കൊച്ചി: ( www.truevisionnews.com) 'കോക്രോച്ച്‌ ജനതാ പാർട്ടി'(സി.ജെ.പി.) ആദ്യ ദക്ഷിണേന്ത്യൻ സംഗമം ഞായറാഴ്ച കൊച്ചിയില്‍ നടക്കുമെന്നത് പ്രചാരണത്തിലൊതുങ്ങി.

'സി.ജെ.പി. കൊച്ചി മീറ്റ് അപ്പ്' എന്ന പേരില്‍ ടെലിഗ്രാമിലൂടെ ഞായറാഴ്ച ഉച്ചകഴിഞ്ഞ് മൂന്നിന് മറൈൻഡ്രൈവില്‍ സി.ജെ.പി അനുഭാവികള്‍ ഒത്തുചേരുമെന്നായിരുന്നു സന്ദേശം.

ഒപ്പം സി.ജെ.പി.യുടെ പോസ്റ്ററുകളുമുണ്ടായിരുന്നു. പോസ്റ്ററിലെ ക്യൂആർ കോഡ് സ്‌കാൻ ചെയ്താല്‍ ഒരു ടെലിഗ്രാം ഗ്രൂപ്പിലേക്കാണ് എത്തിയിരുന്നത്.

അംഗങ്ങളെ പരിചയപ്പെടുക, പാർട്ടി നിയമപരമായി രജിസ്റ്റർ ചെയ്യാനുള്ള നടപടികള്‍ ചർച്ചചെയ്യുക, നാടിന്റെ നന്മയ്ക്കായി പ്രവർത്തിക്കുക തുടങ്ങിയ അഞ്ച് അജൻഡകളും ഗ്രൂപ്പില്‍ പങ്കുവെച്ചിരുന്നു.

സമാധാനപരമായ കൂടിക്കാഴ്ചയാണ് ഉദ്ദേശിക്കുന്നതെന്നും സംഗമത്തില്‍ പങ്കെടുക്കാൻ താത്പര്യമുള്ളവർ പേരും മേല്‍വിലാസവും ഫോണ്‍ നമ്പറും പ്രായവും രേഖപ്പെടുത്തണമെന്നും സന്ദേശത്തില്‍ വ്യക്തമാക്കിയിരുന്നു.

കോക്രോച്ച്‌ പാർട്ടിയുടെ പ്രവർത്തനം മുഴുവൻ സൈബർ ഇടത്തിലാണെന്നിരിക്കെ, ആദ്യ ഒത്തുചേരല്‍ കൊച്ചിയിലായിരിക്കുമെന്ന പ്രചാരണം രാജ്യശ്രദ്ധ നേടിയിരുന്നു. ഇതേത്തുടർന്ന് ക്രമസമാധാന പ്രശ്‌നങ്ങളോ അനിഷ്ടസംഭവങ്ങളോ ഉണ്ടാകാതിരിക്കാൻ പോലീസും മുൻകരുതല്‍ നടപടികള്‍ സ്വീകരിച്ചിരുന്നു. കേന്ദ്ര-സംസ്ഥാന രഹസ്യാന്വേഷണ സംഘങ്ങള്‍ അന്വേഷണം തുടങ്ങിയിരുന്നു.

ഉച്ചകഴിഞ്ഞ് മൂന്നുമണിയോടെ മാധ്യമങ്ങളും മറൈൻ ഡ്രൈവിലെത്തിയെങ്കിലും കൂട്ടായ്മയ്ക്കായി ആരും എത്തിയില്ല. പൊതുസ്ഥലത്ത് ഒത്തുചേരലിന് പോലീസില്‍നിന്ന് അനുമതി വാങ്ങിയിരുന്നുമില്ല.