തിരുവനന്തപുരം: സംസ്ഥാനത്ത് വൈദ്യുതിയുടെ പ്രതിസന്ധിഘട്ടം ഇല്ലെന്ന് കെഎസ്ഇബി. കഴിഞ്ഞ ഒരാഴ്ച സംസ്ഥാനത്ത് വൈദ്യുതി നിയന്ത്രണമുണ്ടായിരുന്നില്ലെന്നും കെഎസ്ഇബി വ്യക്തമാക്കി.
പവര് എക്സ്ചേഞ്ചില് നിന്ന് വൈദ്യുതി ലഭ്യമായതിനാല് നിയന്ത്രണം ഒഴിവാക്കാനായെന്ന് കെഎസ്ഇബി വ്യക്തമാക്കി.
സംസ്ഥാനത്ത് വൈദ്യുതി ഉപയോഗം വര്ധിച്ചതിന് പിന്നാലെ കെഎസ്ഇബി നിയന്ത്രണം ഏര്പ്പെടുത്തിയിരുന്നു. സെപ്റ്റംബര് ഒഴികെ ജൂലൈ മുതല് ഡിസംബര് വരെ ഉയര്ന്ന വിലയ്ക്ക് വൈദ്യുതി വാങ്ങാന് വൈദ്യുതി റെഗുലേറ്ററി കമ്മിഷന് നേരത്തെ അനുമതി നല്കിയിരുന്നു. ജൂലൈ മുതല് ഡിസംബര് വരെയുള്ള കാലയളവില് 600 മുതല് 1000 മെഗാവാട്ട് വരെ വൈദ്യുതിയുടെ കുറവുണ്ടാകുമെന്ന് കെഎസ്ഇബി നേരത്തെ കമ്മീഷനെ അറിയിച്ചിരുന്നു.
സംസ്ഥാനത്തെ വൈദ്യുതി പ്രതിസന്ധിക്ക് പ്രധാന കാരണം മഴക്കുറവാണെന്ന് കെഎസ്ഇബി നേരത്തെ വ്യക്തമാക്കിയിരുന്നു. ആവശ്യത്തിന് മഴ ലഭിക്കാത്തതിനെ തുടര്ന്ന് ഡാമുകളിലെ ജലനിരപ്പ് ഗണ്യമായി കുറഞ്ഞതായും അധികൃതര് പറഞ്ഞിരുന്നു.