സി.പി.ഐ.എം കോഴിക്കോട് ജില്ലാ സെക്രട്ടറി പി. മോഹനൻ മാസ്റ്റർ, സംസ്ഥാന കമ്മിറ്റി അംഗം മെഹബൂബ്, ഡി.വൈ.എഫ്.ഐ സംസ്ഥാന പ്രസിഡന്റ് വി. വസീഫ് എന്നിവരുള്‍പ്പെടെ കണ്ടാലറിയാവുന്ന 57 പാർട്ടി നേതാക്കള്‍ക്കെതിരെ കോഴിക്കോട് മെഡിക്കല്‍ കോളേജ് പോലീസ് കേസെടുത്തു. സി.പി.ഐ.എം ജില്ലാ കമ്മിറ്റിയുടെ നേരിട്ടുള്ള ആഭിമുഖ്യത്തിലാണ് കേന്ദ്ര ഏജൻസിയുടെ റെയ്ഡ് തടസ്സപ്പെടുത്താൻ ശ്രമിച്ചതെന്നാണ് എഫ്.ഐ.ആറില്‍ (FIR) രേഖപ്പെടുത്തിയിരിക്കുന്നത്.

പി.എ. മുഹമ്മദ് റിയാസിന്റെ കോട്ടൂളിയിലുള്ള വസതിയില്‍ ഇ.ഡി റെയ്ഡ് നടക്കുന്നതിനിടെയാണ് നാടകീയ രംഗങ്ങള്‍ അരങ്ങേറിയത്. വാർത്ത പരന്നതോടെ വൻതോതില്‍ സി.പി.ഐ.എം – ഡി.വൈ.എഫ്.ഐ പ്രവർത്തകർ സ്ഥലത്തേക്ക് ഇരച്ചെത്തുകയായിരുന്നു.
പ്രതിപ്പട്ടികയിലുള്ള നേതാക്കളുടെ നേതൃത്വത്തില്‍ പൊതുറോഡില്‍ നിയമവിരുദ്ധമായി സംഘം ചേർന്ന് മുദ്രാവാക്യം വിളിക്കുകയും, റെയ്ഡിനെത്തിയ ഇ.ഡി ഉദ്യോഗസ്ഥർക്കും അവരുടെ വാഹനങ്ങള്‍ക്കും മണിക്കൂറുകളോളം മാർഗ്ഗത്തടസ്സം സൃഷ്ടിക്കുകയും ചെയ്തു.

സ്ഥലത്ത് ക്രമസമാധാന ചുമതലയിലുണ്ടായിരുന്ന പോലീസ് ഉദ്യോഗസ്ഥരുമായി സി.പി.ഐ.എം പ്രവർത്തകർ കടുത്ത ബലപ്രയോഗം നടത്തിയതായും പരാതിയുണ്ട്. ഭാരതീയ ന്യായ സംഹിത (BNS) അനുസരിച്ചുള്ള ഗുരുതര വകുപ്പുകളായ 189/2, 189/3, 191/2, 190, 285 എന്നിവ പ്രകാരമാണ് മെഡിക്കല്‍ കോളേജ് പോലീസ് കേസെടുത്തിരിക്കുന്നത്.

Story Summary: The Kozhikode Medical College Police have registered a case against 57 CPIM leaders, including District Secretary P Mohanan Master, Mehboob, and DYFI State President V Vaseef, for obstructing an Enforcement Directorate (ED) raid. The incident occurred at the Kottooli residence of CPIM MLA P.A. Mohammed Riyas during an ED search related to the monthly pay-off case. According to the FIR, the leaders blocked roads, created a ruckus, and engaged in a scuffle with the police under BNS sections 189/2, 189/3, 191/2, 190, and 285. Meanwhile, the ED has intensified its probe against Veena Vijayan, seizing her mobile phone for forensic analysis to trace the destination of the Rs 2.78 crore received from CMRL, which the agency labels as ‘proceeds of crime’.