തിരുവനന്തപുരം: കേരള നിയമസഭാ തിരഞ്ഞെടുപ്പിനുള്ള ബിജെപിയുടെ പ്രകടനപത്രിക ഏറെ ആവേശത്തോടെയാണ് പ്രവർത്തകർ സ്വീകരിച്ചത് (BJP Kerala Manifesto 2026).
“വികസിത കേരളം” എന്ന കാഴ്ചപ്പാട് മുന്നോട്ട് വെക്കുന്ന പത്രികയില് അടിസ്ഥാന ആവശ്യങ്ങള്ക്കും കുടുംബങ്ങളുടെ സാമ്പത്തിക സുരക്ഷയ്ക്കും മുൻഗണന നല്കുന്നതാണ് ബിജെപിയുടെ പ്രകടനപത്രിക. ഏപ്രില് 9-ന് വോട്ടെടുപ്പും മെയ് 4-ന് വോട്ടെണ്ണലും നടക്കാനിരിക്കെയാണ് വോട്ടർമാരെ ആകർഷിക്കുന്ന വാഗ്ദാനങ്ങളുമായി ബിജെപി രംഗത്തെത്തിയത്.
സ്ത്രീ ശാക്തീകരണവും സാമ്പത്തിക സഹായവും: ഭക്ഷ്യ-ആരോഗ്യ സുരക്ഷാ കാർഡ് വഴി സ്ത്രീകള്ക്ക് എല്ലാ മാസവും 2,500 രൂപ ലഭ്യമാക്കും. ബിപിഎല് കുടുംബങ്ങള്ക്ക് പ്രതിവർഷം 30,000 രൂപ ഇതിലൂടെ ഉറപ്പാക്കും.ദരിദ്രരായ വനിതകള്, വിധവകള്, 70 വയസ്സിന് മുകളിലുള്ള മുതിർന്ന പൗരന്മാർ എന്നിവർക്ക് പ്രതിമാസം 3,000 രൂപ പെൻഷൻ നല്കും-തുടങ്ങിയവയാണ് പത്രികയിലെ പ്രധാന വാഗ്ദാനങ്ങള്.ഓരോ വീടിനും പ്രതിമാസം 20,000 ലിറ്റർ വരെ സൗജന്യ വെള്ളം. ഗാർഹിക വൈദ്യുതിക്ക് പ്രത്യേക സബ്സിഡി. കൂടാതെ പാവപ്പെട്ട കുടുംബങ്ങള്ക്ക് വർഷത്തില് രണ്ട് പാചകവാതക സിലിണ്ടറുകള് (ഓണം, ക്രിസ്മസ് കാലയളവില്) സൗജന്യമായി നല്കും.
എല്ലാ മലയാളികള്ക്കും ആയുഷ്മാൻ ഭാരത് പദ്ധതി ലഭ്യമാക്കും. കേരളത്തില് ലോകോത്തര നിലവാരമുള്ള എയിംസ് (AIIMS) സ്ഥാപിക്കുമെന്നും ബിജെപി വാഗ്ദാനം ചെയ്യുന്നു. തിരുവനന്തപുരത്ത് നിന്ന് കണ്ണൂരിലേക്ക് അതിവേഗ റെയില്വേ ഇടനാഴി സ്ഥാപിക്കുന്നത് പ്രകടനപത്രികയിലെ പ്രധാന വാഗ്ദാനമാണ്. ഇത് യാത്രാ സമയം കുറയ്ക്കാനും വ്യാപാര-ടൂറിസം മേഖലകളില് പുതിയ തൊഴിലവസരങ്ങള് സൃഷ്ടിക്കാനും സഹായിക്കുമെന്ന് ബിജെപി അവകാശപ്പെടുന്നു.
ശബരിമല, ഗുരുവായൂർ തുടങ്ങിയ ക്ഷേത്രങ്ങളുടെ നടത്തിപ്പില് ഭക്തർക്ക് കൂടുതല് പങ്കാളിത്തം ഉറപ്പാക്കും. ശബരിമല വികസനത്തിനായി പ്രത്യേക ദൗത്യം നടപ്പിലാക്കും. കൂടാതെ, ശബരിമലയിലെ സ്വർണ്ണ മോഷണക്കേസില് സമയബന്ധിതമായ സിബിഐ അന്വേഷണം നടത്തുമെന്നും പ്രകടനപത്രികയില് പറയുന്നു.
ഓരോ കുടുംബത്തിനും അന്തസ്സും സുരക്ഷയും ഉറപ്പാക്കി കേരളത്തെ വികസനത്തിന്റെ പുതിയ പാതയിലേക്ക് നയിക്കുകയാണ് ലക്ഷ്യമെന്ന് ബിജെപി നേതൃത്വം വ്യക്തമാക്കി. ത്രികോണ മത്സരം ശക്തമായ കഴക്കൂട്ടം ഉള്പ്പെടെയുള്ള മണ്ഡലങ്ങളില് ഈ വാഗ്ദാനങ്ങള് വലിയ ചർച്ചകള്ക്ക് വഴിവെക്കും.
Story Summary:
The BJP released its manifesto for the 2026 Kerala Assembly Elections, titled “Vikasitha Keralam.” Key promises include a monthly financial aid of ₹2,500 for women via food-health security cards, a ₹3,000 monthly pension for senior citizens and widows, and 20,000 liters of free water per household. The manifesto also guarantees the establishment of an AIIMS, a high-speed railway corridor from Thiruvananthapuram to Kannur, and a CBI probe into the Sabarimala gold theft case.