ഓർ‍ഡിനറി, ഫാസ്റ്റ് പാസഞ്ചർ ബസുകളില്‍ പദ്ധതി നടപ്പാക്കാനാണ് നിലവില്‍ സർക്കാർ തലത്തില്‍ നീക്കം നടക്കുന്നത്. പദ്ധതി പ്രാവർത്തികമാക്കാൻ പ്രതിമാസം ഏകദേശം 90 കോടി രൂപയോളം അധികമായി ആവശ്യമായി വരുമെന്നാണ് കണക്കാക്കുന്നത്. ഈ തുക എങ്ങനെ കണ്ടെത്തുമെന്നതും ഇതിന്റെ സാമ്പത്തിക സ്രോതസ്സുകളെക്കുറിച്ചും മന്ത്രിസഭ വിശദമായി ചർച്ച ചെയ്യും. ഇതിനുപുറമെ, സംസ്ഥാനത്ത് വലിയ രാഷ്ട്രീയ വിവാദങ്ങള്‍ക്ക് വഴിവെച്ച എഡിഎം നവീൻ ബാബുവിൻ്റെ മരണവുമായി ബന്ധപ്പെട്ട അന്വേഷണം കേന്ദ്ര അന്വേഷണ ഏജൻസിയായ സിബിഐക്ക് വിടുന്ന കാര്യത്തിലും ഇന്നത്തെ കാബിനറ്റ് യോഗത്തില്‍ അന്തിമ തീരുമാനമുണ്ടാകും.

അതേസമയം, ഗവർണറുടെ നയപ്രഖ്യാപന പ്രസംഗത്തിന്മേലുള്ള നന്ദിപ്രമേയ ചർച്ച ഇന്ന് കേരള നിയമസഭയില്‍ പൂർത്തിയാകും. പ്രതിപക്ഷ നേതാവ് പിണറായി വിജയന്റെ പ്രസംഗവും അതിനുശേഷമുള്ള മുഖ്യമന്ത്രി വി.ഡി. സതീശന്റെ മറുപടിയുമാണ് ഇന്നത്തെ സഭാ നടപടികളിലെ പ്രധാന ആകർഷണം. പുതിയ സർക്കാരിന്റെ നയപ്രഖ്യാപനം ഒരു പുതുയുഗത്തിൻ്റെ തുടക്കമാണെന്ന് മുഖ്യമന്ത്രി അവകാശപ്പെട്ടപ്പോള്‍, തികച്ചും നയരാഹിത്യമുള്ള പ്രസംഗമാണിതെന്നായിരുന്നു പ്രതിപക്ഷത്തിന്റെ പ്രതികരണം. രാവിലെ ഒമ്പത് മണിക്ക് അടിയന്തിരപ്രമേയ നോട്ടീസോടെ ആരംഭിക്കുന്ന സഭ, ഇന്നത്തെ ചർച്ചകള്‍ക്ക് ശേഷം പിരിയുകയും പിന്നീട് ജൂണ്‍ 19-ന് സംസ്ഥാന ബജറ്റ് അവതരണത്തിനായി വീണ്ടും സമ്മേളിക്കുകയും ചെയ്യും.

ഭരണമാറ്റത്തിന് ശേഷം രാഷ്ട്രീയ വൈരാഗ്യം തീർക്കാൻ സർക്കാർ ഉദ്യോഗസ്ഥരെ കൂട്ടത്തോടെ സ്ഥലം മാറ്റിയെന്ന പ്രതിപക്ഷത്തിന്റെ അടിയന്തരപ്രമേയ നോട്ടീസിന് കഴിഞ്ഞ ദിവസം സഭയില്‍ അനുമതി ലഭിച്ചിരുന്നില്ല. എല്‍ഡിഎഫ് മുൻനിര നേതാവ് വി. ജോയ് ആണ് സഭയില്‍ ഈ വിഷയം ഉന്നയിച്ചത്; മാനദണ്ഡങ്ങള്‍ കാറ്റില്‍പ്പറത്തി 33 വകുപ്പുകളിലായി 207 ഉത്തരവുകളിലൂടെ 310 വനിതകള്‍ അടക്കമുള്ള ജീവനക്കാരെ ദൂരസ്ഥലങ്ങളിലേക്ക് മാറ്റിയെന്ന് അദ്ദേഹം ആരോപിച്ചു. എന്നാല്‍ സ്ഥലം മാറ്റങ്ങള്‍ കൃത്യമായ വ്യവസ്ഥകള്‍ പാലിച്ചു മാത്രമാണെന്നും മെയ് മാസത്തിലെ വിരമിക്കലുകള്‍ മൂലമുണ്ടായ സ്വാഭാവിക മാറ്റങ്ങളാണെന്നും മന്ത്രി സണ്ണി ജോസഫ് മറുപടി നല്‍കി. ജീവനക്കാരുടെ മനോവീര്യം തകർക്കുന്ന നടപടികള്‍ ഉണ്ടായിട്ടില്ലെന്നും പരാതികളുണ്ടെങ്കില്‍ അനുഭാവപൂർവ്വം പരിഗണിക്കുമെന്നും മന്ത്രി വ്യക്തമാക്കിയതോടെ സഭ നിർത്തിവെച്ചുള്ള ചർച്ച സ്പീക്കർ നിഷേധിക്കുകയായിരുന്നു.

Summary: The Kerala Cabinet will meet today to finalize the implementation blueprint for the free KSRTC travel scheme for women, which is expected to cost around Rs 90 crore. The cabinet is also slated to take a crucial decision on handing over the investigation into the tragic death of ADM Naveen Babu to the CBI. Meanwhile, the assembly debate on the Governor’s policy address will conclude today with political confrontations expected between Chief Minister V.D. Satheesan and Opposition Leader Pinarayi Vijayan.