പ്രയാഗ്‌രാജിലെ നിബി കല ഗ്രാമവാസിയായ 22-കാരൻ രാംചന്ദ്ര ദുബെയാണ് കാണാതായത്. (Indian sailor missing Ukraine)

ജൂലൈ 25-നാണ് രാംചന്ദ്ര ജോലി ചെയ്തിരുന്ന എംവി എജിഎൻ റാഗ്നർ എന്ന വ്യാപാരക്കപ്പലിന് ഡ്രോണ്‍ ആക്രമണമുണ്ടായത്. കപ്പലില്‍ നാല് ഇന്ത്യക്കാർ ഉള്‍പ്പെടെ എട്ടുപേരുണ്ടായിരുന്നുവെന്നാണ് വിവരം. ആക്രമണത്തിനിടെ രക്ഷപ്പെടാനായി ഇന്ത്യൻ നാവികർ കടലിലേക്ക് ചാടിയതായും തുടർന്ന് നടത്തിയ രക്ഷാപ്രവർത്തനത്തില്‍ രണ്ടുപേരെ സുരക്ഷിതമായി കണ്ടെത്തിയതായും റിപ്പോർട്ടുണ്ട്. രാംചന്ദ്രയും മറ്റൊരു ഇന്ത്യൻ പൗരനും ഇതുവരെ കണ്ടെത്താനായിട്ടില്ല.

ആക്രമണത്തിന് തലേദിവസം രാത്രിയാണ് രാംചന്ദ്ര അമ്മ കല്പന ദുബെയെ അവസാനമായി ഫോണില്‍ വിളിച്ചത്. യുക്രൈനില്‍നിന്ന് കപ്പല്‍ പുറപ്പെട്ടതായി അദ്ദേഹം അറിയിച്ചിരുന്നുവെന്ന് കുടുംബം പറഞ്ഞു. അടുത്തിടെ മർച്ചന്റ് നേവിയില്‍ ചേർന്ന രാംചന്ദ്രയുടെ രണ്ടാമത്തെ വിദേശയാത്രയായിരുന്നു ഇത്.

കാണാതായ നാവികനെ കണ്ടെത്തുന്നതിനായി യുക്രൈൻ രക്ഷാസംഘങ്ങള്‍ തിരച്ചില്‍ തുടരുകയാണ്. സംഭവത്തില്‍ വിദേശകാര്യ മന്ത്രാലയം ഇടപെട്ടിട്ടുണ്ടെന്നും കീവിലെ ഇന്ത്യൻ എംബസി സ്ഥിതിഗതികള്‍ സൂക്ഷ്മമായി നിരീക്ഷിക്കുന്നുണ്ടെന്നും അധികൃതർ അറിയിച്ചു. കാണാതായ രണ്ടുപേരെ കണ്ടെത്താനുള്ള ശ്രമങ്ങള്‍ തുടരുകയാണെന്നും എംബസി വ്യക്തമാക്കി. രാംചന്ദ്രയെ കണ്ടെത്തുന്നതിനായി കേന്ദ്ര സർക്കാർ യുക്രൈൻ അധികൃതരുമായും അന്താരാഷ്ട്ര ഏജൻസികളുമായും ബന്ധപ്പെടണമെന്ന് കുടുംബം ആവശ്യപ്പെട്ടു. യുവ നാവികൻ സുരക്ഷിതനായി തിരിച്ചെത്തുമെന്ന പ്രതീക്ഷയിലാണ് കുടുംബാംഗങ്ങള്‍.

Summary : Two Indian sailors, including 22-year-old Ram Chandra Dubey from Uttar Pradesh, went missing after a merchant vessel was hit by a drone near Ukraine’s Odesa port. Two other Indian crew members were rescued, while search operations for the missing sailors are continuing.