ന്യൂഡല്ഹി/കൊല്ക്കത്ത: പശ്ചിമ ബംഗാളിലെ വോട്ടെണ്ണല് നടപടികളില് കേന്ദ്രസർക്കാർ ജീവനക്കാരെയും പൊതുമേഖലാ ജീവനക്കാരെയും വിന്യസിക്കാനുള്ള തിരഞ്ഞെടുപ്പ് കമ്മീഷന്റെ തീരുമാനത്തിനെതിരെ തൃണമൂല് കോണ്ഗ്രസ് (TMC) സുപ്രീംകോടതിയെ സമീപിച്ചു (TMC vs Election Commission).
വോട്ടെണ്ണല് ആരംഭിക്കാൻ ദിവസങ്ങള് മാത്രം ബാക്കിനില്ക്കെ ഹർജി നാളെ അടിയന്തരമായി പരിഗണിക്കണമെന്ന് ടിഎംസി ആവശ്യപ്പെട്ടു.
ഓരോ വോട്ടെണ്ണല് ടേബിളിലും കുറഞ്ഞത് ഒരു കേന്ദ്രസർക്കാർ ജീവനക്കാരനെയെങ്കിലും സൂപ്പർവൈസറായി നിയമിക്കണമെന്ന് ബംഗാള് അഡീഷണല് ചീഫ് ഇലക്ടറല് ഓഫീസർ (CEO) പുറപ്പെടുവിച്ച ഉത്തരവാണ് തർക്കത്തിന് ആധാരം. ഇത്തരം നിർദ്ദേശങ്ങള് പുറപ്പെടുവിക്കാൻ തിരഞ്ഞെടുപ്പ് കമ്മീഷന് മാത്രമേ അധികാരമുള്ളൂവെന്നും അഡീഷണല് സിഇഒയ്ക്ക് ഇതിനുള്ള അവകാശമില്ലെന്നുമാണ് തൃണമൂലിന്റെ വാദം. കേന്ദ്ര ജീവനക്കാരുടെ സാന്നിധ്യം വോട്ടെണ്ണല് പ്രക്രിയയില് രാഷ്ട്രീയമായ ഇടപെടലുകള്ക്ക് കാരണമായേക്കുമെന്ന് മമത ബാനർജി ആശങ്ക പ്രകടിപ്പിച്ചു.
ബംഗാളിന്റെ ഭൂമിശാസ്ത്രവും രാഷ്ട്രീയ സാഹചര്യങ്ങളും അറിയാത്ത പുറത്തുനിന്നുള്ള ഉദ്യോഗസ്ഥരെയും പോലീസ് സേനയെയും വിന്യസിക്കുന്നത് ടിഎംസി പ്രവർത്തകരെ ലക്ഷ്യം വെച്ചാണെന്ന് മുഖ്യമന്ത്രി മമത ബാനർജി ആരോപിച്ചു. സംസ്ഥാനത്തെ രണ്ടാം ഘട്ട വോട്ടെടുപ്പിനിടെയുണ്ടായ സംഘർഷങ്ങള്ക്കിടയിലാണ് തിരഞ്ഞെടുപ്പ് കമ്മീഷനെതിരെ ടിഎംസി നിയമപോരാട്ടം ശക്തമാക്കുന്നത്.
ബംഗാളിലെ വിവിധ ബൂത്തുകളില് നാളെ (മെയ് 2, ശനി) റീപോളിംഗ് നടക്കാനിരിക്കെയാണ് ഈ രാഷ്ട്രീയ നീക്കം. തിങ്കളാഴ്ചയാണ് വോട്ടെണ്ണല് നിശ്ചയിച്ചിരിക്കുന്നത്. അതിനാല് സുപ്രീംകോടതി ഈ ഹർജിയില് നാളെ തന്നെ തീരുമാനമെടുക്കുമോ എന്നത് രാഷ്ട്രീയ കേന്ദ്രങ്ങള് ഉറ്റുനോക്കുന്നു.
Story Summary: The Trinamool Congress (TMC) has moved the Supreme Court against the Election Commission’s decision to appoint central government and PSU employees as counting supervisors in West Bengal. The party questioned the legal authority of the Additional CEO in issuing such an order and demanded an urgent hearing tomorrow. Chief Minister Mamata Banerjee alleged that deploying “outside” officials is a strategic move to target TMC workers.