ഇന്ത്യയിലെ ക്വിക്ക് കൊമേഴ്‌സ് ഡെലിവറി സംവിധാനങ്ങളുടെ അതിശയിപ്പിക്കുന്ന വേഗതയെ പ്രശംസിച്ച്‌ യുക്രൈൻ സ്വദേശിയായ ഉള്ളടക്ക സ്രഷ്ടാവ് സാൻഡ്ര ഓണ്‍ പങ്കുവെച്ച ഇൻസ്റ്റാഗ്രാം കുറിപ്പ് തരംഗമാകുന്നു (Ukrainian Woman Praises India Fast Delivery).

ഡല്‍ഹിയില്‍ താമസിക്കുന്ന തനിക്ക് ആവശ്യമായ പലചരക്ക് സാധനങ്ങളും വീട്ടുസാധനങ്ങളും വെറും ആറ് മിനിറ്റിനുള്ളില്‍ വീട്ടുപടിക്കല്‍ എത്തിയതായാണ് സാൻഡ്ര വ്യക്തമാക്കുന്നത്. കനത്ത ട്രാഫിക് ഉള്ളപ്പോള്‍ ഡല്‍ഹിയുടെ ഒരു ഭാഗത്തുനിന്ന് മറുഭാഗത്തേക്ക് സഞ്ചരിക്കാൻ മണിക്കൂറുകള്‍ എടുക്കുമെന്നിരിക്കെ, ഇത്രയും ചുരുങ്ങിയ സമയത്തിനുള്ളില്‍ സാധനങ്ങള്‍ എത്തിക്കുന്നത് എങ്ങനെയാണെന്ന് തനിക്ക് ഇപ്പോഴും മനസ്സിലാകുന്നില്ലെന്നും ഇവർ അത്ഭുതത്തോടെ പങ്കുവെക്കുന്നു. ഭക്ഷണം പാകം ചെയ്യുന്നതിനിടയില്‍ ഒരു ചേരുവ കുറവാണെന്ന് കണ്ട് ഓർഡർ ചെയ്തപ്പോള്‍, പാചകം പൂർത്തിയാകുന്നതിന് മുൻപ് തന്നെ സാധനം കയ്യില്‍ കിട്ടിയ അനുഭവം അവർ വിവരിക്കുന്നുണ്ട്.

യൂറോപ്പില്‍ എട്ട് വർഷത്തോളം ജീവിച്ച തന്റെ മുൻകാല അനുഭവങ്ങളുമായി താരതമ്യം ചെയ്താണ് സാൻഡ്ര ഇന്ത്യയിലെ സേവനങ്ങളെ വാനോളം പുകഴ്ത്തിയത്. യുക്രൈനിലെ കിയവ് പോലുള്ള വലിയ നഗരങ്ങളെ മാറ്റിവെച്ചാല്‍ പോലും, വലിപ്പം കുറഞ്ഞ പോളണ്ടിലെ വാർസോ നഗരത്തില്‍ ഒക്കെ പലചരക്ക് സാധനങ്ങള്‍ ഡെലിവറി ചെയ്യാൻ കുറഞ്ഞത് 20 മുതല്‍ 30 മിനിറ്റ് വരെ സമയമെടുക്കുമെന്നും അവിടുത്തെ ഉയർന്ന ഡെലിവറി നിരക്കുകള്‍ സഹിക്കാനാകില്ലെന്നും സാൻഡ്ര കുറ്റപ്പെടുത്തുന്നു. യൂറോപ്പില്‍ കാത്തിരിപ്പ് സമയം കൂടുതലായതിനാല്‍ പലപ്പോഴും കടകളില്‍ നേരിട്ട് പോയി വാങ്ങേണ്ടി വരാറുണ്ടെങ്കില്‍, ഇന്ത്യയില്‍ ഡെലിവറി വളരെ എളുപ്പമായതിനാല്‍ താൻ ഇപ്പോള്‍ വീടിന് പുറത്തിറങ്ങാറേയില്ലെന്നും അവർ കൂട്ടിച്ചേർത്തു. ഇന്ത്യയിലെ ബ്ലിങ്കിറ്റ് (Blinkit), ഇൻസ്റ്റാമാർട്ട് തുടങ്ങിയ കമ്പനികള്‍ നഗരങ്ങളിലെ വിവിധ ജനവാസ മേഖലകള്‍ക്ക് തൊട്ടടുത്തായി സ്ഥാപിച്ചിട്ടുള്ള 'ഡാർക്ക് സ്റ്റോറുകള്‍' (Micro-Warehouses) വഴിയാണ് ഇത്രയും വേഗത്തില്‍ ഡെലിവറി സാധ്യമാക്കുന്നതെന്ന് ഐടി വിദഗ്ദ്ധർ ഈ പോസ്റ്റിന് താഴെ മറുപടിയായി വിശദീകരിക്കുന്നുണ്ട്.