സെറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ മാനേജിംഗ് ഡയറക്ടർ ഡോ. സൈറസ് എസ്. പൂനവല്ലയാണ് 167.20 കോടി രൂപയ്ക്ക് (ഏകദേശം 20 മില്യണ്‍ ഡോളർ) ഈ ചിത്രം സ്വന്തമാക്കിയത്. ഇന്ത്യൻ ആധുനിക കലാലോകത്ത് ഒരു ലേലത്തില്‍ ലഭിക്കുന്ന ഏറ്റവും ഉയർന്ന തുകയാണിത്.

മുംബൈയില്‍ നടന്ന സാഫ്രണ്‍ ആർട്ടിന്റെ സ്പ്രിംഗ് ലൈവ് ലേലത്തിലാണ് ഈ ചരിത്രനേട്ടം ഉണ്ടായത്. കഴിഞ്ഞ വർഷം എം.എഫ്. ഹുസൈന്റെ ‘ഗ്രാം യാത്ര’ എന്ന ചിത്രം നേടിയ 118 കോടി രൂപയുടെ റെക്കോർഡാണ് ഇതോടെ തിരുത്തപ്പെട്ടത്. 80 മുതല്‍ 120 കോടി രൂപ വരെയാണ് ഈ ചിത്രത്തിന് ലേലത്തില്‍ പ്രതീക്ഷിച്ചിരുന്നതെങ്കിലും കടുത്ത ലേലവിളികള്‍ക്കൊടുവില്‍ തുക 167 കോടി കടക്കുകയായിരുന്നു.

രാജാ രവിവർമ്മയുടെ ഔദ്യോഗിക ജീവിതത്തിന്റെ സുവർണ്ണകാലമായ 1890-കളിലാണ് ഈ എണ്ണച്ചായ ചിത്രം നിർമ്മിക്കപ്പെട്ടത്. മാതൃസ്‌നേഹത്തിന്റെ തീവ്രത വെളിപ്പെടുത്തുന്ന ഈ ചിത്രത്തില്‍ യശോദ പശുവിനെ കറക്കുന്നതും പിന്നിലൂടെ കൃഷ്ണൻ പാല് ചോദിക്കുന്നതുമാണ് ചിത്രീകരിച്ചിരിക്കുന്നത്. ഈ അപൂർവ്വ ചിത്രം സ്വന്തമാക്കാൻ കഴിഞ്ഞതില്‍ താൻ അഭിമാനിക്കുന്നുവെന്ന് സൈറസ് പൂനവല്ല പറഞ്ഞു. ഇതൊരു ദേശീയ നിധിയാണെന്നും ഇടയ്ക്കിടെ പൊതുജനങ്ങള്‍ക്ക് കാണാനായി സൗകര്യമൊരുക്കുമെന്നും അദ്ദേഹം വ്യക്തമാക്കി.

ഇന്ത്യൻ കലാവസ്തുക്കളുടെ മൂല്യം ആഗോളതലത്തില്‍ വർദ്ധിച്ചുവരുന്നതിന്റെ തെളിവാണ് ഈ ലേലമെന്ന് സാഫ്രണ്‍ ആർട്ട് പ്രസിഡന്റ് മിനല്‍ വസിറാണി അഭിപ്രായപ്പെട്ടു. തിരുവിതാംകൂർ രാജവംശത്തില്‍ നിന്നുള്ള രാജാ രവിവർമ്മയുടെ ചിത്രങ്ങള്‍ എന്നും ലേലവിപണിയില്‍ പ്രിയപ്പെട്ടവയാണ്. അദ്ദേഹത്തിന്റെ ചിത്രകലയിലെ സങ്കേതങ്ങളും ഭാവതീവ്രതയും ഇന്നും ലോകമെമ്പാടുമുള്ള കലാപ്രേമികളെ ആകർഷിക്കുന്നു.