ന്യൂഡല്ഹി: ചന്ദ്രന്റെ ദക്ഷിണ ധ്രുവ മേഖലയില് ഉപരിതലത്തിനടിയില് മഞ്ഞിന്റെ സാന്നിധ്യമുണ്ടെന്നതിന് ശക്തമായ ശാസ്ത്രീയ തെളിവുകള് കണ്ടെത്തി ഐഎസ്ആർഒ (ISRO Detects Subsurface Ice Moon ).
ചന്ദ്രയാൻ-2 പേടകത്തിലെ ‘ഡ്യുവല് ഫ്രീക്വൻസി സിന്തറ്റിക് അപ്പർച്ചർ റഡാർ’ എന്ന അത്യാധുനിക മൈക്രോവേവ് ഇമേജിംഗ് ഉപകരണം അയച്ച വിവരങ്ങള് വിശകലനം ചെയ്താണ് ശാസ്ത്രജ്ഞർ ഈ നിർണ്ണായക കണ്ടെത്തല് നടത്തിയത്. ചന്ദ്രന്റെ ധ്രുവങ്ങളില് സൂര്യപ്രകാശം ഒട്ടുമേ പതിക്കാത്തതും മൈനസ് 248 ഡിഗ്രി സെല്ഷ്യസ് വരെ കടുത്ത തണുപ്പുള്ളതുമായ ‘ഡബ്ലി ഷാഡോഡ്’ ക്രേറ്ററുകളെ (ഗർത്തങ്ങള്) കേന്ദ്രീകരിച്ചായിരുന്നു ഈ പഠനം. അത്യാധുനിക റഡാർ പോളാരിമെട്രിക് രീതികള് ഉപയോഗിച്ച് നടത്തിയ നിരീക്ഷണത്തില് ഇത്തരത്തിലുള്ള നാല് പ്രധാന ഗർത്തങ്ങളുടെ ഉള്ഭാഗത്ത് ഉപരിതലത്തിന് താഴെയായി വലിയ തോതില് ജലാംശം മഞ്ഞിന്റെ രൂപത്തില് അടിഞ്ഞുകൂടിയിട്ടുണ്ടെന്നാണ് ഐഎസ്ആർഒ വ്യക്തമാക്കുന്നത്.
ഇതില് ഫൗസ്റ്റിനി ഗർത്തത്തിനുള്ളിലെ 1.1 കിലോമീറ്റർ വീതിയുള്ള ഒരു പ്രത്യേക ഗർത്തത്തിലാണ് മഞ്ഞിന്റെ സാന്നിധ്യം ഏറ്റവും ശക്തമായി കണ്ടെത്തിയിട്ടുള്ളത്. ഇവിടുത്തെ റഡാർ സിഗ്നലുകളിലെ വ്യതിയാനങ്ങള്ക്ക് പുറമെ, ഉല്ക്കാപതനം മൂലം മഞ്ഞുപാളികള്ക്ക് ഇളക്കം തട്ടുമ്പോള് ഉണ്ടാകുന്ന സവിശേഷമായ ഉപരിതല ഘടനയും ഇതിന് തെളിവായി ശാസ്ത്രജ്ഞർ ചൂണ്ടിക്കാണിക്കുന്നു. 2019 ജൂലൈ 22-ന് വിക്ഷേപിച്ച ചന്ദ്രയാൻ-2 ദൗത്യത്തിന്റെ ലാൻഡർ പരാജയപ്പെട്ടെങ്കിലും, ഇപ്പോഴും ചന്ദ്രനെ വലംവെയ്ക്കുന്ന ഓർബിറ്റർ നല്കുന്ന വിലപ്പെട്ട വിവരങ്ങളാണ് ഈ വലിയ വിജയത്തിന് പിന്നില്. 2023-ല് ചന്ദ്രയാൻ-3 ദൗത്യത്തിലൂടെ ദക്ഷിണ ധ്രുവത്തില് വിജയകരമായി ലാൻഡ് ചെയ്യുന്ന ആദ്യ രാജ്യമായി ഇന്ത്യ മാറിയിരുന്നു. ചന്ദ്രനിലെ ജലസ്രോതസ്സുകളുടെ സാന്നിധ്യം കൃത്യമായി മനസ്സിലാക്കാൻ സഹായിക്കുന്ന ഈ പുതിയ കണ്ടെത്തല്, ഭാവിയിലെ മനുഷ്യനിയന്ത്രിത ചന്ദ്രദൗത്യങ്ങള്ക്കും അവിടെയുള്ള വിഭവങ്ങള് ഉപയോഗപ്പെടുത്തുന്നതിനും (ISRU) ആഗോളതലത്തില് തന്നെ വലിയ വഴിത്തിരിവാകും.
Summary: ISRO has detected strong indications of subsurface ice in the lunar South Polar Region using data from the Chandrayaan-2 orbiter’s DFSAR radar. The study focused on permanently shadowed, extremely cold craters, highlighting a 1.1 km-wide crater inside the Faustini crater with significant ice-bearing characteristics. These findings offer crucial insights for future lunar landing missions and in-situ resource utilization activities on the Moon.