നേരിട്ടോ മധ്യസ്ഥർ മുഖേനയോ ഇനി അമേരിക്കയുമായി യാതൊരു ആശയവിനിമയവും വേണ്ടെന്നാണ് ഇറാന്റെ തീരുമാനം. ഇറാൻ എന്ന രാജ്യം തന്നെ ഇന്ന് രാത്രിയോടെ ഇല്ലാതാകുമെന്ന ട്രംപിന്റെ പ്രസ്താവനയാണ് ബന്ധം പൂർണ്ണമായും വഷളാക്കിയത്.

ഹോർമുസ് കടലിടുക്ക് തുറക്കാനും വെടിനിർത്തല്‍ കരാറില്‍ ഒപ്പിടാനും ട്രംപ് നല്‍കിയ സമയം അവസാനിക്കാൻ ഇനി മണിക്കൂറുകള്‍ മാത്രമാണ് ബാക്കിയുള്ളത്. അമേരിക്കൻ സമയം ചൊവ്വാഴ്ച രാത്രി 8 മണിക്ക് മുമ്പ് (ഇന്ത്യൻ സമയം ബുധനാഴ്ച പുലർച്ചെ 5.30) കരാറില്‍ ഒപ്പിടണമെന്നാണ് അന്ത്യശാസനം. ഈ അന്ത്യശാസനം ഇറാൻ പൂർണ്ണമായും തള്ളിക്കളഞ്ഞു. നയതന്ത്ര നീക്കങ്ങള്‍ക്കുള്ള എല്ലാ വാതിലുകളും അടച്ചതായി ഇറാൻ വിദേശകാര്യ മന്ത്രാലയം വ്യക്തമാക്കി.

ഫെബ്രുവരി 28-ന് ആരംഭിച്ച അമേരിക്ക-ഇസ്രായേല്‍ സംയുക്ത ആക്രമണം ആറാഴ്ച പിന്നിടുമ്പോഴും കൂടുതല്‍ രൂക്ഷമാകുകയാണ്. ഹോർമുസ് കടലിടുക്ക് ഇറാൻ അടച്ചതോടെ ആഗോള ക്രൂഡോയില്‍ വിതരണം തടസ്സപ്പെടുകയും ലോകരാജ്യങ്ങള്‍ കടുത്ത സാമ്പത്തിക പ്രതിസന്ധിയിലാവുകയും ചെയ്തിരുന്നു.

ഇറാനെ ഒരിക്കലും തിരിച്ചുവരാനാകാത്ത വിധം നശിപ്പിക്കുമെന്നും ഊർജ്ജ നിലയങ്ങളും പാലങ്ങളും തകർക്കുമെന്നുമുള്ള ട്രംപിന്റെ ഭീഷണിക്ക് ഇറാൻ കടുത്ത ഭാഷയില്‍ മറുപടി നല്‍കി:

ഇറാന്റെ അടിസ്ഥാന സൗകര്യങ്ങളെ ലക്ഷ്യമിട്ടാല്‍ പശ്ചിമേഷ്യയിലെ അമേരിക്കൻ സഖ്യകക്ഷികളുടെ ജലശുദ്ധീകരണ പ്ലാന്റുകളും എണ്ണ-വാതക കേന്ദ്രങ്ങളും ആക്രമിക്കുമെന്ന് ഇറാൻ മുന്നറിയിപ്പ് നല്‍കി. മേഖലയിലെ യുഎസ് കമ്പനികളുടെ കേന്ദ്രങ്ങളും തങ്ങളുടെ ലക്ഷ്യ പട്ടികയിലുണ്ടെന്ന് ഇറാൻ വ്യക്തമാക്കി. പശ്ചിമേഷ്യയിലെ സംഘർഷം ലോകമഹായുദ്ധത്തിന്റെ വക്കിലെത്തി നില്‍ക്കെ, വരും മണിക്കൂറുകള്‍ ആഗോള രാഷ്ട്രീയത്തില്‍ അതീവ നിർണ്ണായകമാണ്.

Story Summary:
Iran has officially terminated all diplomatic communication and negotiations with the United States following President Donald Trump's threat to “end the Iranian civilization tonight.” Rejecting Trump's ultimatum to reopen the Strait of Hormuz by 8 PM US time (5:30 AM IST Wednesday), Tehran declared it would no longer engage via direct or indirect channels. Iran also warned that any attack on its infrastructure would result in retaliatory strikes against US allies’ desalination plants, oil hubs, and American corporate interests in the region.