ബെംഗളൂരു നിവാസികള് ഏറെ പ്രതീക്ഷയോടെ കാത്തിരിക്കുന്ന നമ്മ മെട്രോ പിങ്ക് ലൈന് അതിന്റെ പൂര്ണതയിലേക്ക് ഒരു പടി കൂടി അടുത്തു.
റിസര്ച്ച് ഡിസൈന്സ് ആന്ഡ് സ്റ്റാന്ഡേര്ഡ്സ് ഓര്ഗനൈസേഷന്റെ (RDSO) നിര്ണായക പരിശോധനയ്ക്ക് ചൊവ്വാഴ്ച തുടക്കമായി(BMRCL Updates).
നിര്ബന്ധിത സുരക്ഷാ-പ്രകടന വിലയിരുത്തലിന്റെ ഭാഗമായുള്ള പരിശോധനകള് മെയ് 12 വരെ തുടരുമെന്ന് ബെംഗളൂരു മെട്രോ റെയില് കോര്പറേഷന് ലിമിറ്റഡ് (BMRCL) വ്യക്തമാക്കി. പിങ്ക് ലൈനില് ട്രയല് റണ് ഉള്പ്പടെയാണ് ആരംഭിച്ചത് (Bengaluru Namma Metro Pink Line).
പരീക്ഷണങ്ങള് പൂര്ത്തിയായാല്, ആര്ഡിഎസ്ഒ, BMRCLന് ഇടക്കാല വേഗതാ സര്ട്ടിഫിക്കേഷന് നല്കും. പാത സംബന്ധിച്ച ചില അംഗീകാരങ്ങള്ക്ക് മുമ്പുള്ള ഒരു പ്രധാന ഘട്ടമാണിത്. ഇതിനുശേഷം, മെട്രോ റെയില്വേ സേഫ്റ്റി കമ്മീഷണര് (CRS) സ്വതന്ത്ര പരിശോധന നടത്തും.
തുടര്ന്ന് ഇതുസംബന്ധിച്ച റിപ്പോര്ട്ട് ചീഫ് റെയില്വേ സേഫ്റ്റി കമ്മീഷണര്ക്കും പിന്നീട് പുതിയ റോളിംഗ് സ്റ്റോക്കിന്റെ സാങ്കേതിക അനുമതിക്കായി റെയില്വേ ബോര്ഡിനും അയയ്ക്കും. ഈ മള്ട്ടി-സ്റ്റേജ് അംഗീകാര പ്രക്രിയയ്ക്ക് ഏകദേശം രണ്ടോ മൂന്നോ മാസമെടുക്കുമെന്നാണ് BMRCL അറിയിക്കുന്നത്.
ആവശ്യമായ എല്ലാ അനുമതികളും ലഭിച്ച ശേഷം, പൊതു ഉപയോഗത്തിനായി ലൈന് തുറക്കുന്നതിനുള്ള അന്തിമ അനുമതി നേടുന്നതിനായി BMRCL മെട്രോ റെയില്വേ സുരക്ഷാ കമ്മീഷണറെ (സിഎംആര്എസ്) സമീപിക്കും.
ബെംഗളൂരു നമ്മ മെട്രോ പിങ്ക് ലൈന്
ബെന്നാര്ഘട്ട റോഡിലെ കലേന അഗ്രഹാര മുതല് ഔട്ടര് റിങ് റോഡിലെ നാഗവാര വരെ നീളുന്നതാണ് ബെംഗളൂരു നമ്മ മെട്രോയുടെ പിങ്ക് ലൈന്. 21.24 കിലോമീറ്ററാണ് ദൂരം. 18 സ്റ്റേഷനുകളാണ് പിങ്ക് ലൈനില് ക്രമീകരിക്കുന്നത്. സെന്ട്രല് ബിസിനസ് ഡിസ്ട്രിക്ടിലൂടെ പാത കടന്നുപോകും.
മേല്പ്പാല ഇടനാഴിയും തുരങ്ക പാതയും
കലേന ആഗ്രഹാര മുതല് താവരക്കരെ നീളുന്ന 7.5 കിലോമീറ്റര് എലിവേറ്റഡ് പാതയാണ്. ഈ റൂട്ടില് സര്വീസ് ആരംഭിക്കുന്നതിനുള്ള നടപടികളാണ് അന്തിമ ഘട്ടത്തില് എത്തിനില്ക്കുന്നത്. ജൂണ് അല്ലെങ്കില് ജൂലൈ മാസത്തോടെ ഈ പാതയുടെ ഉദ്ഘാടനം നടക്കുമെന്നാണ് BMRCLല് നിന്ന് ഒടുവില് ലഭിക്കുന്ന വിവരം.
അതായത് മേല്പ്പാല ഇടനാഴി ആദ്യം തുറന്നുകൊടുക്കും. ഡയറി സര്ക്കിള് മുതല് നാഗവാര വരെ 13.8 കിലോമീറ്റര് തുരങ്ക പാതയാണ്. ഈ സ്ട്രെച്ചില് 2026 ഡിസംബറില് ട്രെയിന് ഓടുമെന്നുമാണ് ബെംഗളൂരു മെട്രോ റെയില് കോര്പറേഷന് ലിമിറ്റഡ് പറയുന്നത്. തുരങ്ക പാതയുടെ പ്രവൃത്തിക്ക് കൂടുതല് സമയമെടുക്കുമെന്നതിനാലാണിത്.
പിങ്ക് ലൈന് റൂട്ട്
സെന്ട്രല് ബിസിനസ് ഡിസ്ട്രിക്ടിലെ എംജി റോഡ്, ബ്രിഗേഡ് റോഡ്, കബണ് റോഡ്, കാമരാജ് റോഡ്, ശിവാജിനഗര് എന്നിവിടങ്ങളിലൂടെയാണ് പിങ്ക് ലൈന് കടന്നുപോകുന്നത്.
Also Read: NCMC Updates: 'ബാക്കി' എന്തുണ്ടെന്നതിലാണ് കാര്യം, അറിയാന് വഴി തെളിഞ്ഞു, വലിയ ആശ്വാസമെന്ന് Chennai Metro യാത്രക്കാര്
എംജി റോഡില് വച്ചാണ് പര്പ്പിള് ലൈനുമായി ചേരുക. ബിസിനസ് ഡിസ്ട്രിക്ടിലെ തിരക്കേറിയ വ്യാപാര കേന്ദ്രങ്ങളിലൂടെ ഈ പാത കടന്നുപോകുന്നുവെന്നതാണ് മുഖ്യ ആകര്ഷണം.
- സ്റ്റേഷനുകള് ഇങ്ങനെ
കലേന അഗ്രഹാര, ഹുളിമാവ്, ഐഐഎംബി, ജെപി നഗര് ഫോര്ത്ത് ഫേസ്, ജയദേവ ആശുപത്രി, താവരക്കരെ, ഡയറി സര്ക്കിള്, ലക്കസാന്ദ്ര, ലാങ്ഫോര്ഡ് ടൗണ്, നാഷണല് മിലിട്ടറി സ്കൂള്, എംജി റോഡ്, ശിവാജി നഗര്, കന്റോണ്മെന്റ്, പോട്ടറി ടൗണ്, താനറി ടൗണ്, വെങ്കിടേഷ്പുര, കാടുഗൊണ്ടനഹള്ളി, നാഗവാര.
- പിങ്ക് ലൈന് - പ്രയോജനങ്ങള്
വ്യാപാര കേന്ദ്രങ്ങളിലൂടെയുള്ള പാത ബെംഗളൂരുവിന്റെ വളര്ച്ചയ്ക്ക് സഹായകരമാകുമെന്ന് BMRCL പറയുന്നു. ബിസിനസ് ഡിസ്ട്രിക്ടിലെ പ്രധാന വ്യാപാര കേന്ദ്രങ്ങളിലേക്ക് പോകുന്നവര്ക്കും അവിടെ നിന്ന് നഗരത്തിന്റെ മറ്റിടങ്ങളിലേക്ക് യാത്ര ചെയ്യുന്നവര്ക്കും പാത ഏറെ പ്രയോജനപ്പെടും.
Also Read: ഇനി ഉഡായിപ്പ് നടക്കില്ല, ഇടപാടുകള് പുതിയ ETM വഴി, ടിക്കറ്റ് വരിക പെയ്മെന്റ് ഉറപ്പിച്ച ശേഷം മാത്രം, BMRCL കാര്ഡും ഇനി BMTCയില് എടുക്കും
ഈ മേഖലയിലെ ഗതാഗതക്കുരുക്കില് നിന്ന് ആശ്വാസം ലഭിക്കും. കൂടാതെ നാഗവാര മാന്യത ടെക്പാര്ക്ക്, ബെന്നാര്ഘട്ട ബയോളജിക്കല് പാര്ക്ക് എന്നിവിടങ്ങളിലേക്ക് പോകുന്നവര്ക്കും പാത ഗുണകരമാകും.