ബെയ്റൂട്ട്: ഹിസ്ബുള്ള തലവൻ നയീം ഖാസിമിന്റെ പേഴ്‌സണല്‍ സെക്രട്ടറിയും സഹോദരപുത്രനുമായ അലി യൂസഫ് ഹർഷിയെ ബെയ്റൂട്ടില്‍ നടത്തിയ ആക്രമണത്തില്‍ വധിച്ചതായി ഇസ്രായേല്‍ പ്രതിരോധ സേന അറിയിച്ചു.

നയീം ഖാസമിന്റെ ഓഫിസ് കൈകാര്യം ചെയ്യുന്നതിലും സുരക്ഷ ഉറപ്പാക്കുന്നതിലും ഹർഷി നിർണ്ണായക പങ്ക് വഹിച്ചിരുന്നതായി ഇസ്രായേല്‍ സൈന്യം പ്രസ്താവനയില്‍ വ്യക്തമാക്കി.(Israel claims killing of Hezbollah chief Naim Qassem’s nephew and personal adviser Ali Yusuf Harshi)

ഇറാനും അമേരിക്കയും തമ്മില്‍ രണ്ടാഴ്ചത്തേക്ക് സൈനിക നടപടികള്‍ നിർത്തിവെക്കാൻ ധാരണയിലെത്തിയെങ്കിലും ലെബനനെച്ചൊല്ലിയുള്ള തർക്കം സങ്കീർണ്ണമായി തുടരുകയാണ്. വെടിനിർത്തല്‍ കരാറില്‍ ലെബനൻ ഉള്‍പ്പെട്ടിട്ടില്ലെന്നാണ് ഇസ്രായേല്‍ അവകാശപ്പെടുന്നത്. എന്നാല്‍ ഇറാൻ ഇത് നിഷേധിച്ചു. വിഷയത്തില്‍ ഇസ്രായേലിനെ പിന്തുണച്ച അമേരിക്ക, ഇരുപക്ഷവും തമ്മിലുള്ള “ന്യായമായ തെറ്റിദ്ധാരണ” എന്നാണ് ഇതിനെ വിശേഷിപ്പിച്ചത്.

വെടിനിർത്തല്‍ തീരുമാനത്തെ പിന്തുണയ്ക്കുന്നുവെങ്കിലും ലെബനൻ ഈ കരാറിന്റെ ഭാഗമല്ലെന്ന് ഇസ്രായേല്‍ പ്രധാനമന്ത്രി ബെഞ്ചമിൻ നെതന്യാഹു വ്യക്തമാക്കി. ടെലിവിഷൻ പ്രസംഗത്തിലൂടെയാണ് അദ്ദേഹം ഇക്കാര്യം അറിയിച്ചത്. “നമ്മുടെ വിരലുകള്‍ തോക്കിന്റെ ട്രിഗറിലാണ്. ആവശ്യമെന്ന് കണ്ടാല്‍ ഏത് നിമിഷവും പോരാട്ടം പുനരാരംഭിക്കാൻ സൈന്യം സജ്ജമാണ്,” നെതന്യാഹു മുന്നറിയിപ്പ് നല്‍കി. വെടിനിർത്തല്‍ ചർച്ചകള്‍ക്കിടയിലും വെറും 10 മിനിറ്റിനുള്ളില്‍ ലെബനനിലുടനീളം 100-ലധികം ലക്ഷ്യങ്ങളില്‍ ഇസ്രായേല്‍ സൈന്യം ആക്രമണം നടത്തി. തെക്കൻ ലെബനനിലെ ജനങ്ങളോട് പ്രദേശത്തുനിന്ന് ഒഴിഞ്ഞുപോകാന്‍ ഇസ്രായേല്‍ വ്യാഴാഴ്ചയും നിർദ്ദേശം നല്‍കിയിട്ടുണ്ട്. കൂടുതല്‍ ശക്തമായ ആക്രമണങ്ങള്‍ ഉണ്ടാകുമെന്നാണ് ഇസ്രായേല്‍ നല്‍കുന്ന സൂചന.