കഴിഞ്ഞ ദിവസം ഏഴ് പ്രതികളെ റിമാൻഡ് ചെയ്തതിന് പിന്നാലെ, പാളയം ലോക്കല്‍ കമ്മിറ്റി സെക്രട്ടറിയും മുൻ കൗണ്‍സിലറുമായ ഐ.പി ബിനു ഉള്‍പ്പെടെ 11 പ്രതികളെക്കൂടിയാണ് ഇന്ന് കോടതി റിമാൻഡ് ചെയ്ത് ജയിലിലടച്ചത്.

പ്രതികള്‍ കല്ലുകളും മാരകായുധങ്ങളും ഉപയോഗിച്ച്‌ ഇ.ഡി ഉദ്യോഗസ്ഥരെ വധിക്കാൻ ബോധപൂർവ്വം ശ്രമിച്ചുവെന്നും, അറസ്റ്റിലായ പലർക്കും ക്രിമിനല്‍ പശ്ചാത്തലമുണ്ടെന്നും പോലീസ് കോടതിയില്‍ സമർപ്പിച്ച റിമാൻഡ് റിപ്പോർട്ടില്‍ വ്യക്തമാക്കുന്നുണ്ട്. ഇന്ന് റിമാൻഡിലായ പ്രതികളെ വൈദ്യപരിശോധനയ്ക്കായി ജനറല്‍ ആശുപത്രിയില്‍ എത്തിച്ചപ്പോള്‍, ആശുപത്രി പരിസരത്ത് തടിച്ചുകൂടിയ സിപിഎം പ്രവർത്തകർ ഇവർക്കായി ശക്തമായ മുദ്രാവാക്യം വിളികള്‍ മുഴക്കിയത് നേരിയ രീതിയില്‍ സംഘർഷാവസ്ഥ സൃഷ്ടിച്ചു.

അതേസമയം, ഇ.ഡി ഉദ്യോഗസ്ഥർക്ക് നേരെ നടന്ന അക്രമത്തിലെ മുഖ്യസൂത്രധാരനും ഒന്നാം പ്രതിയുമായ ദിനകറിനെ ഇന്ന് വട്ടിയൂർക്കാവ് പോലീസ് അറസ്റ്റ് ചെയ്തു. ഇ.ഡി ഉദ്യോഗസ്ഥരുടെ വാഹനം റെയ്ഡ് കഴിഞ്ഞ് പുറത്തേക്ക് ഇറങ്ങിയ സമയത്ത് കൈകൊണ്ടും കമ്പുകൊണ്ടും തല്ലിത്തകർക്കാൻ നേതൃത്വം നല്‍കിയത് വട്ടിയൂർക്കാവ് കൊടുങ്ങാനൂർ ബ്രാഞ്ച് അംഗമായ ഈ ദിനകറാണെന്ന് പോലീസ് കണ്ടെത്തി. വട്ടിയൂർക്കാവ് പോലീസ് സ്റ്റേഷനിലെ റൗഡി ലിസ്റ്റില്‍ ഉള്‍പ്പെട്ടിട്ടുള്ള സ്ഥിരം കുറ്റവാളിയാണ് ഇയാള്‍. കേസില്‍ ഉള്‍പ്പെട്ട ആറ്റുകാല്‍ മുൻ കൗണ്‍സിലർ ഉണ്ണി, പാളയം സന്തോഷ് എന്നിവരുള്‍പ്പെടെയുള്ള മറ്റ് പ്രതികളെ പിടികൂടാനായി പോലീസ് തിരച്ചില്‍ ഊർജ്ജിതമാക്കിയിട്ടുണ്ട്.

Story Summary: Eighteen CPI(M) workers, including local committee secretary I.P. Binu, have been remanded in custody for attacking ED officials in Thiruvananthapuram. The main accused, Dinakaran, a branch member with a criminal record, was arrested today.