നേപ്പാളില്‍ 1,114 പേരും ചൈനീസ് ഭാഗത്ത് 16 പേരുമാണ് മരിച്ചതെന്ന് ഏറ്റവും പുതിയ ഔദ്യോഗിക കണക്കുകള്‍ വ്യക്തമാക്കുന്നു. ഇരുരാജ്യങ്ങളിലുമായി ഏകദേശം 4,500 പേരെ ഇപ്പോഴും കാണാതായതായാണ് റിപ്പോർട്ട്. നേപ്പാളിലെ നാഷണല്‍ ഡിസാസ്റ്റർ റിസ്ക് റിഡക്ഷൻ ആൻഡ് മാനേജ്‌മെന്റ് അതോറിറ്റിയുടെ കണക്കനുസരിച്ച്‌ ഓഗസ്റ്റ് 26ന് ഉണ്ടായ ശക്തമായ മിന്നല്‍പ്രളയത്തിന് പിന്നാലെ 1,114 മൃതദേഹങ്ങള്‍ കണ്ടെത്തി. 292 പേർക്ക് പരിക്കേറ്റിട്ടുണ്ട്. 3,916 പേരെ ഇപ്പോഴും കണ്ടെത്താനായിട്ടില്ലെന്നും അധികൃതർ അറിയിച്ചു.

പ്രളയബാധിത മേഖലകളില്‍ നിന്ന് ഏകദേശം 12,000 പേരെ രക്ഷപ്പെടുത്തിയതായി നേപ്പാള്‍ അധികൃതർ വ്യക്തമാക്കി. തിരച്ചിലും രക്ഷാപ്രവർത്തനവും ശക്തമാക്കുന്നതിനായി സൈന്യവും പോലീസും ഉള്‍പ്പെടെ 21,000ത്തിലധികം സുരക്ഷാ ഉദ്യോഗസ്ഥരെയാണ് വിവിധ പ്രദേശങ്ങളില്‍ വിന്യസിച്ചിരിക്കുന്നത്. പ്രളയത്തെ തുടർന്ന് നേപ്പാളില്‍ ഏകദേശം 16 ലക്ഷം പേരെ ബാധിച്ചതായാണ് ദുരന്തനിവാരണ അതോറിറ്റിയുടെ വിലയിരുത്തല്‍. വ്യാപകമായ നാശനഷ്ടം നേരിട്ട മേഖലകളില്‍ കാണാതായവർക്കായുള്ള തിരച്ചില്‍ തുടരുകയാണ്. പ്രതികൂല കാലാവസ്ഥയും ദുഷ്കരമായ ഭൂപ്രകൃതിയും രക്ഷാപ്രവർത്തനങ്ങള്‍ക്ക് വെല്ലുവിളിയാകുന്നുണ്ട്.

അതിർത്തിയുടെ ചൈനീസ് ഭാഗത്ത് 16 പേർ മരിച്ചതായും 546 പേരെ കാണാതായതായും ചൈനീസ് ഔദ്യോഗിക വാർത്താ ഏജൻസിയായ സിൻഹുവ റിപ്പോർട്ട് ചെയ്തു. കാണാതായവരില്‍ 261 പേർ വിദേശ പൗരന്മാരാണെന്നും റിപ്പോർട്ടിലുണ്ട്. ദുരന്തത്തിന്റെ വ്യാപ്തി വർധിച്ചതോടെ ഇരുരാജ്യങ്ങളും രക്ഷാപ്രവർത്തനങ്ങള്‍ ഊർജിതമാക്കിയിരിക്കുകയാണ്. കാണാതായവരെ കണ്ടെത്തുന്നതിനും ദുരന്തബാധിതർക്ക് അടിയന്തര സഹായം എത്തിക്കുന്നതിനുമാണ് നിലവില്‍ പ്രധാന പരിഗണന നല്‍കുന്നത്.

Summary: The death toll from devastating flash floods and mudslides along the Nepal-China border has risen to 1,130, with nearly 4,500 people still missing. Nepal has reported 1,114 deaths, while 16 people have died on the Chinese side of the border.