ആക്രമണം നടന്ന താവളം ഏതാണെന്ന് ഇറാൻ വ്യക്തമാക്കിയിട്ടില്ലെങ്കിലും, തങ്ങളുടെ വ്യോമാതിർത്തിക്കുള്ളില്‍ എത്തിയ മിസൈലുകളും ഡ്രോണുകളും തകർത്തതായി യുഎസ് താവളമുള്ള കുവൈറ്റ് സ്ഥിരീകരിച്ചു.

ഹോർമുസ് കടലിടുക്കിന് മുകളിലൂടെ പറന്ന ഇറാന്റെ ഡ്രോണുകള്‍ വെടിവെച്ചിട്ടതായും തന്ത്രപ്രധാന തുറമുഖ നഗരമായ ബന്ദർ അബ്ബാസിലെ ഇറാൻ സൈനിക കേന്ദ്രത്തിന് നേരെ ആക്രമണം നടത്തിയതായും അമേരിക്കൻ സൈന്യം വ്യക്തമാക്കിയതിന് പിന്നാലെയാണ് ഇറാന്റെ തിരിച്ചടി. മൂന്ന് ദിവസത്തിനിടെ ഇത് രണ്ടാം തവണയാണ് ഇറാനിലെ ലക്ഷ്യസ്ഥാനങ്ങള്‍ക്ക് നേരെ യുഎസ് ആക്രമണം നടത്തുന്നത്. ബന്ദർ അബ്ബാസില്‍ നിന്നും അഞ്ചാമത്തെ ഡ്രോണ്‍ വിക്ഷേപിക്കാൻ ഇറാൻ ഒരുങ്ങുന്നതിനിടെയാണ് ആക്രമണം നടത്തിയതെന്നും ഇത് പൂർണമായും പ്രതിരോധത്തിന്റെ ഭാഗമാണെന്നും യുഎസ് സെൻട്രല്‍ കമാൻഡ് അറിയിച്ചു. എന്നാല്‍ ബന്ദർ അബ്ബാസിനെ ആക്രമിക്കാൻ യുഎസ് ഉപയോഗിച്ച അതേ വ്യോമതാവളത്തെയാണ് തങ്ങള്‍ ലക്ഷ്യമിട്ടതെന്നാണ് ഇറാന്റെ ഔദ്യോഗിക മാധ്യമമായ ഐആർഐബി റിപ്പോർട്ട് ചെയ്തത്.

യുഎസ് ആക്രമണം ഇരുരാജ്യങ്ങളും തമ്മിലുള്ള താല്‍ക്കാലിക വെടിനിർത്തല്‍ കരാറിന്റെ ലംഘനമാണെന്ന് ഇറാന്റെ വിദേശകാര്യ മന്ത്രാലയം വക്താവ് ഇസ്മായില്‍ ബഖാഇ അപലപിച്ചു. രാജ്യത്തിന്റെ പരമാധികാരം സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കുമെന്നും അദ്ദേഹം കൂട്ടിച്ചേർത്തു. നേരത്തെ തിങ്കളാഴ്ചയും തെക്കൻ ഇറാനിലെ മിസൈല്‍ കേന്ദ്രങ്ങള്‍ക്ക് നേരെ അമേരിക്ക ആക്രമണം നടത്തിയിരുന്നു. കൂടാതെ ഹോർമുസ് കടലിടുക്കിലൂടെ പോകുന്ന കപ്പലുകളില്‍ നിന്ന് പണം പിരിക്കുന്ന ഇറാന്റെ 'പേർഷ്യൻ ഗള്‍ഫ് സ്ട്രെയ്റ്റ് അതോറിറ്റി'ക്ക് യുഎസ് ഉപരോധം ഏർപ്പെടുത്തുകയും ചെയ്തു. ലോകത്തെ അഞ്ചിലൊന്ന് എണ്ണയും പ്രകൃതിവാതകവും കടന്നുപോകുന്ന ഈ ജലപാത അടഞ്ഞുകിടക്കുന്നത് ആഗോള ഇന്ധന വിപണിയെയും സാമ്പത്തിക രംഗത്തെയും കടുത്ത പ്രതിസന്ധിയിലാക്കി.

മേഖലയില്‍ മൂന്ന് മാസമായി തുടരുന്ന യുദ്ധം അവസാനിപ്പിക്കാനുള്ള സമാധാന ചർച്ചകള്‍ പുരോഗമിക്കുന്നതിനിടെയാണ് വീണ്ടും ആക്രമണങ്ങള്‍ ഉണ്ടായത്. നവംബറില്‍ നടക്കാനിരിക്കുന്ന യുഎസ് ഇടക്കാല തെരഞ്ഞെടുപ്പ് തന്റെ യുദ്ധ തന്ത്രങ്ങളെ ബാധിക്കില്ലെന്നും ഇറാനുമായുള്ള സമാധാന ചർച്ചകളില്‍ അമേരിക്ക പൂർണ തൃപ്തികരമല്ലെന്നും യുഎസ് പ്രസിഡന്റ് ഡൊണാള്‍ഡ് ട്രംപ് കാബിനറ്റ് യോഗത്തില്‍ വ്യക്തമാക്കി. ഇറാൻ മുന്നോട്ടുവെച്ച വ്യവസ്ഥകള്‍ യുഎസ് തള്ളിയതോടെ മേഖലയിലെ സമാധാന ചർച്ചകള്‍ വീണ്ടും പ്രതിസന്ധിയിലായി. ഫെബ്രുവരി 28 നാണ് ഇറാനെതിരെ അമേരിക്കയും ഇസ്രായേലും സംയുക്തമായി സൈനിക നീക്കം ആരംഭിച്ചത്. ഇതിനൊപ്പം ലെബനനിലെ ഇറാൻ അനുകൂല ഹിസ്ബുള്ളയുമായും ഇസ്രായേല്‍ യുദ്ധത്തിലാണ്.

Content Highlight: Content Highlights:- Iran retaliates against US airstrikes; missile-drone attack on US military base

#Latest News#Iran Missile Attack#Donald Trump#Global Oil Crisis