പാർട്ടി വിരുദ്ധ പ്രവർത്തനങ്ങള്‍ ആരോപിച്ച്‌ എംഎല്‍എമാരായ ഋതബ്രത ബാനർജി, സന്ദീപൻ സാഹ എന്നിവരെ ടിഎംസി അടിയന്തിരമായി പുറത്താക്കിയതിന് തൊട്ടുപിന്നാലെയാണ് നാടകീയ നീക്കങ്ങള്‍ അരങ്ങേറിയത്. തനിക്ക് 58 എംഎല്‍എമാരുടെ പിന്തുണയുണ്ടെന്ന് അവകാശപ്പെട്ട് ഋതബ്രത ബാനർജി പശ്ചിമ ബംഗാള്‍ നിയമസഭാ സ്പീക്കർ രതീന്ദ്ര ബോസിനെ നേരിട്ട് കണ്ട് പ്രതിപക്ഷ നേതൃസ്ഥാനത്തിനായി അവകാശവാദമുന്നയിച്ചു. അരുപ് റോയ്, ഷിയുലി സാഹ, അഖ്‌റുല്ലാമാൻ തുടങ്ങിയ പ്രമുഖ ടിഎംസി നിയമസഭാംഗങ്ങള്‍ക്കൊപ്പമാണ് ഋതബ്രത സ്പീക്കറെ കാണാൻ എത്തിയത്. തങ്ങളാണ് ‘യഥാർത്ഥ തൃണമൂല്‍ കോണ്‍ഗ്രസ്’ എന്നും വിമത വിഭാഗം അവകാശപ്പെടുന്നു.

80 അംഗങ്ങളുള്ള ടിഎംസിയില്‍ 58 പേർ വിമതർക്കൊപ്പം ചേർന്നെന്ന അവകാശവാദം ശരിയാണെങ്കില്‍ മമത ബാനർജിയെ പിന്തുണയ്ക്കുന്നവരുടെ എണ്ണം വെറും 20 ആയി ചുരുങ്ങും. ഇത് ബംഗാളിലെ രാഷ്ട്രീയ സമവാക്യങ്ങളെ പൂർണ്ണമായും മാറ്റിമറിക്കും. നിയമസഭയില്‍ മൂന്നില്‍ രണ്ട് ഭൂരിപക്ഷമുള്ളതിനാല്‍ കൂറുമാറ്റ നിരോധന നിയമത്തില്‍ നിന്ന് രക്ഷപ്പെടാനും പാർട്ടിയുടെ പേരും ഔദ്യോഗിക ചിഹ്നവും സ്വന്തമാക്കാനും വിമതർക്ക് സാധിച്ചേക്കും. മഹാരാഷ്ട്രയില്‍ ശിവസേന പിളർന്നതിന് സമാനമായ സാഹചര്യമാണ് ഇപ്പോള്‍ ബംഗാളിലും ദൃശ്യമാകുന്നത്. അഭിഷേക് ബാനർജിക്ക് പാർട്ടിയില്‍ നല്‍കുന്ന അമിത പിന്തുണയാണ് മുതിർന്ന നേതാക്കളുടെ അതൃപ്തിക്ക് കാരണമെന്നാണ് റിപ്പോർട്ടുകള്‍. ഏതാനും പേർ പാർട്ടിയെ ചതിക്കുകയാണെന്ന് ടിഎംസി വക്താവ് കുനാല്‍ ഘോഷ് പ്രതികരിച്ചെങ്കിലും വിമതരുടെ അവകാശവാദങ്ങളെക്കുറിച്ച്‌ ഔദ്യോഗിക വിശദീകരണം നല്‍കാൻ പാർട്ടി നേതൃത്വം ഇതുവരെ തയ്യാറായിട്ടില്ല. ഈ വിമത നീക്കത്തിന് പിന്നില്‍ ബിജെപിയുടെ പിന്തുണയുണ്ടെന്നും സൂചനകളുണ്ട്.

ഭരണം നഷ്ടപ്പെട്ടതിന് പിന്നാലെ ടിഎംസി തകർച്ച നേരിടുമ്പോള്‍, സംസ്ഥാനത്ത് ശക്തമായ പ്രതിപക്ഷമായി ഇടതുപക്ഷത്തിന് തിരിച്ചുവരാനാകുമോ എന്നാണ് രാഷ്ട്രീയ കേന്ദ്രങ്ങള്‍ ഉറ്റുനോക്കുന്നത്. 2026-ലെ നിയമസഭാ തെരഞ്ഞെടുപ്പില്‍ സിപിഎമ്മിനും ഓള്‍ ഇന്ത്യ സെക്യുലർ ഫ്രണ്ടിനും ഓരോ സീറ്റുകള്‍ മാത്രമാണ് നേടാനായതെങ്കിലും, അടുത്തിടെ പുറത്തുവന്ന ഫാല്‍ട്ട മണ്ഡലത്തിലെ ഉപതെരഞ്ഞെടുപ്പ് ഫലം ഇടതുപക്ഷത്തിന് വലിയ പ്രതീക്ഷ നല്‍കുന്നുണ്ട്.

ബിജെപി വിജയിച്ച ഈ മണ്ഡലത്തില്‍ സിപിഎം പിന്തുണച്ച സ്വതന്ത്ര സ്ഥാനാർത്ഥി ശംഭുനാഥ് കുർമി നാല്‍പ്പതിനായിരത്തിലധികം വോട്ടുകള്‍ നേടി രണ്ടാം സ്ഥാനത്തെത്തിയപ്പോള്‍ ടിഎംസി നാലാം സ്ഥാനത്തേക്ക് തള്ളപ്പെട്ടിരുന്നു. ഭരണവിരുദ്ധ വോട്ടുകള്‍ വലിയ രീതിയില്‍ ഇടതുപക്ഷത്തേക്ക് മാറുന്നു എന്നതിന്റെ സൂചനയാണിതെന്ന് ബ്രിട്ടീഷ് അക്കാദമി ഇന്റർനാഷണല്‍ ഫെലോ അയൻ ഗുഹ ഉള്‍പ്പെടെയുള്ള രാഷ്ട്രീയ നിരീക്ഷകർ വിലയിരുത്തുന്നു. അഴിമതി ആരോപണങ്ങളും പിളർപ്പും കാരണം ടിഎംസി പ്രതിസന്ധിയിലാകുമ്പോള്‍ ആ വോട്ടുകള്‍ വരും ദിവസങ്ങളില്‍ സിപിഎം-കോണ്‍ഗ്രസ് സഖ്യത്തിലേക്ക് കേന്ദ്രീകരിക്കാൻ വലിയ സാധ്യതയുണ്ട്.

Summary: The Trinamool Congress (TMC) in West Bengal is on the verge of a major split after rebel leader Ritabrata Banerjee claimed the support of 58 out of 80 MLAs and staked a claim for the post of Opposition Leader. This political crisis unfolded immediately after the party expelled Ritabrata Banerjee and Sandipan Saha for anti-party activities following internal disputes over Abhishek Banerjee’s leadership. Political analysts suggest that the ongoing turmoil and TMC’s decline could pave the way for a political resurgence of the CPI(M)-led Left front in West Bengal.