ചണ്ഡീഗഢ്: ഇന്ത്യയെക്കുറിച്ചുള്ള വിദേശികളുടെ പൊതുവായ സങ്കല്‍പ്പങ്ങളെ തിരുത്തിക്കുറിക്കുന്ന ചണ്ഡീഗഢ് നഗരത്തിന്റെ കാഴ്ചകള്‍ സോഷ്യല്‍ മീഡിയയില്‍ തരംഗമാകുന്നു (Russell Henderson Praises Chandigarh Cleanliness).

അടുത്തിടെ നഗരം സന്ദർശിച്ച ബ്രിട്ടീഷ് ആർക്കിടെക്റ്റായ റസ്സല്‍ ഹെൻഡേഴ്സണ്‍ ഇൻസ്റ്റാഗ്രാമില്‍ പങ്കുവെച്ച വീഡിയോയാണ് ഇപ്പോള്‍ ലക്ഷക്കണക്കിന് ആളുകളുടെ ശ്രദ്ധ ആകർഷിക്കുന്നത്. 'ഫസ്റ്റ് ഇംപ്രഷൻസ് ചണ്ഡീഗഢ്' എന്ന തലക്കെട്ടില്‍ പങ്കുവെച്ച വീഡിയോയില്‍, നഗരത്തിലെ തിരക്കുകളില്ലാത്ത വിശാലമായ റോഡുകളും മാലിന്യങ്ങള്‍ ഒട്ടുമില്ലാത്ത വൃത്തിയുള്ള നടപ്പാതകളും കണ്ട് താൻ അത്ഭുതപ്പെട്ടുപോയെന്ന് അദ്ദേഹം വ്യക്തമാക്കുന്നു. യു കെ, തായ്‌ലൻഡ്, ഓസ്‌ട്രേലിയ എന്നിവിടങ്ങളില്‍ ജോലി ചെയ്ത ശേഷം നിലവില്‍ ടാൻസാനിയയില്‍ സ്ഥിരതാമസമാക്കിയ റസ്സല്‍, ഇന്റർനെറ്റില്‍ സാധാരണയായി വിദേശികള്‍ കാണുന്ന ഇന്ത്യൻ നഗരങ്ങളുടെ ചിത്രങ്ങളില്‍ നിന്നും തികച്ചും വ്യത്യസ്തമാണ് ചണ്ഡീഗഢ് എന്ന് സാക്ഷ്യപ്പെടുത്തുന്നു.

സൈക്കിളുകള്‍ക്കായി പ്രത്യേകം ഒരുക്കിയിട്ടുള്ള ട്രാക്കുകളും കൃത്യമായ സൂചന ബോർഡുകളും ഇന്ത്യയില്‍ താൻ ആദ്യമായാണ് കാണുന്നതെന്നും വരുംതലമുറകള്‍ക്ക് പോലും ഗതാഗതക്കുരുക്കില്ലാതെ ജീവിക്കാൻ തക്കവണ്ണമാണ് ഈ നഗരം രൂപകല്‍പ്പന ചെയ്തിരിക്കുന്നതെന്നും അദ്ദേഹം പുകഴ്ത്തി. ക്യാമറയുമായി പകലും രാത്രിയും ഒരുപോലെ ഭയമില്ലാതെ സഞ്ചരിക്കാൻ സാധിക്കുന്ന സുരക്ഷിതമായ അന്തരീക്ഷമാണ് ഇവിടെയുള്ളത്. വീഡിയോ വൈറലായതോടെ ചണ്ഡീഗഢ് ആണ് ഇന്ത്യയില്‍ ജീവിക്കാൻ പറ്റിയ ഏറ്റവും മികച്ച നഗരമെന്ന് വ്യക്തമാക്കിക്കൊണ്ട് നിരവധി സ്വദേശികളും പ്രതികരണങ്ങളുമായി രംഗത്തെത്തി. കർശനമായ സോണിംഗ് നിയമങ്ങളും മികച്ച മുൻസിപ്പല്‍ ഭരണവുമാണ് നഗരത്തിന്റെ ഈ നേട്ടത്തിന് പിന്നിലെന്ന് പ്രാദേശിക ജനങ്ങള്‍ ചൂണ്ടിക്കാണിക്കുന്നു. പഞ്ചാബ്, ഹരിയാണ എന്നീ രണ്ട് സംസ്ഥാനങ്ങളുടെ സംയുക്ത തലസ്ഥാനമായതിനാല്‍ കേന്ദ്ര സർക്കാരില്‍ നിന്ന് ലഭിക്കുന്ന മികച്ച ഫണ്ടും വികസനത്തിന് ആക്കം കൂട്ടുന്നു.