ബുധനാഴ്ച അരങ്ങേറിയ അക്രമ സംഭവങ്ങളില്‍ സി.പി.എം ബോധപൂർവ്വം വലിയ രീതിയിലുള്ള കലാപശ്രമമാണ് നടത്തിയതെന്ന് ഡിജിപിയുടെ റിപ്പോർട്ടില്‍ വ്യക്തമാക്കുന്നു.

നഗരത്തില്‍ വലിയൊരു ക്രമസമാധാന തകർച്ചയും ചോരപ്പുഴയും ഒഴിവാക്കാനായത് പോലീസ് അതീവ സംയമനം പാലിച്ചതുകൊണ്ട് മാത്രമാണെന്ന് റിപ്പോർട്ട് സമർത്ഥിക്കുന്നു. അക്രമികള്‍ ഒളിച്ച സി.പി.എം പാർട്ടി ഓഫീസിനുള്ളിലേക്ക് പോലീസ് ഫോഴ്‌സ് കയറാതിരുന്നത് ബോധപൂർവ്വമാണെന്നും, ഓഫീസിനുള്ളില്‍ കയറി നടപടിയെടുത്തിരുന്നെങ്കില്‍ അത് സംസ്ഥാന വ്യാപകമായി വലിയ രീതിയിലുള്ള അക്രമങ്ങള്‍ക്കും കലാപങ്ങള്‍ക്കും വഴിവെക്കുമായിരുന്നുവെന്നും റിപ്പോർട്ടില്‍ പ്രത്യേകം എടുത്തുപറയുന്നുണ്ട്.

റിപ്പോർട്ട് കൈമാറുന്നതിന് മുന്നോടിയായി ഡിജിപി റവാഡ ചന്ദ്രശേഖറിന്റെ നേതൃത്വത്തിലുള്ള ഉന്നത പോലീസ് ഉദ്യോഗസ്ഥരുടെ സംഘം ആഭ്യന്തര മന്ത്രി രമേശ് ചെന്നിത്തലയുടെ ഔദ്യോഗിക വസതിയിലെത്തി നേരിട്ട് വിശദീകരണം നല്‍കിയിരുന്നു. ഇന്റലിജൻസ് ഐജി പി. വിജയൻ, മുഖ്യമന്ത്രിയുടെ സുരക്ഷാ ഉപദേഷ്ടാവും മുൻ ഡിജിപിയുമായ ഹേമചന്ദ്രൻ എന്നിവരും ഡിജിപിക്കൊപ്പമുണ്ടായിരുന്നു.

ബുധനാഴ്ച തലസ്ഥാന നഗരിയില്‍ വെച്ച്‌ കേന്ദ്ര ഏജൻസിക്ക് നേരെ പരസ്യമായ അക്രമം അരങ്ങേറിയിട്ടും അത് തടയുന്നതില്‍ പൊലീസിന് ഗുരുതരമായ വീഴ്ച സംഭവിച്ചുവെന്ന വിലയിരുത്തല്‍ ശക്തമാണ്. ഇത് ആഭ്യന്തര വകുപ്പിന് വലിയ നാണക്കേടായ പശ്ചാത്തലത്തിലാണ് ആഭ്യന്തര മന്ത്രി ഡിജിപിയില്‍ നിന്ന് അടിയന്തരമായി നേരിട്ട് വിശദീകരണം തേടിയത്.

ഇഡി ഉദ്യോഗസ്ഥർക്ക് നേരെ ആക്രമണമുണ്ടായതിന് തൊട്ടുപിന്നാലെ കേന്ദ്ര സർക്കാരും ഗവർണറും ആഭ്യന്തര വകുപ്പിനോട് അതീവ ഗൗരവത്തോടെ വിശദീകരണം ആവശ്യപ്പെട്ടിരുന്നു. ഇതിന് പിന്നാലെ ആഭ്യന്തര മന്ത്രിയും ഡിജിപിയും ഫോണില്‍ ഏറെ നേരം സംസാരിച്ച്‌ അടിയന്തര നടപടികള്‍ക്ക് നിർദ്ദേശം നല്‍കിയിരുന്നു. ഇതിന്റെ തുടർച്ചയായാണ് ഇപ്പോള്‍ ഔദ്യോഗിക റിപ്പോർട്ട് സമർപ്പിച്ചിരിക്കുന്നത്. കേസില്‍ വധശ്രമം ഉള്‍പ്പെടെയുള്ള കടുത്ത വകുപ്പുകള്‍ ചുമത്തിയാണ് പോലീസ് സി.പി.എം-ഡിവൈഎഫ്‌ഐ പ്രവർത്തകർക്കെതിരെ കേസ് എടുത്തിട്ടുള്ളത്.

Story Summary: DGP Rawada Chandrasekhar submitted an official report to Home Minister Ramesh Chennithala regarding the attack on ED officials at Opposition Leader Pinarayi Vijayan’s residence. The report stated that CPM attempted to incite a riot and police restraint, including avoiding entering the party office, prevented further escalation. This follows serious concerns raised by the Central Government and the Governor.