ഛത്തീസ്ഗഢിലെ ഭർതൃവീട്ടില്‍ യുവതി ജീവനൊടുക്കിയ കേസ് പരിഗണിക്കവെയാണ് പരമോന്നത കോടതി സമൂഹത്തിന് ശക്തമായ താക്കീത് നല്‍കിയത്. ഭോപ്പാലില്‍ വിവാഹം കഴിഞ്ഞ് അഞ്ചു മാസത്തിനുള്ളില്‍ ദുരൂഹസാഹചര്യത്തില്‍ മരണപ്പെട്ട 33-കാരി ട്വിഷാ ശർമയുടെ കേസ് രാജ്യവ്യാപകമായി ചർച്ചയാകുന്ന പശ്ചാത്തലത്തിലാണ് സുപ്രീം കോടതിയുടെ ഈ കടുത്ത പരാമർശങ്ങള്‍ വരുന്നത്. മാനസിക പീഡനവും സ്ത്രീധനച്ചൊല്ലിയുള്ള പീഡനവുമാണ് ട്വിഷയുടെ മരണത്തിന് കാരണമെന്ന് മാതാപിതാക്കള്‍ ആരോപിച്ചിരുന്നു.

വിവാഹശേഷം വധുവിനോടും അവളുടെ മാതാപിതാക്കളോടും ഭർതൃവീട്ടുകാർ കാണിക്കുന്ന മോശം പെരുമാറ്റത്തെ കോടതി രൂക്ഷമായി വിമർശിച്ചു. ”എന്തിനാണ് യുവാക്കള്‍ പെണ്‍കുട്ടികളെ വിവാഹം കഴിച്ചുകൊണ്ടുവന്ന ശേഷം അവരെയും അവരുടെ കുടുംബത്തെയും ഇത്തരത്തില്‍ അപമാനിക്കുന്നത്? വധുവിനെയും കുടുംബത്തെയും നിരന്തരം വേദനിപ്പിച്ചുകൊണ്ട് മുന്നോട്ട് പോകാൻ കഴിയില്ലെന്ന ശക്തമായ സന്ദേശം സമൂഹത്തിന് നല്‍കേണ്ടതുണ്ട്”- ജസ്റ്റിസ് നാഗരത്ന, ജസ്റ്റിസ് ഭുയാൻ എന്നിവരടങ്ങിയ ബെഞ്ച് വ്യക്തമാക്കി.

2010-ലായിരുന്നു കേസിനാസ്പദമായ സംഭവം നടന്നത്. വിവാഹം കഴിഞ്ഞ് മൂന്ന് വർഷത്തിനുള്ളില്‍ യുവതിയെ ഭർതൃവീട്ടില്‍ തൂങ്ങിമരിച്ച നിലയില്‍ കണ്ടെത്തുകയായിരുന്നു. പണവും കാറും ഉള്‍പ്പെടെയുള്ള സ്ത്രീധന ആവശ്യങ്ങള്‍ ഉന്നയിച്ച്‌ ഭർത്താവും കുടുംബവും യുവതിയെ നിരന്തരം പീഡിപ്പിച്ചിരുന്നതായി വധുവിന്റെ അഭിഭാഷകൻ കോടതിയെ അറിയിച്ചു. തുടർച്ചയായ സ്ത്രീധന പീഡനങ്ങളാണ് മരണത്തിലേക്ക് നയിച്ചതെന്ന് വിചാരണ കോടതി കണ്ടെത്തുകയും ഭർത്താവിന്റെ കുടുംബാംഗങ്ങളെ സ്ത്രീധന മരണം, ആത്മഹത്യാ പ്രേരണ, ക്രൂരത തുടങ്ങിയ വകുപ്പുകള്‍ പ്രകാരം ശിക്ഷിക്കുകയും ചെയ്തിരുന്നു. ഈ വിധി പിന്നീട് ഛത്തീസ്ഗഢ് ഹൈക്കോടതിയും ശരിവെക്കുകയുണ്ടായി.

തനിക്കെതിരെ ഐ.പി.സി സെക്ഷൻ 498എ (ഗാർഹിക പീഡനം) മാത്രമാണ് ചുമത്തിയിട്ടുള്ളതെന്നും അതിനാല്‍ ശിക്ഷയില്‍ ഇളവ് നല്‍കണമെന്നും പ്രതിഭാഗം സുപ്രിംകോടതിയില്‍ വാദിച്ചു. എന്നാല്‍, “നിങ്ങള്‍ക്കെതിരെ 498എ മാത്രമാണ് ചുമത്തിയതെന്നും മൂന്ന് വർഷം മാത്രമേ ശിക്ഷയുള്ളൂ എന്നതിലും നിങ്ങള്‍ സന്തോഷിക്കുകയാണ് വേണ്ടത്” എന്നായിരുന്നു ജസ്റ്റിസ് നാഗരത്‌നയുടെ മറുപടി.

വിവാഹ വീടുകളില്‍ നടക്കുന്ന സാമ്പത്തിക ചൂഷണത്തിന്റെ ഭയാനകമായ അവസ്ഥയെക്കുറിച്ചും ജസ്റ്റിസ് നാഗരത്‌ന വിധിന്യായത്തില്‍ പരാമർശിച്ചു. ”വധുവിനെയും അവളുടെ കുടുംബത്തെയും പരമാവധി പിഴിഞ്ഞെടുക്കുകയാണ് ലക്ഷ്യം. തങ്ങളുടെ മകളുടെ ജീവിതം രക്ഷിക്കാൻ പെണ്‍കുട്ടിയുടെ കുടുംബം യാചിക്കുമ്പോള്‍ അവരെ ഭിക്ഷക്കാരെന്ന് വിളിച്ച്‌ ആക്ഷേപിക്കുകയായിരുന്നു ഭർതൃവീട്ടുകാർ. വധുവിന്റെ പിതാവ് തങ്ങള്‍ക്ക് 60,000 രൂപ തരാൻ കഴിയുമെന്ന് പറഞ്ഞിട്ടും നിങ്ങള്‍ അവരെ ഭിക്ഷക്കാരെന്ന് വിളിച്ചോ?” എന്ന് കോടതി ചോദിച്ചു.

കേസില്‍ എഫ്‌ഐആർ രജിസ്റ്റർ ചെയ്യാൻ വൈകി എന്ന പ്രതിഭാഗത്തിന്റെ സാങ്കേതിക വാദവും സുപ്രിംകോടതി തള്ളി. നമ്മുടെ നാട്ടില്‍ വധുക്കള്‍ എങ്ങനെയാണ് ജീവിക്കുന്നതെന്ന യാഥാർത്ഥ്യം ഉള്‍ക്കൊള്ളുന്ന സന്ദേശം ഈ വിധിയിലൂടെ സമൂഹത്തിന് ലഭിക്കട്ടെയെന്ന് കോടതി പറഞ്ഞു. വിദ്യാസമ്പന്നരായ ആളുകള്‍ക്കിടയില്‍ പോലും ഇത്തരം ക്രൂരതകള്‍ സാധാരണമായി മാറുന്നതിലെ കടുത്ത ആശങ്ക ജസ്റ്റിസ് ഭുയാനും പങ്കുവെച്ചു.

Story Summary: The Supreme Court issued a stern warning against dowry harassment and domestic violence while hearing a case from Chhattisgarh. The court observed that society must receive a strong message that degrading a bride and her family will no longer be tolerated.