നരുവാമൂട് സ്വദേശി കിരണ്‍, വട്ടിയൂർക്കാവ് സ്വദേശി അനില്‍ എന്നിവരാണ് ഇന്ന് പൊലീസിന്റെ പിടിയിലായത്. ഇതോടെ കേസില്‍ ഇതുവരെ അറസ്റ്റിലായ സി.പി.എം-ഡിവൈഎഫ്‌ഐ പ്രവർത്തകരുടെ ആകെ എണ്ണം ഏഴായി. പിടിയിലായ പ്രതികളെ ഇന്ന് തന്നെ കോടതിയില്‍ ഹാജരാക്കുമെന്നാണ് പോലീസ് അറിയിക്കുന്നത്.

ബുധനാഴ്ച രാത്രിയോടെ ഡിവൈഎഫ്‌ഐ നേതാക്കള്‍ ഉള്‍പ്പെടെ അഞ്ച് പേരുടെ അറസ്റ്റ് പൊലീസ് രേഖപ്പെടുത്തിയിരുന്നു. കസ്റ്റഡിയിലുള്ള പ്രതികള്‍ക്ക് പുറമെ സംഭവത്തില്‍ കണ്ടാലറിയാവുന്ന 300 സി.പി.എം പ്രവർത്തകർക്കെതിരെയാണ് മ്യൂസിയം പൊലീസ് വധശ്രമം (Attempt to Murder) ഉള്‍പ്പെടെയുള്ള ഗുരുതരമായ വകുപ്പുകള്‍ ചുമത്തി എഫ്.ഐ.ആർ (FIR) രജിസ്റ്റർ ചെയ്തിരിക്കുന്നത്. കേസില്‍ നിലവില്‍ കുറച്ചുപേർക്കെതിരെ മാത്രമാണ് കടുത്ത നടപടിയെടുത്തിട്ടുള്ളതെങ്കിലും, അക്രമത്തിന്റെ വീഡിയോ ദൃശ്യങ്ങള്‍ പരിശോധിച്ച്‌ കൂടുതല്‍ പേരെ പ്രതിപ്പട്ടികയില്‍ ഉള്‍പ്പെടുത്താൻ സാധ്യതയുണ്ടെന്ന് പൊലീസ് വ്യക്തമാക്കി.

അതേസമയം, കേസില്‍ പ്രതികളായ സി.പി.എമ്മിന്റെ മുൻ നഗരസഭാ കൗണ്‍സിലർമാരായ ആറ്റുകാല്‍ ഉണ്ണി, ഐ.പി. ബിനു എന്നിവരെ കണ്ടെത്തുന്നതിനായി പൊലീസ് അന്വേഷണം ഊർജ്ജിതമാക്കി. ഒളിവില്‍ പോയ ഇരുവരെയും തിരഞ്ഞ് പൊലീസ് കഴിഞ്ഞ ദിവസം ഇവരുടെ വീടുകളില്‍ വ്യാപകമായ പരിശോധന നടത്തിയിരുന്നു.

മാരകായുധങ്ങളുമായി എത്തി “കൊല്ലെടാ” എന്ന് ആക്രോശിച്ചാണ് ജനക്കൂട്ടം തങ്ങളെ ആക്രമിച്ചതെന്ന് ഇഡി അസിസ്റ്റന്റ് ഡയറക്ടർ സനത് റെഡ്ഡി പൊലീസിന് മൊഴി നല്‍കിയിട്ടുണ്ട്. ആക്രമണത്തില്‍ ഇഡി ഉദ്യോഗസ്ഥനായ ഡിക്സൻ ഡേവിഡ്, ഡ്രൈവർ ശ്യാം എന്നിവർക്ക് പരിക്കേറ്റിരുന്നു. ഈ ആസൂത്രിത അക്രമത്തിന്റെ പൂർണ്ണ വിവരങ്ങള്‍ ഇഡി ആസ്ഥാനത്തെ ഡയറക്ടറേറ്റിന് ഉദ്യോഗസ്ഥർ ഇതിനകം കൈമാറിയിട്ടുണ്ട്.

Story Summary: Two more CPM activists, Kiran and Anil, have been arrested in the ED officials’ assault case in Thiruvananthapuram, bringing the total arrests to seven. Police also conducted raids at the residences of absconding former councilors Attukal Unni and I.P. Binu, who are facing attempt-to-murder charges.