കൊച്ചി: മൂന്ന് മലയാളികള് ഉള്പ്പെടെ 16 ഇന്ത്യക്കാരടങ്ങിയ 26 നാവികരെ ഇക്വറ്റോറിയല് ഗിനിയ അന്യായമായി തടവില് വെച്ച കേസില് നാവികർക്ക് അന്താരാഷ്ട്ര കോടതിയുടെ ചരിത്രവിജയം (MT Heroic Idun ITLOS verdict 2026).
ജർമ്മനിയിലെ ഹാംബർഗ് ആസ്ഥാനമായി പ്രവർത്തിക്കുന്ന അന്താരാഷ്ട്ര സമുദ്ര നിയമ ട്രിബ്യൂണല് (ITLOS – International Tribunal for the Law of the Sea) ആണ് നാവികരെ മുഴുവൻ കുറ്റവിമുക്തരാക്കിക്കൊണ്ട് നിർണ്ണായക വിധി പുറപ്പെടുവിച്ചത്. നാവികരെ അന്യായമായി കസ്റ്റഡിയില് വെച്ചതിന് ഇക്വറ്റോറിയല് ഗിനിയ സർക്കാർ ഇവർക്ക് വൻ തുക നഷ്ടപരിഹാരം നല്കണമെന്നും കോടതി ഉത്തരവില് പറയുന്നു.
ഇതിനുപുറമെ, കേസിന്റെ ഭാഗമായി കപ്പല് കമ്പനി കെട്ടിവെച്ച 2 മില്യണ് യൂറോ (ഏകദേശം 18 കോടിയിലധികം രൂപ) ഉള്പ്പെടെയുള്ള തുക പൂർണ്ണമായും തിരികെ നല്കാനും ഇന്റർനാഷണല് ട്രിബ്യൂണല് ഉത്തരവിട്ടിട്ടുണ്ട്. അന്താരാഷ്ട്ര കപ്പല്ച്ചാല് നിയമങ്ങള് ലംഘിച്ചുവെന്നും ക്രൂഡോയില് കള്ളക്കടത്ത് നടത്താൻ ശ്രമിച്ചുവെന്നും ആരോപിച്ച് 2022 ഓഗസ്റ്റിലാണ് ‘എം.ടി. ഹീറോയിക് ഇഡുൻ’ (MT Heroic Idun) എന്ന എണ്ണക്കപ്പലും അതിലെ ജീവനക്കാരെയും ഇക്വറ്റോറിയല് ഗിനിയൻ സൈന്യം തടവിലാക്കിയത്. മാസങ്ങളോളം നീണ്ട അനിശ്ചിതത്വങ്ങള്ക്കും നയതന്ത്ര ചർച്ചകള്ക്കും ഒടുവില് 2023 ജൂണിലാണ് നാവികർ മോചിതരായി നാട്ടിലെത്തിയത്.
തുടർന്ന് കപ്പലിന്റെ പതാക രാജ്യമായ മാർഷല് ഐലൻഡ്സും ഇക്വറ്റോറിയല് ഗിനിയയും തമ്മില് അന്താരാഷ്ട്ര കോടതിയില് നിയമപോരാട്ടം തുടരുകയായിരുന്നു. കോടതി വിധി വന്നതിന് പിന്നാലെ, സത്യം തെളിയിക്കാൻ ഒപ്പം നിന്ന എല്ലാവർക്കും ഹൃദയം നിറഞ്ഞ നന്ദി അറിയിക്കുന്നതായി കപ്പലിലെ ചീഫ് ഓഫീസറും കൊച്ചി സ്വദേശിയുമായ സനു ജോസ് പ്രതികരിച്ചു. ഒരു ഏകാധിപത്യ രാജ്യത്തിന്റെ കസ്റ്റഡിയില് ഇല്ലാത്ത കുറ്റം ചുമത്തി നേരിട്ട പീഡനങ്ങളും അന്യായമായ നടപടികളും ജീവിതത്തിലെ വലിയ വെല്ലുവിളിയായിരുന്നുവെന്നും ഒടുവില് നീതി നടപ്പിലായെന്നും അദ്ദേഹം വ്യക്തമാക്കി.
Story Summary: The International Tribunal for the Law of the Sea (ITLOS) has acquitted all 26 crew members, including 3 Malayalis, of the MT Heroic Idun who were wrongfully detained by Equatorial Guinea in August 2022. The court ordered Equatorial Guinea to pay compensation to the sailors and refund the €2 million deposit to the shipping company.