ആക്രമണങ്ങള്‍ക്ക് ഏതാനും ആഴ്ചകള്‍ക്ക് മുമ്പ് CIAയുടെ കൗണ്ടർടെററിസം സെന്ററിന് ലഭിച്ച ഒരു രഹസ്യാന്വേഷണ റിപ്പോർട്ടില്‍ മുഹമ്മദുമായി ബന്ധപ്പെട്ട 'മുഖ്താർ' എന്ന അപരനാമത്തെക്കുറിച്ച്‌ വിവരമുണ്ടായിരുന്നുവെന്നാണ് റിപ്പോർട്ട്.

അല്‍ഖായിദയുമായി ബന്ധപ്പെട്ട പ്രവർത്തനങ്ങളില്‍ സജീവമായിരുന്ന മുഹമ്മദ് അമേരിക്കക്കെതിരെ ആക്രമണം നടത്താൻ ഭീകരരെ റിക്രൂട്ട് ചെയ്യുകയും പരിശീലിപ്പിക്കുകയും ചെയ്യുന്നുവെന്ന വിവരങ്ങളും നേരത്തെ CIA റിപ്പോർട്ടുകളില്‍ പ്രത്യക്ഷപ്പെട്ടിരുന്നു. എന്നാല്‍ 'മുഖ്താർ' എന്ന പേരും ഖാലിദ് ഷെയ്ഖ് മുഹമ്മദിന്റെ യഥാർഥ വ്യക്തിത്വവും തമ്മിലുള്ള ബന്ധം ഏജൻസിക്ക് സമയബന്ധിതമായി തിരിച്ചറിയാനായില്ലെന്നാണ് പുറത്തുവരുന്ന വിവരം.

1998ലെ ആഫ്രിക്കൻ എംബസി ആക്രമണങ്ങള്‍ക്ക് പിന്നാലെ മുഹമ്മദുമായി ബന്ധപ്പെട്ട മറ്റൊരു അപരനാമവും CIA തിരിച്ചറിഞ്ഞിരുന്നു. എന്നാല്‍ വിവിധ റിപ്പോർട്ടുകളിലുണ്ടായിരുന്ന വിവരങ്ങള്‍ പരസ്പരം കൂട്ടിച്ചേർത്ത് ഒരേ വ്യക്തിയിലേക്കെത്തുന്നതിലും അദ്ദേഹത്തിന്റെ അല്‍ഖായിദ ബന്ധങ്ങള്‍ തിരിച്ചറിയുന്നതിലും രഹസ്യാന്വേഷണ ഏജൻസിക്ക് വീഴ്ച സംഭവിച്ചതായാണ് റിപ്പോർട്ട്. മുഹമ്മദിന്റെ ബന്ധുക്കളില്‍ ചിലർ അല്‍ഖായിദയുമായി ബന്ധപ്പെട്ടിരുന്നതായ വിവരങ്ങളും അന്നുണ്ടായിരുന്നുവെന്നാണ് റിപ്പോർട്ടിലെ പരാമർശം.

2001ലെ ആക്രമണങ്ങള്‍ക്ക് ശേഷമാണ് 'മുഖ്താർ' എന്ന പേരില്‍ അറിയപ്പെട്ടിരുന്ന വ്യക്തി ഖാലിദ് ഷെയ്ഖ് മുഹമ്മദ് തന്നെയാണെന്ന് വ്യക്തമായത്. അല്‍ഖായിദ പ്രവർത്തകനായ റംസീ ബിൻ അല്‍-ഷിബുമായി ബന്ധപ്പെട്ടിരുന്ന ഒരു ടെലിഫോണ്‍ നമ്പറുമായി മുഹമ്മദ് ആശയവിനിമയം നടത്തിയിരുന്നതായും അന്വേഷണത്തില്‍ കണ്ടെത്തി. 9/11 ആക്രമണവുമായി ബന്ധപ്പെട്ട മറ്റൊരു പ്രതിയായ സക്കറിയാസ് മുസാവിയുമായി ബിൻ അല്‍-ഷിബ് ആശയവിനിമയം നടത്തിയിരുന്നതും ഇതേ ഫോണ്‍ വഴിയായിരുന്നു.
1993ലെ വേള്‍ഡ് ട്രേഡ് സെന്റർ ആക്രമണവുമായി ബന്ധപ്പെട്ട പങ്കിന്റെ പേരില്‍ 1996 ജനുവരിയില്‍ ഖാലിദ് ഷെയ്ഖ് മുഹമ്മദിനെതിരെ കുറ്റം ചുമത്തിയിരുന്നു. ഖത്തറില്‍ താമസിച്ചിരുന്ന അദ്ദേഹത്തെ പിടികൂടാനുള്ള ശ്രമം പരാജയപ്പെട്ടതിനെ തുടർന്ന് 1996ല്‍ രാജ്യം വിട്ട മുഹമ്മദ് പിന്നീട് അഫ്ഗാനിസ്ഥാനിലും പാകിസ്ഥാനിലും പ്രവർത്തിക്കുകയും അല്‍ഖായിദയുമായി അടുത്ത ബന്ധം പുലർത്തുകയും ചെയ്തു. 2003ല്‍ യുഎസ് അധികൃതർ അദ്ദേഹത്തെ അറസ്റ്റ് ചെയ്തു. 2006 സെപ്റ്റംബർ മുതല്‍ ഗ്വാണ്ടനാമോ ബേ തടങ്കല്‍ കേന്ദ്രത്തിലാണ് മുഹമ്മദ് കഴിയുന്നത്.

അതേസമയം, 9/11 കേസിലെ നിയമനടപടികളും നീണ്ടുപോകുകയാണ്. ഏകദേശം 20 വർഷം മുമ്പ് എഫ്ബിഐയ്ക്ക് നല്‍കിയ ഖാലിദ് ഷെയ്ഖ് മുഹമ്മദിന്റെ നിർണായക മൊഴി വെള്ളിയാഴ്ച സൈനിക ജഡ്ജി തള്ളിയിരുന്നു. മൊഴി സ്വമേധയാ നല്‍കിയതല്ലെന്നായിരുന്നു ജഡ്ജി മൈക്കല്‍ ഷ്രാമയുടെ നിരീക്ഷണം. ഇതോടെ കേസിലെ വിചാരണ നടപടികള്‍ക്ക് വീണ്ടും തിരിച്ചടിയേറ്റിരിക്കുകയാണ്. മുഹമ്മദിനെതിരായ വിചാരണ 2028ല്‍ നടക്കാനിരിക്കെയാണ് പുതിയ നിയമപ്രശ്നം ഉയർന്നിരിക്കുന്നത്.
2001 സെപ്റ്റംബർ 11ലെ ആക്രമണങ്ങളില്‍ വേള്‍ഡ് ട്രേഡ് സെന്ററിലേക്കും പെന്റഗണിലേക്കും വിമാനങ്ങള്‍ ഇടിച്ചുകയറ്റിയ സംഭവത്തില്‍ ഏകദേശം 3,000 പേരാണ് കൊല്ലപ്പെട്ടത്. ആക്രമണങ്ങളുടെ ആസൂത്രണത്തില്‍ ഖാലിദ് ഷെയ്ഖ് മുഹമ്മദിന് നിർണായക പങ്കുണ്ടെന്നാണ് യുഎസ് അന്വേഷണ ഏജൻസികളുടെ ആരോപണം.

Summary: A new report says the CIA had intelligence linking the alias "Mukhtar" to Khalid Sheikh Mohammed before the 9/11 attacks but failed to connect the information in time. The report also highlights missed links to his aliases and al-Qaeda associates, while his long-delayed trial faces another setback after a judge excluded a key FBI confession.