26 വയസ്സുള്ള യുവതിയെ സ്വന്തം ഭർത്താവ് രണ്ട് സുഹൃത്തുക്കളുടെ സഹായത്തോടെ 50,000 രൂപയ്ക്ക് വില്‍ക്കുകയായിരുന്നു. തുടർന്ന് ദിവസങ്ങളോളം ക്രൂരമായ ലൈംഗിക പീഡനങ്ങള്‍ക്ക് ഇരയായ യുവതിയെ ഒടുവില്‍ പോലീസ് എത്തിയാണ് രക്ഷപ്പെടുത്തിയത്. സംഭവത്തില്‍ യുവതിയുടെ ഭർത്താവ് ഉള്‍പ്പെടെ ആറ് പേരെ പോലീസ് അറസ്റ്റ് ചെയ്തു.

വടക്കൻ ഗുജറാത്തിലെ പാലൻപൂരില്‍ സാധാരണ രീതിയില്‍ രജിസ്റ്റർ ചെയ്ത ഒരു 'മാൻ മിസ്സിംഗ്' (കാണാതാകല്‍) പരാതിയെക്കുറിച്ച്‌ നടത്തിയ അന്വേഷണമാണ് ഒടുവില്‍ മനുഷ്യക്കടത്തിന്റെ വൻ ചുരുളഴിച്ചത്. 12 വർഷമായി യുവതിയുടെ ഭർത്താവായിരുന്ന മുപ്പതുകാരനാണ് ക്രൂരമായ ഈ ചതിക്ക് പിന്നില്‍. ഭാര്യയെ ഒഴിവാക്കി മറ്റൊരു സ്ത്രീയെ വീട്ടിലേക്ക് കൊണ്ടുവരാനുള്ള പദ്ധതിയുടെ ഭാഗമായാണ് പ്രതി സുഹൃത്തുക്കളുമായി ചേർന്ന് ഈ ഗൂഢാലോചന നടത്തിയത്. ഭർത്താവിന് തന്നോട് വെറുപ്പായിരുന്നുവെന്നും മറ്റൊരു സ്ത്രീയെ കൊണ്ടുവരാൻ തന്നെ നിരന്തരം പീഡിപ്പിച്ചിരുന്നതായും ഇരയായ യുവതി പോലീസിന് മൊഴി നല്‍കി.

കുറ്റകൃത്യം മറയ്ക്കാൻ മിസ്സിംഗ് പരാതി; പൊലീസിന് സംശയം
കുറ്റകൃത്യം മറച്ചുവെക്കാനായി ഭാര്യ ആരെയും അറിയിക്കാതെ വീടുവിട്ടുപോയെന്ന് കാണിച്ച്‌ മെയ് 11-ന് ഭർത്താവ് തന്നെ പാലൻപൂർ വെസ്റ്റ് പോലീസ് സ്റ്റേഷനില്‍ പരാതി നല്‍കിയിരുന്നു. എന്നാല്‍ യുവതി മൊബൈല്‍ ഫോണ്‍ ഉപയോഗിക്കാത്ത ആളായിരുന്നിട്ടും കാണാതായി എന്ന പരാതിയില്‍ പോലീസിന് സംശയം തോന്നി. തുടർന്ന് ഭർത്താവിനെ വിശദമായി ചോദ്യം ചെയ്തതോടെ ഇയാള്‍ പതറുകയും ഒളിവില്‍ പോവുകയും ചെയ്തു. തൊട്ടുപിന്നാലെ, ഭാര്യവീട്ടുകാർ മകനെ ഭീഷണിപ്പെടുത്തുന്നുണ്ടെന്നും അവനെ കാണാനില്ലെന്നും കാണിച്ച്‌ ഇയാളുടെ പിതാവ് മറ്റൊരു പരാതി നല്‍കി. ഈ പരാതികളിലെ പരസ്പര വൈരുദ്ധ്യം മനസ്സിലാക്കിയ പോലീസ് അന്വേഷണം ഊർജിതമാക്കുകയായിരുന്നു.

പോലീസ് അന്വേഷണത്തില്‍ കണ്ടെത്തിയ ഞെട്ടിക്കുന്ന വിവരങ്ങള്‍ ഇങ്ങനെയാണ്: മെയ് 10-ന് ഭർത്താവിന്റെ രണ്ട് സുഹൃത്തുക്കള്‍ ചേർന്ന് തന്ത്രപൂർവ്വം യുവതിയെ ഒരു ഓട്ടോറിക്ഷയില്‍ കയറ്റി ഒരു ഫ്ലാറ്റിലെത്തിച്ചു. അവിടെവെച്ച്‌ അതിലൊരാള്‍ യുവതിയെ രണ്ടുതവണ ബലാത്സംഗം ചെയ്തു. പിന്നീട് മറ്റൊരു ഗ്രാമത്തിലെ കുടുംബത്തിന് 1.5 ലക്ഷം രൂപയ്ക്ക് യുവതിയെ കൈമാറാൻ ഇടപാടുറപ്പിച്ചു. ഇതില്‍ 50,000 രൂപ അഡ്വാൻസായി വാങ്ങിയാണ് യുവതിയെ അവർക്ക് കൈമാറിയത്. തുടർന്ന്, വാങ്ങിയ ആളുകളില്‍ ഒരാള്‍ യുവതിയെ വീട്ടില്‍ പൂട്ടിയിട്ട് ഒരാഴ്ചയോളം നിരന്തരം പീഡിപ്പിച്ചു.

മുൻപ് വിവാഹിതരായ രണ്ട് സ്ത്രീകളെയും കാണാതായിട്ടുണ്ട്
മെയ് 21-നാണ് പോലീസ് സംഘം കൃത്യമായി ഇടപെട്ട് യുവതിയെ ഈ നരകയാതനയില്‍ നിന്നും രക്ഷപ്പെടുത്തിയത്. അറസ്റ്റിലായ ഭർത്താവ് മുൻപും സമാനമായ വഞ്ചനകള്‍ നടത്തിയിട്ടുണ്ടെന്ന് അന്വേഷണത്തില്‍ തെളിഞ്ഞിട്ടുണ്ട്. ഇയാള്‍ മുൻപ് വിവാഹിതരായ രണ്ട് സ്ത്രീകളെ പ്രണയം നടിച്ച്‌ കൂടെക്കൂട്ടുകയും, പിന്നീട് ഈ രണ്ട് സ്ത്രീകളെയും ഇതേപോലെ നിഗൂഢമായ സാഹചര്യത്തില്‍ കാണാതാവുകയും ചെയ്തിട്ടുണ്ട്. ഇതിനെക്കുറിച്ചും പോലീസ് ഇപ്പോള്‍ വിശദമായി അന്വേഷിക്കുന്നുണ്ട്.

Story Summary: In a shocking incident in Palanpur, Gujarat, a 30-year-old man sold his 26-year-old wife for ₹50,000 with the help of his friends to remarry. The woman, who was repeatedly raped and locked up for a week, was rescued by the police on May 21. Six people, including the husband, have been arrested.