തിരുവനന്തപുരം: വിഴിഞ്ഞം തുറമുഖത്തിന്റെ ഓഹരികള് സർക്കാർ അനുമതിയില്ലാതെ കൈമാറ്റം ചെയ്തത് നിയമവിരുദ്ധമാണെന്നും, ഇത് സംസ്ഥാനത്തിന്റെ താല്പ്പര്യത്തിന് വിരുദ്ധമാണെന്നും പ്രതിപക്ഷനേതാവ് പിണറായി വിജയൻ ആരോപിച്ചു.
മദ്യനികുതി ഇളവ് അടക്കമുള്ള വിഷയങ്ങളില് കോർപ്പറേറ്റ് മുതലാളിമാരെ സഹായിക്കുന്ന നിലപാടാണ് സർക്കാരിന്റേതെന്നും അദ്ദേഹം കുറ്റപ്പെടുത്തി.(Pinarayi Vijayan Alleges Illegal Vizhinjam Port Share Transfer And Corporate Favoring Liquor Tax Cuts)
അദാനി ഗ്രൂപ്പിന്റെ ഓഹരി കൈമാറ്റം സംബന്ധിച്ച രഹസ്യനീക്കങ്ങള് സർക്കാരിന്റെ അറിവോടെയാണോ എന്ന് മുഖ്യമന്ത്രി വ്യക്തമാക്കണമെന്നും പിണറായി ആവശ്യപ്പെട്ടു. കരാർ പ്രകാരം സർക്കാരിന്റെ മുൻകൂർ അനുമതിയില്ലാതെ ഇത്തരമൊരു നീക്കം നടത്താൻ അദാനി ഗ്രൂപ്പിന് എങ്ങനെ ധൈര്യം ലഭിച്ചു? ജൂണ് 29-ന് കരാർ ഒപ്പിട്ടുകഴിഞ്ഞു, സെബിക്ക് നല്കിയ അപേക്ഷയില് ഇത് വ്യക്തമാണ്. ഇത് വിഴിഞ്ഞം തുറമുഖത്തെ ബഹുരാഷ്ട്ര കമ്പനിയായ എം.എസ്.സിക്ക് തീറെഴുതാനുള്ള ആദ്യപടിയാണെന്നും അദ്ദേഹം ആരോപിച്ചു. ഇത് വിഴിഞ്ഞത്ത് കുത്തകവല്ക്കരണത്തിന് വഴിയൊരുക്കുകയും സംസ്ഥാനത്തിന് വലിയ സാമ്പത്തിക നഷ്ടമുണ്ടാക്കുകയും ചെയ്യും.
മദ്യക്കമ്പനികള്ക്ക് നികുതിയിളവ് നല്കിയതിനെതിരായ നിലപാട് പ്രതിപക്ഷത്തിന്റേത് മാത്രമല്ല, സമൂഹത്തിന്റെ വിവിധ തുറകളിലുള്ളവരുടേതാണെന്നും പിണറായി വ്യക്തമാക്കി. വി.എം. സുധീരൻ, ടി.എൻ. പ്രതാപൻ തുടങ്ങി നിരവധി നേതാക്കളും മത-സാമൂഹിക സംഘടനകളും ഇതിനെതിരെ ആശങ്ക പ്രകടിപ്പിച്ചിട്ടുണ്ട്. ഇവരെയാകെയാണോ മുഖ്യമന്ത്രി വിമർശിക്കുന്നതെന്ന് അദ്ദേഹം ചോദിച്ചു. വീര്യം കുറഞ്ഞ മദ്യത്തിന്റെ നികുതി 251 ശതമാനത്തില് നിന്ന് 120 ശതമാനമായി കുറച്ചത് മദ്യക്കമ്പനികളെ ലാഭമുണ്ടാക്കാൻ സഹായിക്കാനാണ്. ഈ നീക്കം കോടതികളില് അനുകൂല വിധി സമ്പാദിക്കാൻ കമ്പനികളെ സഹായിക്കും.
യുവതലമുറയെ മദ്യപാനത്തിലേക്ക് ആകർഷിക്കുന്ന സാമൂഹിക വിപത്താണ് ഇതെന്നും, എല്ഡിഎഫ് സർക്കാർ ഹോർട്ടി വൈൻ പ്രോത്സാഹിപ്പിക്കാൻ ആലോചിച്ചപ്പോള് ഇപ്പോഴത്തെ സർക്കാർ സ്പിരിറ്റ് അധിഷ്ഠിത മദ്യത്തിന് നികുതിയിളവ് നല്കി നാടിനെ മദ്യത്തില് മുക്കുകയാണെന്നും പിണറായി കുറ്റപ്പെടുത്തി. നിയമസഭയില് ധനബില് പാസാക്കിയ രീതി ചട്ടവിരുദ്ധമാണെന്ന് പിണറായി വിജയൻ പറഞ്ഞു. സബ്ജക്ട് കമ്മിറ്റിക്ക് വിടാതെയും സഭയെ തെറ്റിദ്ധരിപ്പിച്ചും ബില് പാസാക്കിയത് അനാവശ്യമായ ധൃതി കാണിച്ചാണ്. മുഖ്യമന്ത്രി നല്കിയ ഉറപ്പുകള് ലംഘിക്കപ്പെട്ടുവെന്നും, സർക്കാർ പൂർണ്ണമായും കോർപ്പറേറ്റ് താല്പ്പര്യങ്ങള്ക്കൊപ്പമാണ് നിലകൊള്ളുന്നതെന്നും അദ്ദേഹം കൂട്ടിച്ചേർത്തു.
Story Summary
Opposition leader Pinarayi Vijayan has alleged that the transfer of shares in the Vizhinjam port project by the Adani Group is illegal and lacks mandatory government approval. He further criticized the government’s decision to slash liquor taxes, labeling it a corporate-favoring move that ignores societal concerns and bypasses legislative procedures, and demanded accountability from the Chief Minister on both issues.