തിരുവനന്തപുരം: മുഖ്യമന്ത്രി വി.ഡി. സതീശനെ ഫേസ്ബുക്കിലൂടെ അധിക്ഷേപിക്കുകയും പരിഹസിക്കുകയും ചെയ്ത സംഭവത്തില്‍ ഗവണ്‍മെന്റ് സ്കൂള്‍ പ്രധാനാധ്യാപകന് സസ്‌പെൻഷൻ (V.D. Satheesan).

ആറ്റിങ്ങല്‍ ഗവ. ബോയ്‌സ് ഹയർ സെക്കൻഡറി സ്കൂള്‍ പ്രിൻസിപ്പല്‍ എസ്. ജവാദിനെതിരെയാണ് പൊതുവിദ്യാഭ്യാസ വകുപ്പ് അച്ചടക്ക നടപടി സ്വീകരിച്ചത്. സർവീസില്‍ നിന്നും വിരമിക്കാൻ വെറും രണ്ട് ദിവസം മാത്രം ബാക്കിനില്‍ക്കെയാണ് അധ്യാപകന് സസ്‌പെൻഷൻ ലഭിച്ചതെന്നത് ശ്രദ്ധേയമാണ്.

മുഖ്യമന്ത്രിയുടെ ചിത്രം പരിഹാസ്യമായ രീതിയില്‍ ചിത്രീകരിച്ചുകൊണ്ട് സോഷ്യല്‍ മീഡിയയില്‍ പോസ്റ്റിട്ടു എന്നാണ് അധ്യാപകനെതിരെയുള്ള കണ്ടെത്തല്‍. സർക്കാരിന്റെയും മുഖ്യമന്ത്രിയുടെയും വിവിധ പ്രഖ്യാപനങ്ങളെ തരംതാഴ്ത്തി കാണിക്കുന്ന രീതിയിലുള്ള പോസ്റ്റുകളാണ് ഇയാള്‍ ഫേസ്ബുക്കില്‍ പങ്കുവെച്ചിരുന്നത്. സംഭവത്തില്‍ യൂത്ത് കോണ്‍ഗ്രസ് നേതാവ് നല്‍കിയ പരാതിയുടെ അടിസ്ഥാനത്തില്‍ പോലീസ് എഫ്.ഐ.ആർ. രജിസ്റ്റർ ചെയ്ത് അന്വേഷണം ആരംഭിച്ചിരുന്നു. ഇതിന് പിന്നാലെയാണ് ഇപ്പോള്‍ വകുപ്പുതല നടപടിയും ഉണ്ടായിരിക്കുന്നത്.

ഉത്തരവാദപ്പെട്ട പദവിയിലിരിക്കുന്ന ഒരു അധ്യാപകന്റെ ഭാഗത്തുനിന്നുണ്ടായ ഈ പോസ്റ്റ് സമൂഹത്തിന് തികച്ചും തെറ്റായ സന്ദേശമാണ് നല്‍കുന്നതെന്ന് പൊതുവിദ്യാഭ്യാസ വകുപ്പ് ഡെപ്യൂട്ടി സെക്രട്ടറി പുറത്തിറക്കിയ സസ്‌പെൻഷൻ ഉത്തരവില്‍ വ്യക്തമാക്കുന്നു. ഇത്തരം പ്രവണതകള്‍ അധ്യാപകരിലും വിദ്യാർത്ഥികളിലും അനാവശ്യമായ രാഷ്ട്രീയ ധ്രുവീകരണത്തിന് കാരണമാകുമെന്നും ഉത്തരവില്‍ ചൂണ്ടിക്കാണിക്കുന്നുണ്ട്.

Story Summary: S. Jawad, the principal of Attingal Govt Boys Higher Secondary School, has been suspended just two days before his retirement for posting defamatory content against Chief Minister V.D. Satheesan on Facebook.