‘ഷിയാങ്‌ലോങ്’ (Xianglong) എന്ന് പേരിട്ടിരിക്കുന്ന ഈ വിപ്ലവകരമായ ഹൈബ്രിഡ് യന്ത്രം സിൻഹുവ സർവ്വകലാശാലയും ചൈന റെയില്‍വേ ഗ്രൂപ്പ് സബ്സിഡിയറിയും ചേർന്നാണ് വികസിപ്പിച്ചെടുത്തത്.

മധ്യ ചൈനയിലെ ഹുബെയ് പ്രവിശ്യയുടെ തലസ്ഥാനമായ വുഹാനിലെ നിർമ്മാണശാലയില്‍ നിന്നാണ് 4.55 മീറ്റർ വ്യാസവും 70 മീറ്റർ നീളവുമുള്ള യന്ത്രം പുറത്തിറക്കിയത്. പരമ്പരാഗത ടണല്‍ ബോറിങ് യന്ത്രങ്ങളെക്കാള്‍ (TBM) വലിപ്പം കുറഞ്ഞ ഈ സംവിധാനത്തില്‍ മെക്കാനിക്കല്‍ ഖനനത്തോടൊപ്പം ഡ്രില്ലിങ്, ബ്ലാസ്റ്റിങ് സാങ്കേതികവിദ്യകളും ഒരേസമയം സമയിപ്പിച്ചിരിക്കുന്നു.

കഠിനവും വിള്ളലുകളുള്ളതുമായ പർവ്വതശിലകളില്‍ തുരങ്കനിർമ്മാണം നടത്തുമ്പോള്‍ സാധാരണ ടി.ബി.എമ്മുകള്‍ നേരിടുന്ന വേഗതക്കുറവും സാങ്കേതിക തടസ്സങ്ങളും പരിഹരിക്കാൻ ‘ഷിയാങ്‌ലോങ്ങിന്’ സാധിക്കും. മുൻപ് ബോറിങ് യന്ത്രങ്ങളും പരമ്പരാഗത ഡ്രില്‍-ബ്ലാസ്റ്റ് രീതികളും മാറിമാറി ഉപയോഗിക്കേണ്ടി വന്ന സ്ഥാനത്ത് പുതിയ യന്ത്രം ഉപയോഗിക്കുന്നതിലൂടെ നിർമ്മാണ കാര്യക്ഷമത 30 ശതമാനത്തോളം വർദ്ധിപ്പിക്കാമെന്ന് സയൻസ് ആൻഡ് ടെക്നോളജി ഡെയ്‌ലി റിപ്പോർട്ട് ചെയ്യുന്നു.

പൂർണ്ണമായും ചൈനീസ് നിർമ്മിത ഘടകങ്ങള്‍ ഉള്‍പ്പെടുത്തി നിർമ്മിച്ച ‘ഷിയാങ്‌ലോങ്’, ഹെനാൻ പ്രവിശ്യയില്‍ വികസനത്തിലുള്ള പമ്പ്ഡ് സ്റ്റോറേജ് പവർ പ്ലാന്റിലാണ് ആദ്യമായി പരീക്ഷണാടിസ്ഥാനത്തില്‍ ഉപയോഗിക്കുക.

Story Summary: China has unveiled ‘Xianglong’, the world’s first hybrid tunnel boring-and-blasting machine developed jointly by Tsinghua University and China Railway Group. Rolled off the line in Wuhan, the machine integrates mechanical excavation with drill-and-blast methods, boosting tunneling efficiency in extreme, hard-rock conditions by 30%.