ലഖ്‌നൗ: ഉത്തർപ്രദേശിലെ അംബേദ്കർ നഗർ ജില്ലയില്‍ ഒരു കുടുംബത്തിലെ നാല് കുട്ടികളെ വീടിനുള്ളില്‍ മരിച്ച നിലയില്‍ കണ്ടെത്തി (Four Children Killed UP).

അക്ബർപൂർ പോലീസ് സ്റ്റേഷൻ പരിധിയിലെ മീരാൻപൂർ പ്രദേശത്ത് ശനിയാഴ്ച ഉച്ചയ്ക്കാണ് സംഭവം പുറത്തറിയുന്നത്. വർഷങ്ങളായി സൗദി അറേബ്യയില്‍ ജോലി ചെയ്യുന്ന നിയാസ് എന്നയാളുടെ മക്കളാണ് കൊല്ലപ്പെട്ടത്. സംഭവത്തിന് ശേഷം കുട്ടികളുടെ അമ്മയെ കാണാതായത് ദുരൂഹത വർദ്ധിപ്പിക്കുന്നു. ഷഫീഖ് (14), സൗദ് (10), ഉമർ (8), സാദിയ (7) എന്നിവരെയാണ് മരിച്ച നിലയില്‍ കണ്ടെത്തിയത്.

രാവിലെ മുതല്‍ വീട് പൂട്ടിക്കിടക്കുന്നത് ശ്രദ്ധയില്‍പ്പെട്ട അയല്‍വാസികള്‍ പോലീസില്‍ വിവരമറിയിക്കുകയായിരുന്നു. പോലീസ് എത്തി വീട് തുറന്ന് പരിശോധിച്ചപ്പോള്‍ കട്ടിലില്‍ രക്തത്തില്‍ കുളിച്ച നിലയിലാണ് നാല് കുട്ടികളുടെയും മൃതദേഹം കണ്ടെത്തിയത്.
ഇഷ്ടികയോ സമാനമായ മറ്റു ഭാരമേറിയ വസ്തുക്കളോ ഉപയോഗിച്ച്‌ കുട്ടികളുടെ തലയ്ക്കാണ് മാരകമായി പരിക്കേല്‍പ്പിച്ചിരിക്കുന്നത്.

കുട്ടികള്‍ക്കൊപ്പം താമസിച്ചിരുന്ന അമ്മ നാസിയ ഖാത്തൂനെ സംഭവസ്ഥലത്തുനിന്ന് കാണാതായിട്ടുണ്ട്. വീടിന്റെ പ്രധാന വാതില്‍ അകത്തുനിന്ന് പൂട്ടിയ നിലയിലായിരുന്നു.

ഫോറൻസിക് സംഘം സ്ഥലത്തെത്തി തെളിവുകള്‍ ശേഖരിച്ചു. നാസിയ ഖാത്തൂനെ ആരെങ്കിലും തട്ടിക്കൊണ്ടുപോയതാണോ അതോ കൊലപാതകത്തില്‍ ഇവർക്ക് പങ്കുണ്ടോ എന്ന കാര്യത്തില്‍ പോലീസ് അന്വേഷണം നടത്തിവരികയാണ്. സൗദിയിലുള്ള പിതാവ് നിയാസിനെ വിവരമറിയിച്ചിട്ടുണ്ട്. ഉന്നത പോലീസ് ഉദ്യോഗസ്ഥർ സ്ഥലത്തെത്തി സ്ഥിതിഗതികള്‍ വിലയിരുത്തി.

Story Summary: In a horrific incident in Uttar Pradesh’s Ambedkar Nagar, four siblings were found murdered inside their house. The victims-Shafeeq (14), Saud (10), Umar (8), and Sadia (7)-were found with severe head injuries. Their father works in Saudi Arabia, and their mother, Nazia Khatoon, has been missing since the incident. Police discovered the bodies after neighbors alerted them about the locked house. An investigation is underway to locate the mother and identify the culprits.