തിരുവനന്തപുരം: കേരളത്തിന്റെ നിലവിലെ സാമ്പത്തിക സ്ഥിതിയെക്കുറിച്ചും കഴിഞ്ഞ പത്ത് വർഷത്തെ വരുമാന-ചെലവ് കണക്കുകളെക്കുറിച്ചുമുള്ള നിർണായക ധവളപത്രം ഇന്ന് നിയമസഭയില്‍ അവതരിപ്പിക്കും (Kerala Assembly White Paper State Finance).

മുൻ കാബിനറ്റ് സെക്രട്ടറി കെ.എം. ചന്ദ്രശേഖർ അധ്യക്ഷനായ വിദഗ്ധ സമിതി തയ്യാറാക്കിയ ഈ ധവളപത്രത്തിന് രാവിലെ എട്ടിന് ചേരുന്ന മന്ത്രിസഭാ യോഗം അന്തിമ അംഗീകാരം നല്‍കും. സെന്റർ ഫോർ ഡെവലപ്‌മെന്റ് സ്റ്റഡീസ് (സിഡിഎസ്) ഡയറക്ടർ ഡി. വീരമണി, മുൻ സിഡിഎസ് ഡയറക്ടർ ഡി. നാരായണ എന്നിവർ അംഗങ്ങളായ സമിതിയുടെ കണ്‍വീനർ ധനവകുപ്പ് അഡീഷണല്‍ ചീഫ് സെക്രട്ടറി കെ.ആർ. ജ്യോതിലാലാണ്. യുഡിഎഫ് അധികാരത്തിലെത്തിയാല്‍ സംസ്ഥാനത്തിന്റെ ധനസ്ഥിതി വ്യക്തമാക്കുന്ന ധവളപത്രം പുറത്തിറക്കുമെന്നത് മുന്നണിയുടെ പ്രധാന തിരഞ്ഞെടുപ്പ് വാഗ്ദാനങ്ങളിലൊന്നായിരുന്നു; ഇതിന്റെ അടിസ്ഥാനത്തിലാണ് ധനവകുപ്പിന്റെ ചുമതല കൂടി വഹിക്കുന്ന മുഖ്യമന്ത്രി വി.ഡി. സതീശൻ ധവളപത്രം സഭയില്‍ സമർപ്പിക്കുന്നത്.

കഴിഞ്ഞ പത്ത് വർഷത്തിനിടയില്‍ സംസ്ഥാന സർക്കാരിന് സംഭവിച്ച വരുമാനച്ചോർച്ച, നികുതി പിരിവിലെ ഗുരുതരമായ വീഴ്ചകള്‍, ധനകാര്യ മാനേജ്മെന്റിലെ പാളിച്ചകള്‍ എന്നിവയെക്കുറിച്ചുള്ള വിശദമായ വിലയിരുത്തലുകള്‍ ഈ റിപ്പോർട്ടില്‍ ഉള്‍പ്പെടുത്തിയിട്ടുണ്ടെന്നാണ് സൂചന. വിവിധ ജനക്ഷേമ പദ്ധതികള്‍ക്കായി കേന്ദ്ര സർക്കാരില്‍ നിന്ന് ലഭിച്ച ഫണ്ടുകളുടെ വിനിയോഗം, ഫണ്ട് വകമാറ്റി ചെലവഴിച്ചതുമായി ബന്ധപ്പെട്ട വിവരങ്ങള്‍, നിലവിലെ കടുത്ത സാമ്പത്തിക പ്രതിസന്ധി മറികടക്കാനുള്ള പ്രായോഗിക പരിഹാര നിർദ്ദേശങ്ങള്‍ എന്നിവയും ധവളപത്രത്തിലുണ്ട്. പുതിയ സർക്കാർ അധികാരമേറ്റതിന് പിന്നാലെ തുടക്കം മുതല്‍ ബന്ധു നിയമന വിവാദങ്ങള്‍ ഉള്‍പ്പെടെയുള്ള തെറ്റായ നടപടികള്‍ ഉണ്ടാകുന്നുവെന്ന് യാക്കോബായ സഭ മുൻ മെത്രാപ്പോലീത്ത ഗീവർഗീസ് മാർ കൂറിലോസ് ഉള്‍പ്പെടെയുള്ളവർ വിമർശനം ഉന്നയിക്കുന്ന പശ്ചാത്തലത്തിലാണ് ഈ ധവളപത്രം സഭയുടെ മേശപ്പുറത്ത് വയ്ക്കുന്നത്.

അതേസമയം, എല്‍ഡിഎഫ് ഭരണകാലത്തെ ധനസ്ഥിതിയെക്കുറിച്ച്‌ യുഡിഎഫ് സർക്കാർ ധവളപത്രം ഇറക്കുമെന്ന മുഖ്യമന്ത്രി വി.ഡി. സതീശന്റെ സഭയിലെ പരാമർശത്തിനെതിരെ പ്രതിപക്ഷ നേതാവ് പിണറായി വിജയൻ ശക്തമായ ഭാഷയിലാണ് കഴിഞ്ഞ ദിവസം പ്രതികരിച്ചത്. നിയമസഭയില്‍ വിലക്കയറ്റത്തെ കുറിച്ചുള്ള അടിയന്തര പ്രമേയ നോട്ടീസിനിടെ സംസാരിക്കവെ, ധവളപത്രം വരുമ്പോള്‍ അത് നേരിടാൻ തങ്ങള്‍ തയ്യാറാണെന്നും എന്നാല്‍ ആ ‘ഉമ്മാക്കി’ കാണിച്ച്‌ പ്രതിപക്ഷത്തിന്റെ വായടപ്പിക്കാൻ നോക്കേണ്ടെന്നും പിണറായി വിജയൻ തുറന്നടിച്ചു. ധവളപത്രം പുറത്തുവരുന്നതോടെ മുൻ സർക്കാരിന്റെ കാലത്തെ സാമ്പത്തിക വിനിയോഗത്തെ ചൊല്ലി ഭരണ-പ്രതിപക്ഷ കക്ഷികള്‍ തമ്മില്‍ നിയമസഭയില്‍ വരും ദിവസങ്ങളില്‍ കടുത്ത രാഷ്ട്രീയ വാദപ്രതിവാദങ്ങള്‍ക്കും പോരാട്ടങ്ങള്‍ക്കും വഴിയൊരുങ്ങുമെന്ന് ഉറപ്പായിട്ടുണ്ട്.

Summary: The comprehensive white paper on Kerala’s financial status, prepared by the expert committee led by former Cabinet Secretary K.M. Chandrasekhar, will be presented in the Legislative Assembly today. The report evaluates the state’s income-expenditure data, tax collection failures, and financial leakages over the past ten years while offering solutions to mitigate the ongoing fiscal crisis. Chief Minister V.D. Satheesan’s move has triggered political sparks, with Opposition Leader Pinarayi Vijayan retorting that the opposition cannot be silenced using the white paper as a scare tactic.