കോഴിക്കോട്: വടകര ലോക്സഭാ തിരഞ്ഞെടുപ്പ് കാലത്ത് വലിയ രാഷ്ട്രീയ കോളിളക്കം സൃഷ്ടിച്ച വിവാദമായ 'കാഫിർ സ്ക്രീൻഷോട്ട്' കേസില് പുനരന്വേഷണത്തിനായി സംസ്ഥാന ആഭ്യന്തര വകുപ്പ് പ്രത്യേക അന്വേഷണ സംഘത്തെ (SIT) നിയോഗിച്ചു (Kafir screenshot case).
പ്രതികളെ കണ്ടെത്താനാകാത്തതിനെ തുടർന്ന് മുൻപ് പോലീസ് അന്വേഷണം അവസാനിപ്പിക്കാൻ ഒരുങ്ങിയിരുന്ന കേസാണിത്. എന്നാല്, യഥാർത്ഥ പ്രതികളെ നിയമത്തിന് മുന്നില് കൊണ്ടുവരണമെന്ന് ആവശ്യപ്പെട്ട് പാറക്കല് അബ്ദുള്ള എം.എല്.എ ആഭ്യന്തര വകുപ്പിന് നല്കിയ പരാതിയുടെ അടിസ്ഥാനത്തിലാണ് ഇപ്പോള് നിർണ്ണായകമായ പുനരന്വേഷണ ഉത്തരവ് പുറത്തിറങ്ങിയിരിക്കുന്നത്.
കോഴിക്കോട് റൂറല് എസ്.പിയുടെ നേരിട്ടുള്ള മേല്നോട്ടത്തിലാണ് പ്രത്യേക അന്വേഷണ സംഘം പ്രവർത്തിക്കുക. ജില്ലാ ക്രൈംബ്രാഞ്ച് ഡിവൈ.എസ്.പി ടി. മനോഹരനാണ് മുഖ്യ അന്വേഷണ ഉദ്യോഗസ്ഥൻ. വടകര പോലീസ് സ്റ്റേഷനിലെ ഇൻസ്പെക്ടർ ഉള്പ്പെടെ ഏഴംഗ ഉദ്യോഗസ്ഥരാണ് ഈ പ്രത്യേക സംഘത്തിലുള്ളത്. വടകര പോലീസ് സ്റ്റേഷനില് രജിസ്റ്റർ ചെയ്ത 410/2024, 411/2024 എന്നീ രണ്ട് കേസുകളാണ് എസ്.ഐ.ടി ഇനി വിശദമായി അന്വേഷിക്കുക.
2024-ലെ ലോക്സഭാ തിരഞ്ഞെടുപ്പിന്റെ തൊട്ടുതലേദിവസമാണ് വടകരയിലെ എല്.ഡി.എഫ് സ്ഥാനാർത്ഥിയായിരുന്ന കെ.കെ. ശൈലജയ്ക്കെതിരെ വർഗ്ഗീയ ധ്രുവീകരണം ലക്ഷ്യമിട്ടുള്ള വ്യാജ സ്ക്രീൻഷോട്ട് സന്ദേശം സമൂഹമാധ്യമങ്ങളില് പ്രത്യക്ഷപ്പെടുന്നത്. തുടർന്നുണ്ടായ പരാതിയില് എം.എസ്.എഫ് നേതാവ് പി.കെ. മുഹമ്മദ് കാസിമിന്റെ പേരില് കേസെടുത്തുവെങ്കിലും അദ്ദേഹത്തിന് ഇതില് പങ്കില്ലെന്ന് പിന്നീട് ഹൈക്കോടതി വ്യക്തമാക്കുകയായിരുന്നു. എന്നാല്, കാസിമിന്റെ മൊബൈല് ഫോണ് ഇതുവരെ വിട്ടുനല്കുകയോ കേസ് നടപടികള് പൂർണ്ണമായി ഒഴിവാക്കുകയോ ചെയ്യാത്തതിനാല് അദ്ദേഹത്തിന് പാസ്പോർട്ട് പുതുക്കാൻ പോലും സാധിക്കാത്ത സ്ഥിതിയാണ്.
ഇടതുപക്ഷ സൈബർ ഗ്രൂപ്പുകളായ ‘പോരാളി ഷാജി’, ‘അമ്പാടിമുക്ക് സഖാക്കള്’ തുടങ്ങിയ പേജുകളുടെ അഡ്മിന്മാരും ഡി.വൈ.എഫ്.ഐ നേതാവ് റിബേഷുമാണ് ഈ വ്യാജ സന്ദേശം ആദ്യം പ്രചരിപ്പിച്ചതെന്ന് മുൻപ് പോലീസ് കോടതിയില് നല്കിയ റിപ്പോർട്ടില് പരാമർശിച്ചിരുന്നു. എങ്കിലും സന്ദേശത്തിന്റെ യഥാർത്ഥ ഉറവിടം (Source) കണ്ടെത്താൻ കഴിഞ്ഞ രണ്ട് വർഷമായി പോലീസിന് സാധിച്ചിരുന്നില്ല. നിലവിലെ ഭരണമാറ്റത്തിന് പിന്നാലെ, അന്വേഷണം കൃത്യമായ ദിശയില് നടത്തി കുറ്റക്കാരെ കണ്ടെത്താൻ ഓരോ രണ്ടാഴ്ച കൂടുമ്പോഴും അന്വേഷണ പുരോഗതി റിപ്പോർട്ട് സമർപ്പിക്കാൻ സംസ്ഥാന പോലീസ് മേധാവി എസ്.ഐ.ടിക്ക് കർശന നിർദ്ദേശം നല്കിയിട്ടുണ്ട്.
Story Summary: The Home Department has formed a Special Investigation Team (SIT) to reinvestigate the controversial ‘Kafir screenshot’ case from the 2024 Vadakara Lok Sabha elections. Led by the Kozhikode Rural SP and managed by Crime Branch DYSP T Manoharan, the team will probe the source of the communally divisive fake message following a complaint from MLA Parakkal Abdulla.