ആരോപണങ്ങള്‍ നേരിടുന്ന ഉദ്യോഗസ്ഥന് സ്ഥാനക്കയറ്റം നല്‍കുന്നതില്‍ എന്തിനാണ് ഇത്ര തിടുക്കമെന്ന് കോടതി ചോദിച്ചു (S Sreejith DGP Promotion Kerala High Court Criticism). സ്ഥാനക്കയറ്റവുമായി ബന്ധപ്പെട്ട ഹർജി കോടതിയുടെ പരിഗണനയിലിരിക്കെ സർക്കാർ വേഗത്തില്‍ തീരുമാനമെടുത്തതിലും കോടതി അതൃപ്തി രേഖപ്പെടുത്തി.

എഡിജിപി റാങ്കിലുള്ള ഉദ്യോഗസ്ഥനെ ഡിജിപിയായി സ്ഥാനക്കയറ്റം നല്‍കുമ്പോള്‍ ആവശ്യമായ വിജിലൻസ് ക്ലിയറൻസ് ഉള്‍പ്പെടെയുള്ള നടപടിക്രമങ്ങള്‍ പാലിച്ചിട്ടില്ലെന്നാണ് കോടതിയുടെ പ്രാഥമിക നിരീക്ഷണം. നിലവിലെ ചട്ടങ്ങള്‍ക്കും നിർദേശങ്ങള്‍ക്കും വിരുദ്ധമായാണ് സ്ഥാനക്കയറ്റം നല്‍കിയതെന്നും കോടതി ചൂണ്ടിക്കാട്ടി.
എഡിജിപിയായിരിക്കെ മുൻകൂർ അനുമതിയില്ലാതെ വിദേശയാത്ര നടത്തിയെന്ന ആരോപണം എസ്. ശ്രീജിത്തിനെതിരെ നിലനില്‍ക്കുന്ന സാഹചര്യത്തിലാണ് സർക്കാർ അദ്ദേഹത്തിന് ഡിജിപി പദവിയിലേക്ക് സ്ഥാനക്കയറ്റം നല്‍കിയത്. ആരോപണങ്ങളുമായി ബന്ധപ്പെട്ട വിഷയങ്ങള്‍ നിലനില്‍ക്കുമ്പോള്‍ സ്ഥാനക്കയറ്റ തീരുമാനം എടുത്തതിന്റെ സാഹചര്യവും കോടതി ചോദ്യം ചെയ്തു.

എഡിജിപി എം.ആർ. അജിത് കുമാർ സസ്പെൻഷനിലായതോടെയാണ് ശ്രീജിത്തിന് സ്ഥാനക്കയറ്റത്തിന് അവസരം ലഭിച്ചതെന്നാണ് റിപ്പോർട്ടുകള്‍. നവകേരള സദസിനിടെ മുൻ മുഖ്യമന്ത്രി പിണറായി വിജയന്റെ ഗണ്‍മാൻമാരുമായി ബന്ധപ്പെട്ട കേസില്‍ ഇടപെട്ടെന്ന ആരോപണത്തെ തുടർന്നാണ് അജിത് കുമാറിനെ സസ്പെൻഡ് ചെയ്തത്.
അതേസമയം, ഡിജിപി റാങ്കിലേക്ക് സ്ഥാനക്കയറ്റം ലഭിച്ചെങ്കിലും എസ്. ശ്രീജിത്ത് നിലവില്‍ ജയില്‍മേധാവിയായുള്ള ചുമതലയില്‍ തന്നെ തുടരുമെന്നാണ് സർക്കാർ വൃത്തങ്ങള്‍ വ്യക്തമാക്കുന്നത്. സ്ഥാനക്കയറ്റ നടപടിയുമായി ബന്ധപ്പെട്ട ഹർജിയില്‍ ഹൈക്കോടതിയുടെ തുടർനിലപാട് നിർണായകമാകും.

Summary: The Kerala High Court has strongly criticised the state government's decision to promote prison chief S. Sreejith to the rank of DGP while allegations against him remain pending. The court questioned the urgency of the decision and raised concerns over whether mandatory vigilance clearance and other service rules were followed.