വിസ പുതുക്കലുകള്‍ക്ക് വൻതുക അധികമായി നല്‍കേണ്ടിവരുന്ന ഈ പുതിയ നീക്കം അമേരിക്കയിലുള്ള ആയിരക്കണക്കിന് ഇന്ത്യൻ തൊഴിലാളികളെയും വൻകിട ഐ.ടി കമ്പനികളെയുമാണ് ഏറ്റവും കൂടുതല്‍ ബാധിക്കുക.

ഡിപ്പാർട്ട്മെന്റ് ഓഫ് ഹോംലാന്റ് സെക്യൂരിറ്റി (DHS), കസ്റ്റംസ് ആൻഡ് ബോർഡർ പ്രൊട്ടക്ഷൻ (CBP) എന്നിവർ ചേർന്ന് നിർദ്ദേശിച്ച ‘9-11 റെസ്‌പോണ്‍സ് ആൻഡ് ബയോമെട്രിക് എൻട്രി-എക്‌സിറ്റ് ഫീസ്’ (9-11 Response and Biometric Entry-Exit Fee) ഇനിമുതല്‍ വിസ കാലാവധി നീട്ടുമ്പോഴും ഈടാക്കാനാണ് ധാരണ. നിലവില്‍ പുതിയ വിസ അപേക്ഷകള്‍ക്കും കമ്പനി മാറുമ്പോഴും മാത്രമായിരുന്നു ഈ ഫീസ് നല്‍കേണ്ടിയിരുന്നത്.

50-ല്‍ കൂടുതല്‍ ജീവനക്കാരുള്ളതും അതില്‍ 50 ശതമാനത്തിലധികം പേർ എച്ച്‌-1ബി, എല്‍-1 വിസകളില്‍ ജോലി ചെയ്യുന്നതുമായ കമ്പനികളെയാണ് ഇത് പ്രധാനമായും ബാധിക്കുക. എച്ച്‌-1ബി വിസയ്ക്ക് 4,000 ഡോളറും എല്‍-1 വിസയ്ക്ക് 4,500 ഡോളറുമാണ് അധികമായി അടയ്ക്കേണ്ടിവരിക. യു.എസ് സിറ്റിസണ്‍ഷിപ്പ് ആൻഡ് ഇമിഗ്രേഷൻ സർവീസസിന്റെ (USCIS) കണക്കുകള്‍ പ്രകാരം എച്ച്‌-1ബി വിസ പുതുക്കുന്നവരില്‍ 77 ശതമാനത്തിലധികവും ഇന്ത്യക്കാരായതിനാല്‍ ടെക് മേഖലയിലെ പ്രമുഖ കമ്പനികള്‍ക്ക് ഇത് വലിയ സാമ്പത്തിക ഭാരമായി മാറും. വരും ആഴ്ചകളില്‍ തന്നെ ഇത് സംബന്ധിച്ച അന്തിമ വിജ്ഞാപനം പുറത്തിറങ്ങുമെന്നാണ് പ്രതീക്ഷിക്കുന്നത്.

Story Summary:
The US administration is set to impose the 9-11 Response and Biometric Entry-Exit Fee on H-1B and L-1 visa extensions. This policy change heavily impacts Indian IT professionals and tech companies, increasing visa renewal costs for firms with a majority foreign workforce.