ന്യൂഡല്‍ഹി: വെറ്ററൻ താരങ്ങളും ലോകോത്തര ക്രിക്കറ്റർമാരും അണിനിരന്ന ഐ.പി.എല്‍ സീസണില്‍ അവാർഡുകള്‍ വാരിക്കൂട്ടി രാജസ്ഥാൻ റോയല്‍സിന്റെ പതിനഞ്ചുകാരൻ കൗമാരതാരം വൈഭവ് സൂര്യവംശി ചരിത്രം കുറിച്ചു (Vaibhav Suryavanshi IPL Awards Orange Cap).

ടൂർണമെന്റിലെ മികച്ച താരം, എമേർജിങ് പ്ലെയർ, ഏറ്റവും കൂടുതല്‍ റണ്‍സ് നേടുന്നവർക്കുള്ള ഓറഞ്ച് ക്യാപ്, സൂപ്പർ സ്‌ട്രൈക്കർ, സീസണില്‍ കൂടുതല്‍ സിക്‌സറുകള്‍ പറത്തിയ താരം എന്നിങ്ങനെ അഞ്ച് പ്രധാന പുരസ്‌കാരങ്ങളാണ് ഈ ഇടംകയ്യൻ ബാറ്റർ അടിച്ചെടുത്തത്.

ഫൈനല്‍ മത്സരത്തില്‍ ഗുജറാത്ത് ടൈറ്റൻസ് താരങ്ങളായ ശുഭ്മാൻ ഗില്ലും സായ് സുദർശനും നേരത്തെ പുറത്തായതോടെയാണ് ഓറഞ്ച് ക്യാപ് വൈഭവ് ഉറപ്പിച്ചത്. ഐപിഎല്‍ ചരിത്രത്തില്‍ ഓറഞ്ച് ക്യാപ് സ്വന്തമാക്കുന്ന ഏറ്റവും പ്രായം കുറഞ്ഞ താരമെന്ന ബഹുമതി ഇനി വൈഭവിന് സ്വന്തമാണ്. സീസണിലെ 16 മത്സരങ്ങളില്‍ നിന്ന് 237.31 എന്ന അവിശ്വസനീയമായ സ്‌ട്രൈക്ക് റേറ്റില്‍ 776 റണ്‍സാണ് താരം അടിച്ചുകൂട്ടിയത്. ഈ അസാധാരണ പ്രകടനത്തോടെ ഒട്ടനവധി റെക്കോഡുകളാണ് വൈഭവ് തന്റെ പേരില്‍ മാറ്റിയെഴുതിയത്. ഈ സീസണില്‍ മാത്രം 72 സിക്സറുകള്‍ പറത്തിയ താരം, 2012-ല്‍ 59 സിക്സറുകള്‍ നേടിയ ഇതിഹാസ താരം ക്രിസ് ഗെയ്‌ലിന്റെ റെക്കോഡാണ് തകർത്തത്. കൂടാതെ, ഐപിഎല്‍ ചരിത്രത്തില്‍ നേരിട്ട പന്തുകളുടെ അടിസ്ഥാനത്തില്‍ ഏറ്റവും വേഗത്തില്‍ 1000 റണ്‍സ് തികയ്ക്കുന്ന താരമെന്ന റെക്കോഡും വൈഭവ് സ്വന്തമാക്കി. വെറും 440 പന്തുകളില്‍ നിന്നാണ് താരം ഈ നേട്ടത്തിലെത്തിയത്. ഇതിലൂടെ 545 പന്തുകളില്‍ നിന്ന് 1000 റണ്‍സ് നേടിയ ആന്ദ്രെ റസലിന്റെ റെക്കോഡാണ് തകർന്നത്.

ഇന്നിങ്സുകളുടെ അടിസ്ഥാനത്തില്‍ 23 ഇന്നിങ്സുകളില്‍ നിന്നാണ് വൈഭവ് ഈ നാഴികക്കല്ല് പിന്നിട്ടത്. റോയല്‍ ചലഞ്ചേഴ്‌സ് ബംഗളൂരു (RCB) കിരീടം നേടിയ ഫൈനല്‍ മത്സരത്തിന് ശേഷം ഇതിഹാസ താരം വിരാട് കോലി വൈഭവിനെ നേരിട്ട് കണ്ട് ഹസ്തദാനം നല്‍കുകയും ഏറെ നേരം സംസാരിച്ച്‌ പ്രശംസിക്കുകയും ചെയ്തു. ബിസിസിഐ സെക്രട്ടറി ദേവജിത്ത് സൈക്കിയയും താരത്തെ അഭിനന്ദിച്ചുകൊണ്ട് രംഗത്തെത്തുകയും, വൈഭവിനെ ക്രിക്കറ്റിന്റെ ഏറ്റവും ഉയർന്ന തലങ്ങളില്‍ എത്തിക്കാൻ ബോർഡിന്റെ ഭാഗത്തുനിന്നും എല്ലാവിധ പിന്തുണയും ഉറപ്പുനല്‍കുകയും ചെയ്തു.

Summary: Rajasthan Royals’ 15-year-old prodigy Vaibhav Suryavanshi dominated the IPL awards by winning five categories, including the Orange Cap and Most Valuable Player. Scoring 776 runs in 16 matches at a strike rate of 237.31, he became the youngest ever player to win the Orange Cap. He also shattered Chris Gayle’s long-standing record by hitting 72 sixes in a single season and became the fastest player to reach 1000 IPL runs in terms of balls faced.