ജെറുസലേം: ഇറാനില് തകർന്നുവീണ യുദ്ധവിമാനത്തിലെ അമേരിക്കൻ സൈനികനെ സാഹസികമായി രക്ഷപ്പെടുത്തിയ ദൗത്യത്തില് യുഎസ് പ്രസിഡന്റ് ഡൊണാള്ഡ് ട്രംപിനെ അഭിനന്ദിച്ച് ഇസ്രായേല് പ്രധാനമന്ത്രി ബെഞ്ചമിൻ നെതന്യാഹു.
ഫോണ് വഴിയാണ് നെതന്യാഹു ട്രംപിനെ അഭിനന്ദനമറിയിച്ചത്.(Deeply proud, Netanyahu congratulates Trump for rescuing American soldier)
ദൗത്യത്തില് ഇസ്രായേല് നല്കിയ സഹായത്തിന് ട്രംപ് നന്ദി അറിയിച്ചതായി നെതന്യാഹു തന്റെ എക്സ് പോസ്റ്റില് വ്യക്തമാക്കി. രക്ഷാദൗത്യത്തിന് നേതൃത്വം നല്കിയ പ്രസിഡന്റ് ട്രംപിനെ താൻ അഭിനന്ദിച്ചു. ഇസ്രായേല് നല്കിയ സഹായത്തിന് അദ്ദേഹം നന്ദി രേഖപ്പെടുത്തി. യുദ്ധക്കളത്തിലും പുറത്തും ഇരുരാജ്യങ്ങളും തമ്മിലുള്ള സഹകരണം അഭൂതപൂർവമാണെന്നതില് താൻ അഭിമാനിക്കുന്നു. ധീരനായ ഒരു അമേരിക്കൻ പോരാളിയെ രക്ഷിക്കുന്നതില് പങ്കുചേരാൻ ഇസ്രായേലിന് സാധിച്ചു എന്നത് അഭിമാനകരമായ കാര്യമാണ് എന്ന് നെതന്യാഹു കുറിച്ചു.
ഇറാൻ വെടിവെച്ചിട്ട എഫ്-15 വിമാനത്തിലെ പൈലറ്റിനെ നേരത്തെ തന്നെ രക്ഷപ്പെടുത്തിയിരുന്നു. എന്നാല് കാണാതായ രണ്ടാമത്തെ സൈനികനായി ദിവസങ്ങള് നീണ്ട തിരച്ചിലിനൊടുവിലാണ് അമേരിക്കൻ സേന ഇറാന്റെ മണ്ണില് കടന്ന് വൻ ദൗത്യം പൂർത്തിയാക്കിയത്. ഈ സൈനിക നീക്കത്തില് ഇസ്രായേലിന്റെ സഹായം ലഭിച്ചിരുന്നു എന്ന സൂചനയാണ് നെതന്യാഹുവിന്റെ വാക്കുകള് നല്കുന്നത്.