'ദി ഹോളിവുഡ് റിപ്പോർട്ടർ ഇന്ത്യ'യ്ക്ക് നല്‍കിയ അഭിമുഖത്തിലാണ് മമ്മൂട്ടിയില്‍ നിന്ന് ലഭിച്ച ആരോഗ്യപരമായ നിർദേശത്തെക്കുറിച്ച്‌ സൂര്യ വെളിപ്പെടുത്തിയത്. ഭാര്യ ജ്യോതികയ്ക്കൊപ്പമുള്ള അഭിമുഖത്തില്‍ തന്റെ വർക്കൗട്ട് രീതികളിലും ഭക്ഷണശീലങ്ങളിലും വന്ന മാറ്റങ്ങളെക്കുറിച്ചും താരം സംസാരിച്ചു. (Suriya about Mammootty fitness advice)

"ഇഷ്ടമുള്ളതെല്ലാം കഴിക്കാം, എന്നാല്‍ ഇഷ്ടമുള്ളത്ര അളവില്‍ കഴിക്കരുത്" എന്നതാണ് ഭക്ഷണകാര്യത്തില്‍ മമ്മൂട്ടി നല്‍കിയ പ്രധാന ഉപദേശമെന്ന് സൂര്യ പറഞ്ഞു. ദിവസവും എട്ട് മുതല്‍ ഒമ്പത് മണിക്കൂർ വരെ ഉറക്കം ഉറപ്പാക്കണമെന്നും മമ്മൂട്ടി നിർദേശിച്ചിരുന്നതായി താരം വ്യക്തമാക്കി. ആരോഗ്യകരമായ ജീവിതത്തിന് ഭക്ഷണനിയന്ത്രണത്തിനൊപ്പം മതിയായ ഉറക്കത്തിനും വലിയ പ്രാധാന്യമുണ്ടെന്നാണ് സൂര്യയുടെ അഭിപ്രായം. സിക്‌സ് പാക്കും മസിലുകളും മാത്രമല്ല ഫിറ്റ്നസിന്റെ അളവുകോലെന്നും സമീകൃതമായ ജീവിതശൈലിയാണ് യഥാർഥ ആരോഗ്യത്തിന്റെ അടിസ്ഥാനമെന്നും സൂര്യ പറഞ്ഞു. ഉറക്കം, ഭക്ഷണം, ജോലി, മാനസിക സമ്മർദം തുടങ്ങിയവയ്ക്കിടയില്‍ കൃത്യമായ സന്തുലനം നിലനിർത്താനാണ് ഇപ്പോള്‍ ശ്രമിക്കുന്നതെന്നും അദ്ദേഹം വ്യക്തമാക്കി. വിറ്റാമിൻ ഡി, വിറ്റാമിൻ ബി12 തുടങ്ങിയ അടിസ്ഥാന പോഷകങ്ങളുടെ പ്രാധാന്യത്തെക്കുറിച്ചും സൂര്യ അഭിമുഖത്തില്‍ സംസാരിച്ചു.

വർക്കൗട്ടിനോടുള്ള തന്റെ സമീപനത്തിലും കാലത്തിനനുസരിച്ച്‌ മാറ്റം വന്നതായി സൂര്യ പറഞ്ഞു. ഇരുപതുകളില്‍ ശരീരത്തിലെ മസിലുകളും സിക്‌സ് പാക്കുമായിരുന്നു പ്രധാന ലക്ഷ്യമെങ്കില്‍, ഇപ്പോള്‍ ശരീരത്തിന്റെ ഫ്ലെക്സിബിലിറ്റിക്കും മൊബിലിറ്റിക്കുമാണ് കൂടുതല്‍ പ്രാധാന്യം നല്‍കുന്നത്. ശരീരത്തെ കൂടുതല്‍ കാര്യക്ഷമമായി നിലനിർത്തുകയാണ് ഇപ്പോഴത്തെ ഫിറ്റ്നസ് ലക്ഷ്യമെന്നും താരം വ്യക്തമാക്കി. മുമ്പ് നടുവിന് പരിക്കേറ്റതിനെ തുടർന്ന് ഭാരമുയർത്തിയുള്ള വ്യായാമങ്ങളും പവർലിഫ്റ്റിങ്ങും ഒഴിവാക്കിയിരിക്കുകയാണ് സൂര്യ. പകരം ഫങ്ഷണല്‍ സ്‌ട്രെങ്ത് ട്രെയിനിങ്ങിനും പുള്‍-അപ്പുകള്‍ക്കുമാണ് ഇപ്പോള്‍ കൂടുതല്‍ ശ്രദ്ധ നല്‍കുന്നത്. പ്രായം കൂടുന്നതിനനുസരിച്ച്‌ ഫിറ്റ്നസിന്റെ ലക്ഷ്യങ്ങളും വ്യായാമരീതികളും മാറ്റേണ്ടതിന്റെ ആവശ്യകതയും സൂര്യയുടെ വാക്കുകളില്‍ വ്യക്തമാകുന്നു.

Summary: Suriya has revealed that he follows fitness and diet advice given to him by veteran actor Mammootty. He says a balanced lifestyle, adequate sleep, controlled food portions and functional training are more important to him now than simply building muscles or a six-pack.