എന്നാല്‍ കോർണല്‍ സർവ്വകലാശാലയിലെ കാള്‍ സാഗൻ ഇൻസ്റ്റിറ്റ്യൂട്ടിലെ പ്രൊഫസർ ലിസ കല്‍റ്റെനെഗറുടെ നേതൃത്വത്തിലുള്ള ഗവേഷകസംഘം ഈ രംഗത്ത് നിർണ്ണായകമായ കണ്ടെത്തല്‍ നടത്തിയിരിക്കുകയാണ്.(Scientists search for signs of life beyond Earth, 45 45 Earth-Like Planets discovered)

സൗരയൂഥത്തിന് പുറത്തുള്ള ആറായിരത്തിലധികം ഗ്രഹങ്ങളെക്കുറിച്ചുള്ള വിവരങ്ങള്‍ വിശകലനം ചെയ്ത ഗവേഷകർ, അവയില്‍ 45 ഗ്രഹങ്ങള്‍ പാറകള്‍ നിറഞ്ഞതാണെന്നും അവയുടെ നക്ഷത്രങ്ങളില്‍ നിന്നുള്ള ‘വാസയോഗ്യമായ മേഖലയില്‍’ സ്ഥിതി ചെയ്യുന്നവയാണെന്നും കണ്ടെത്തി. യൂറോപ്യൻ സ്പേസ് ഏജൻസിയുടെ ഗയ മിഷനില്‍ നിന്നും നാസയുടെ എക്സോപ്ലാനറ്റ് ആർക്കൈവില്‍ നിന്നുമുള്ള വിവരങ്ങളാണ് ഗവേഷണത്തിനായി ഉപയോഗിച്ചത്.

ഓരോ ഗ്രഹത്തിനും അതിന്റെ നക്ഷത്രത്തില്‍ നിന്ന് എത്രത്തോളം ഊർജ്ജം ലഭിക്കുന്നുണ്ടെന്ന് സംഘം കണക്കാക്കി. ഉപരിതലത്തില്‍ ദ്രവരൂപത്തില്‍ വെള്ളം നിലനില്‍ക്കാൻ ഈ ഊർജ്ജത്തിന്റെ അളവ് നിർണ്ണായകമാണ്. നമ്മുടെ സൗരയൂഥത്തില്‍ ഭൂമി വാസയോഗ്യമായ മേഖലയുടെ മധ്യഭാഗത്താണെങ്കില്‍, ശുക്രൻ ഈ മേഖലയുടെ ഉള്ളിലും ചൊവ്വ പുറം അതിർത്തിയിലുമാണ്. ഇതേ മാനദണ്ഡങ്ങള്‍ മറ്റ് നക്ഷത്രയൂഥങ്ങളില്‍ പ്രയോഗിച്ചപ്പോഴാണ് 45 ഗ്രഹങ്ങളെ കണ്ടെത്തിയത്. ഇതില്‍ 24 ഗ്രഹങ്ങള്‍ ജീവൻ നിലനില്‍ക്കാൻ ഏറ്റവും അനുയോജ്യമായ സാഹചര്യമുള്ളവയാണെന്ന് ഗവേഷകർ കരുതുന്നു.

ഭൂമിയില്‍ നിന്ന് 40 പ്രകാശവർഷം അകലെയുള്ള ചുവന്ന കുള്ളൻ നക്ഷത്രത്തെ വലംവെക്കുന്ന ട്രാപ്പിസ്റ്റ്-1 ഗ്രഹങ്ങളാണ് പട്ടികയില്‍ പ്രധാനപ്പെട്ടവ. ഭൂമിക്ക് സമാനമായ TRAPPIST-1 e, TOI-715 b എന്നിവയെക്കുറിച്ച്‌ പഠനത്തിന്റെ സഹരചയിതാവായ ഗില്ലിസ് ലോറി പ്രത്യേകം പരാമർശിക്കുന്നുണ്ട്. ഇവ കൂടാതെ പ്രോക്സിമ സെന്റോറി ബി, LHS 1140 b എന്നിവയും ശ്രദ്ധേയമായ സ്ഥാനാർത്ഥികളാണ്. ജെയിംസ് വെബ് സ്‌പേസ് ടെലിസ്‌കോപ്പ്, എക്‌സ്‌ട്രീമിലി ലാർജ് ടെലിസ്‌കോപ്പ്, ഹാബിറ്റബിള്‍ വേള്‍ഡ്‌സ് ഒബ്‌സർവേറ്ററി തുടങ്ങിയ അത്യാധുനിക സംവിധാനങ്ങള്‍ ഉപയോഗിച്ച്‌ ഈ ഗ്രഹങ്ങളെ സൂക്ഷ്മമായി നിരീക്ഷിച്ചുവരികയാണ്. ഒരു ഗ്രഹം വാസയോഗ്യമായ മേഖലയില്‍ സ്ഥിതി ചെയ്യുന്നു എന്നത് അവിടെ ജീവനുണ്ടെന്ന് ഉറപ്പിക്കാൻ മതിയായ തെളിവല്ലെങ്കിലും, അന്യഗ്രഹ ജീവനായുള്ള അന്വേഷണം ആരംഭിക്കേണ്ടത് ഇവിടെ നിന്നാണെന്ന് ശാസ്ത്രലോകം വിശ്വസിക്കുന്നു.