തിരുവനന്തപുരം: കന്യാകുമാരി കടലില്‍ മത്സ്യബന്ധന ബോട്ടില്‍ ഇടിച്ച്‌ അപകടമുണ്ടാക്കിയതിനെ തുടർന്ന് വിഴിഞ്ഞത്ത് മാസങ്ങളായി കസ്റ്റഡിയില്‍ സൂക്ഷിച്ചിരുന്ന വിദേശ ചരക്കുകപ്പല്‍ 'എം.ടി.

സോളിസ്’ ഒടുവില്‍ യാത്രാനുമതി ലഭിച്ച്‌ തീരം വിട്ടു (Foreign Ship MT Solis Leaves Vizhinjam). കൊച്ചി മെർക്കന്റൈല്‍ മറൈൻ വകുപ്പ് ഔദ്യോഗികമായി യാത്രാനുമതി നല്‍കിയതിനെ തുടർന്ന് ഇന്നലെ രാത്രി 7.30 ഓടെയാണ് കപ്പല്‍ ശ്രീലങ്കയിലെ കൊളംബോയിലേക്ക് യാത്ര തിരിച്ചത്. കപ്പല്‍ പുറപ്പെടുന്നതിന് മുന്നോടിയായി ജീവനക്കാർക്ക് ആവശ്യമായ പലവ്യഞ്ജനങ്ങള്‍ ഉള്‍പ്പെടെയുള്ള അവശ്യസാധനങ്ങള്‍ വിഴിഞ്ഞത്തുനിന്ന് ശേഖരിച്ചിരുന്നു. കപ്പലുടമകളുമായി വിവിധ വകുപ്പുകള്‍ നടത്തിയ നീണ്ട ചർച്ചകള്‍ക്കും നിയമനടപടികള്‍ക്കും ഒടുവിലാണ് കപ്പല്‍ വിട്ടയക്കാൻ കൊച്ചി മെർക്കന്റൈല്‍ മറൈൻ വകുപ്പ് ഉത്തരവിറക്കിയത്. ക്യാപ്റ്റൻ ലെ വാൻ ട്യുവാൻ ഉള്‍പ്പെടെ വിയറ്റ്നാം സ്വദേശികളായ 20 ജീവനക്കാരാണ് നിലവില്‍ ഈ കപ്പലിലുള്ളത്.

കഴിഞ്ഞ മാർച്ച്‌ 7-ന് കന്യാകുമാരിക്കടുത്തുള്ള പുറംകടലില്‍ വെച്ചാണ് എം.ടി. സോളിസ് കപ്പല്‍ കൊല്ലം സ്വദേശിയുടെ ഉടമസ്ഥതയിലുള്ള ‘സെന്റ് ജോസഫ്’ എന്ന മത്സ്യബന്ധന ബോട്ടില്‍ ഇടിക്കുന്നത്. ശക്തമായ ഇടിയില്‍ ബോട്ട് പൂർണ്ണമായും കടലില്‍ മുങ്ങിപ്പോയിരുന്നു. ബോട്ടിലുണ്ടായിരുന്ന 11 തൊഴിലാളികളില്‍ കൊല്‍ക്കത്ത സ്വദേശിയായ ലഖാൻ ദാസ് (45), മകൻ ബാദല്‍ (23) എന്നിവരെ കടലില്‍ കാണാതാകുകയും പിന്നീട് കണ്ടെത്താൻ കഴിയാതെ വരികയും ചെയ്തു. ബോട്ടിലുണ്ടായിരുന്ന തമിഴ്‌നാട്, കൊല്‍ക്കത്ത സ്വദേശികളായ മറ്റ് 9 തൊഴിലാളികള്‍ പരുക്കുകളോടെയാണ് അന്ന് അത്ഭുതകരമായി രക്ഷപ്പെട്ടത്. അപകടമുണ്ടാക്കിയ ശേഷം നിർത്താതെ പോയ വിദേശ കപ്പലിനെ ഇന്ത്യൻ കോസ്റ്റ് ഗാർഡ് പിന്തുടർന്ന് പുറംകടലില്‍ തടഞ്ഞുവെക്കുകയായിരുന്നു.

ഡയറക്ടറേറ്റ് ജനറല്‍ ഓഫ് ഷിപ്പിംഗ് അധികൃതരുടെ നിർദ്ദേശപ്രകാരം കോസ്റ്റ് ഗാർഡിന്റെ ‘അനഘ്’ എന്ന കപ്പലാണ് എം.ടി. സോളിസിനെ കസ്റ്റഡിയിലെടുത്ത് വിഴിഞ്ഞം പുറംകടലില്‍ എത്തിച്ചത്. തുടര്‍ന്ന് കൊച്ചിയില്‍ നിന്നെത്തിയ ചീഫ് സർവേയറുടെ നേതൃത്വത്തിലുള്ള ഉദ്യോഗസ്ഥ സംഘം കപ്പലില്‍ കയറി വിശദമായ ശാസ്ത്രീയ പരിശോധനകള്‍ നടത്തിയിരുന്നു. അന്വേഷണം പൂർത്തിയാകുന്നതുവരെ കപ്പല്‍ തുറമുഖം വിട്ടുപോകരുതെന്ന കൊച്ചി മർക്കന്റൈല്‍ മറൈൻ വകുപ്പിന്റെ കർശന ഉത്തരവിലാണ് കപ്പല്‍ ഇത്രയും കാലം വിഴിഞ്ഞത്ത് കിടന്നത്. മാസങ്ങളോളം കപ്പല്‍ ഇവിടെ കസ്റ്റഡിയില്‍ തുടർന്നതു വഴി വാടക ഇനത്തില്‍ മാത്രം കേരള മാരിടൈം ബോർഡിന് 30 ലക്ഷത്തോളം രൂപയുടെ വരുമാനം ലഭിച്ചതായി അധികൃതർ വ്യക്തമാക്കി.

Summary: The foreign vessel M.T. Solis, which was detained at Vizhinjam for months following a mid-sea collision with a fishing boat, has set sail for Colombo after receiving clearance. The mercantile marine department in Kochi issued the travel order after successful negotiations with the ship owners regarding the March 7 accident that resulted in two fishermen missing. The vessel, carrying 20 Vietnamese crew members including Captain Le Van Tuan, contributed around 30 lakh rupees to the Kerala Maritime Board in anchorage revenue during its detention.