ഇറാൻ വാർത്താ ഏജൻസിയെ ഉദ്ധരിച്ചാണ് ഇക്കാര്യം റിപ്പോർട്ട് ചെയ്തത്. അമേരിക്ക-ഇസ്രായേല്‍ സഖ്യം ഇറാനെതിരെ നടത്തുന്ന യുദ്ധം തുടരുന്നതിനിടെയാണ് ഈ നാടകീയ നീക്കം. വിമാനത്തിലെ പൈലറ്റ് രക്ഷപ്പെടാൻ സാധ്യതയില്ലെന്നും ഇറാൻ വൃത്തങ്ങള്‍ സൂചിപ്പിച്ചു.(Iran claims to have shot down a second US F-35 jet, Report says pilot unlikely to survive)

വിമാനം തകർന്നതുമായി ബന്ധപ്പെട്ട് അമേരിക്കൻ സെൻട്രല്‍ കമാൻഡ് ഇതുവരെ ഔദ്യോഗിക സ്ഥിരീകരണം നല്‍കിയിട്ടില്ല. മാർച്ച്‌ 2-ന് കുവൈറ്റിന് മുകളില്‍ വെച്ച്‌ അമേരിക്കയുടെ മൂന്ന് എഫ്-15ഇ (F-15E) വിമാനങ്ങള്‍ തകർന്നിരുന്നു. കുവൈറ്റ് വ്യോമപ്രതിരോധ സേനയ്ക്ക് പറ്റിയ അബദ്ധത്തിലാണ് അന്ന് വിമാനങ്ങള്‍ തകർന്നതെന്ന് സെന്റ്കോം സ്ഥിരീകരിച്ചിരുന്നു.

അമേരിക്കൻ സെന്റ്കോം കമാൻഡർ ബ്രാഡ് കൂപ്പർ മാർച്ച്‌ 31-ന് നല്‍കിയ റിപ്പോർട്ട് പ്രകാരം, ഇറാനെതിരെയുള്ള സൈനിക നീക്കം വലിയ വിജയമാണെന്നാണ് വിലയിരുത്തല്‍. “അഞ്ചാം വാരത്തില്‍ നമ്മള്‍ വലിയ പുരോഗതി കൈവരിച്ചു. ഇറാന്റെ നാവികസേനയോ വ്യോമസേനയോ ഇപ്പോള്‍ ചലിക്കുന്നില്ല. അവരുടെ മിസൈല്‍ പ്രതിരോധ സംവിധാനങ്ങള്‍ ഭൂരിഭാഗവും തകർക്കപ്പെട്ടു.” എന്നാല്‍, വെള്ളിയാഴ്ച പുലർച്ചെ ഇസ്രായേലിന് നേരെ ഇറാൻ മിസൈല്‍ ആക്രമണം നടത്തി. ടെല്‍ അവീവ്, എയിലാത്ത് എന്നിവിടങ്ങളെ ലക്ഷ്യം വെച്ചാണ് ഇറാൻ റെവല്യൂഷണറി ഗാർഡ് മിസൈലുകള്‍ വിട്ടത്. ഇവ തടയാനുള്ള ശ്രമത്തിലാണ് ഇസ്രായേല്‍ പ്രതിരോധ സേന.

ലോകത്തിലെ ഏറ്റവും മികച്ച യുദ്ധവിമാനങ്ങളിലൊന്നായ എഫ്-35 തകരുന്നത് അമേരിക്കൻ സൈനിക ശക്തിക്ക് വലിയ തിരിച്ചടിയാണ്. എഫ്-35 പദ്ധതിക്കായി ഇതുവരെ 450 ബില്യണ്‍ ഡോളറിലധികം അമേരിക്ക ചെലവഴിച്ചിട്ടുണ്ട്. വരും പതിറ്റാണ്ടുകളില്‍ ഇതിന്റെ മൊത്തം ചെലവ് 2 ട്രില്യണ്‍ ഡോളർ കവിയുമെന്നാണ് കണക്കാക്കുന്നത്.