേക്ക് തിരിച്ചു. എയര് ഫോഴ്സിന്റെ 2 ചോപ്പറുകള് കോയമ്ബത്തൂരിനടുത്തുള്ള സുളൂരില് നിന്നും തിരുവനന്തപുരത്ത് എത്തി.
പത്തനംതിട്ട ജില്ലയില് മല്ലപ്പള്ളിക്ക് സമീപം ആളുകള് കുടുങ്ങി കിടപ്പുണ്ടെന്ന അറിയിപ്പ് ലഭിച്ചിട്ടുണ്ട്. ഫയര് ഫോഴ്സ് രക്ഷാപ്രവര്ത്തനം നടത്താന് ശ്രമിക്കുന്നുണ്ടെങ്കിലും എയര് ലിഫ്റ്റിങ് വേണ്ടി വന്നേക്കാം എന്ന ജില്ലാ ദുരന്ത നിവാരണ അതോറിറ്റിയുടെ നിര്ദ്ദേശത്തെ തുടര്ന്ന് എയര് ഫോഴ്സ് ഹെലികോപ്റ്റര് നിയോഗിച്ചു.
നേവിയുടെ ഹെലികോപ്റ്റര് കൂട്ടിക്കല്, കൊക്കയാര് ഉരുള്പൊട്ടല് ബാധിത പ്രദേശങ്ങളില് ഭക്ഷണപ്പൊതി വിതരണം ചെയ്യാനായി നിയോഗിച്ചു.
സംസ്ഥാന അടിയന്തരഘട്ട കാര്യനിര്വഹണ കേന്ദ്രം കൂടുതല് സജീവമാക്കി. ഡാമുകളിലെ സ്ഥിതിഗതികള് വിലയിരുത്തുവാന് കെ എസ് ഇ ബി , ജലസേചന വകുപ്പ്, മോട്ടോര് വാഹന വകുപ്പ് തുടങ്ങിയ വകുപ്പുകളുടെ പ്രതിനിധികളെ അടിയന്തരഘട്ട കാര്യനിര്വഹണ കേന്ദ്രത്തില് 24 മണിക്കൂറും വിന്യസിച്ചു. പോലിസ്, ഫയര് ഫോഴ്സ്, ലാന്ഡ് റെവന്യു കണ്ട്രോള് റൂമുകളുമായും സംസ്ഥാന അടിയന്തരഘട്ട കാര്യനിര്വഹണ കേന്ദ്രം ആശയവിനിമയം നടത്തി വരുന്നു. ബന്ധപ്പെട്ട എല്ലാ വകുപ്പ് മേധാവികളോടും ഏതു വിധത്തിലുള്ള അടിയന്തര സാഹചര്യങ്ങളെയും നേരിടാന് സുസജ്ജമായിരിക്കാന് നിര്ദ്ദേശം നല്കിയിട്ടുണ്ട്.
കേന്ദ്ര കാലാവസ്ഥാ വകുപ്പിന്റെ ഏറ്റവും ഒടുവില് ലഭിച്ച മുന്നറിയിപ്പ് പ്രകാരം കേരളകര്ണാടകലക്ഷദ്വീപ് മേഖലകളില് മത്സ്യബന്ധനം ഇന്ന് വരെ പൂര്ണ്ണമായും നിരോധിച്ചിട്ടുണ്ട്.
വൈദ്യുതി ബോര്ഡിന്റെ കീഴിലുള്ള അണക്കെട്ടുകളില് പത്തനംതിട്ട ജില്ലയിലെ കക്കി, തൃശ്ശൂര് ജില്ലയിലെ ഷോളയാര് , പെരിങ്ങല്കുത്തു, ഇടുക്കി ജില്ലയിലെ കുണ്ടള, കല്ലാര്കുട്ടി, മാട്ടുപ്പെട്ടി, കല്ലാര് എന്നീ അണക്കെട്ടുകളില് രാവിലെ 7 മണിക്കുള്ള അണക്കെട്ടുകളുടെ നിരീക്ഷണപട്ടികയില് ചുവന്ന അലെര്ട് പ്രഖ്യാപിച്ചിട്ടുണ്ട്. ഇടുക്കി ജില്ലയിലെ പൊന്മുടി, ഇടുക്കി ഡാം, പത്തനംതിട്ടയിലെ പമ്ബ എന്നിവിടങ്ങളില് നീല അലെര്ട് പ്രഖ്യപിച്ചിട്ടുണ്ട്.
ജലസേചന വകുപ്പിന്റെ അണക്കെട്ടുകളില് രാവിലെ 11 മണിക്കുള്ള നിരീക്ഷണപട്ടികയില് പാലക്കാട് ജില്ലയിലെ ചുള്ളിയാര്, തൃശ്ശൂര് പീച്ചി എന്നിവിടങ്ങളില് ചുവപ്പ് അലെര്ട് പ്രഖ്യാപിച്ചിട്ടുണ്ട്. തൃശ്ശൂര് ജില്ലയിലെ വാഴാനി, ചിമ്മിനി, പാലക്കാട് ജില്ലയിലെ മീങ്കര, മംഗലം, മലമ്ബുഴ എന്നിവിടങ്ങളില് ഓറഞ്ച് അലെര്ട് പ്രഖ്യാപിച്ചു. പാലക്കാട് ജില്ലയിലെ പോത്തുണ്ടി, തിരുവനന്തപുരം ജില്ലയിലെ നെയ്യാര് എന്നിവിടങ്ങളില് ആദ്യഘട്ടമുന്നറിയിപ്പായ നീലയും പുറപ്പെടുവിച്ചിട്ടുണ്ട്.
കേന്ദ്ര ജല കമ്മീഷന്റെ പ്രളയസാധ്യതാമുന്നറിയിപ്പ് പ്രകാരം പത്തനംതിട്ട, കോട്ടയം ജില്ലകളിലെ മടമണ്, കല്ലൂപ്പാറ, തുമ്ബമണ്, പുല്ലക്കയര്, മണിക്കല്, തിരുവനന്തപുരം ജില്ലയിലെ വെള്ളായിക്കടവ്, അരുവിപ്പുറം എന്നീ ജലനിരപ്പ് ഉയരുന്ന സാഹചര്യമാണ് കാണിക്കുന്നതെന്നും മുഖ്യമന്ത്രി പറഞ്ഞു.