തുടർച്ചയായ മിമിക്രി വേദികളിലൂടെയും സിനിമകളിലൂടെയും മലയാളി പ്രേക്ഷകരെ ഒരുപോലെ ചിരിപ്പിച്ച പ്രശസ്ത നടൻ കണ്ണൻ സാഗർ ഹൃദയശസ്ത്രക്രിയയ്ക്ക് ശേഷം ആരോഗ്യവാനായി തിരിച്ചെത്തുന്നു (Kannan Sagar heart surgery updates).
ശസ്ത്രക്രിയയ്ക്ക് ശേഷമുള്ള വിശ്രമത്തിനിടയില്‍ തനിക്ക് ജീവൻ തിരികെ നല്‍കാൻ സഹായിച്ചവർക്ക് നന്ദി പറഞ്ഞുകൊണ്ട് താരം സോഷ്യല്‍ മീഡിയയില്‍ പങ്കുവെച്ച വൈകാരികമായ കുറിപ്പാണ് ഇപ്പോള്‍ ശ്രദ്ധ നേടുന്നത്. മെഗാസ്റ്റാർ മമ്മൂട്ടിയുടെ കെയർ ആൻഡ് ഷെയർ ഫൗണ്ടേഷനും ആലുവ രാജഗിരി ആശുപത്രിയും സംയുക്തമായി നടത്തുന്ന 'ഹൃദ്യം' പദ്ധതിയിലൂടെയാണ് കണ്ണൻ സാഗറിന്റെ അടിയന്തിര ശസ്ത്രക്രിയ വിജയകരമായി പൂർത്തിയാക്കിയത്.
"മനുഷ്യ ദൈവങ്ങളെ ഒരുപാട് നന്ദി… വീണ്ടും ചെക്കപ്പിലേക്ക് പോയി. വ്യായാമവും വിശ്രമവും കുറേ നാളുകള്‍ക്കൂടി മുന്നോട്ട് കൊണ്ടുപോണം എന്ന നിർദ്ദേശം നല്‍കി ഡോക്ടർ നന്നായി പരിശോധിച്ചു. അത്യാവശ്യം വർക്കുകളില്‍, യാത്രകളില്‍ ഒക്കെ പോകാം മനസ്സിന് ധൈര്യമുണ്ടെങ്കില്‍ എന്നു പറഞ്ഞപ്പോള്‍ ഒരു ധൈര്യം വന്നതുപോലെ, അങ്ങനെ ആയല്ലേ പറ്റൂ. പ്രിയപ്പെട്ടവരോട്, സ്‌നേഹിച്ചതിന്, പ്രാർത്ഥിച്ചതിന്, ആത്മധൈര്യം തന്നതിന്, ഒരുപാട് സഹായിച്ചതിന് കടപ്പെട്ടിരിക്കുന്നു," എന്ന് കണ്ണൻ സാഗർ തന്റെ കുറിപ്പില്‍ വ്യക്തമാക്കി.
തന്റെ ഈ രണ്ടാം ജന്മത്തിന് കാരണക്കാരായ മമ്മൂട്ടിക്കും മറ്റ് സുഹൃത്തുക്കള്‍ക്കും സംഘടനകള്‍ക്കും താരം ഹൃദയത്തില്‍ തൊട്ട് നന്ദി രേഖപ്പെടുത്തി: "പ്രിയപ്പെട്ട മമ്മൂക്കാ, ഹൃദയപൂർവ്വം ഫൗണ്ടേഷൻ ഭാരവാഹികള്‍, രാജഗിരി ഹോസ്പിറ്റല്‍ ആലുവ, രമേഷ് പിഷാരടി, കലാഭവൻ കെ.എസ്. പ്രസാദ് ചേട്ടൻ, സാജു കൊടിയൻ, സഹായഹസ്തങ്ങള്‍ നീട്ടിയ അറിഞ്ഞും അറിയാതെയുമുള്ള സോദരങ്ങള്‍, കോട്ടയം ആക്മ, ഇതിലൊക്കെ ഉപരി ധനവും മനസ്സും തന്നു കൂടെയുണ്ടെന്നു ധൈര്യം തന്ന 'MAA' സംഘടനാ ഭാരവാഹികളും പ്രിയപ്പെട്ട അംഗങ്ങളും. അങ്ങനെ നന്ദിപറഞ്ഞാല്‍ തീരില്ല ഈ ജന്മം," അദ്ദേഹം കുറിച്ചു.
മിമിക്രി വേദികളിലൂടെ കലാരംഗത്ത് തുടക്കം കുറിച്ച കണ്ണൻ സാഗർ 'സർക്കാർ കോളനി' എന്ന ചിത്രത്തിലൂടെയാണ് ബിഗ് സ്ക്രീനില്‍ അരങ്ങേറ്റം കുറിക്കുന്നത്. തുടർന്ന് നിരവധി സിനിമകളിലും ജനപ്രിയ ടെലിവിഷൻ പരമ്പരകളിലും ചെറുതും വലുതുമായ മികച്ച നർമ്മ വേഷങ്ങളിലൂടെ അദ്ദേഹം പ്രേക്ഷക പ്രീതി നേടി. തീയേറ്ററുകളില്‍ വലിയ തരംഗം സൃഷ്ടിച്ച 'വാഴ 2' എന്ന ചിത്രത്തില്‍ കണ്ണൻ സാഗർ കൈകാര്യം ചെയ്ത വേഷം ഏറെ പ്രേക്ഷക ശ്രദ്ധ പിടിച്ചുപറ്റിയിരുന്നു. ഡോക്ടർമാരുടെ നിർദ്ദേശപ്രകാരം കൃത്യമായ വിശ്രമത്തിന് ശേഷം താരം വീണ്ടും ക്യാമറയ്ക്ക് മുന്നിലേക്ക് സജീവമായി തിരിച്ചെത്തുമെന്ന പ്രതീക്ഷയിലാണ് സിനിമാ ലോകവും ആരാധകരും.
Story Summary: Actor and mimicry artist Kannan Sagar shared an emotional note on social media after undergoing a successful heart surgery. The surgery was funded through Mammootty's Care and Share Foundation and Rajagiri Hospital's 'Hridyam' project. Kannan expressed his gratitude to Mammootty, Ramesh Pisharody, and the MAA association for their support.