രാത്രി വീഡിയോ സന്ദേശം ഇറക്കുന്നതിന് പകരം പകല്‍ പാർലമെന്റില്‍ വന്ന് കാര്യം വിശദീകരിക്കണമെന്ന് ഖാർഗെ ആവശ്യപ്പെട്ടു.ചോദ്യപേപ്പർ ചോർച്ചയില്‍ കർശന നടപടിയുണ്ടാകുമെന്ന് ഉറപ്പ് നല്‍കി പ്രധാനമന്ത്രി വ്യാഴ്ച അർദ്ധരാത്രിയോടെ സാമൂഹിക മാധ്യമങ്ങളില്‍ ഒരു വീഡിയോ സന്ദേശം പുറത്തിറക്കിയിരുന്നു.

ഇതിനെ ചൂണ്ടിക്കാട്ടിയായിരുന്നു ഖാർഗെയുടെ പ്രതികരണം."ഇത്രയും ഗൗരവമുള്ള വിഷയത്തില്‍ പ്രധാനമന്ത്രി പാർലമെന്റില്‍ നേരിട്ട് പ്രസ്താവന നടത്തുകയാണ് വേണ്ടത്. രാത്രി വന്ന് വീഡിയോ ഇറക്കുന്നതിന് പകരം പകല്‍ പാർലമെന്റില്‍ വന്ന് സംസാരിക്കണം" എന്ന് ഖാർഗെ മാധ്യമപ്രവർത്തകരോട് പറഞ്ഞു.

പ്രധാനമന്ത്രിയുടെ പ്രഖ്യാപനം ഉത്തരവാദിത്വപരമായതും സർക്കാരിന്റെ ഔദ്യോഗിക നിലപാടുമാണെങ്കില്‍ അത് പാർലമെന്റില്‍ അവതരിപ്പിക്കണമെന്നും അദ്ദേഹം പറഞ്ഞു. അങ്ങനെ ചെയ്താല്‍ മാത്രമേ പ്രതിപക്ഷത്തിന് അത് ചർച്ച ചെയ്യാനും പരിശോധിക്കാനും അവസരം ലഭിക്കൂ എന്നും ഖാർഗെ കൂട്ടിച്ചേർത്തു.

അതേസമയം വീഡിയോ സന്ദേശത്തില്‍ പ്രധാനമന്ത്രി ചോദ്യപേപ്പർ ചോർച്ചയ്ക്കെതിരെ കൂടുതല്‍ കർശന നടപടികള്‍ സ്വീകരിക്കുമെന്ന് പ്രഖ്യാപിച്ചു. കുറ്റക്കാർക്ക് കർശന ശിക്ഷ ഉറപ്പാക്കാൻ ഫാസ്റ്റ്-ട്രാക്ക് കോടതികള്‍ സ്ഥാപിക്കുമെന്നും ഇതിനുള്ള നിയമത്തിന്റെ കരട് കേന്ദ്ര മന്ത്രിസഭ പരിഗണിക്കുമെന്നും അദ്ദേഹം അറിയിച്ചു.

"ചോദ്യപേപ്പർ ചോർച്ച സാധാരണ വിഷയമല്ലെന്ന് എനിക്കറിയാം. അതുകൊണ്ടാണ് കഴിഞ്ഞ രണ്ട് മാസത്തിനിടെ സർക്കാർ നിരവധി നടപടികള്‍ സ്വീകരിച്ചത്. കുറ്റക്കാരെല്ലാം ഇപ്പോള്‍ ജയിലിലാണ്. വിദ്യാർഥികളുടെ ഒരു വർഷം നഷ്ടപ്പെടാതിരിക്കാൻ സർക്കാർ മുഴുവൻ സംവിധാനവും ഉപയോഗിച്ച്‌ പുനഃപരീക്ഷ നടത്തി" എന്നും മോദി വീഡിയോയില്‍ പറഞ്ഞു.

എന്നാല്‍ പാർലമെന്റില്‍ ചർച്ച നടത്താതെ വീഡിയോ സന്ദേശം പുറത്തിറക്കിയ പ്രധാനമന്ത്രിയുടെ തീരുമാനത്തെ ഖാർഗെ ചോദ്യം ചെയ്തു. വിദ്യാർഥികളുടെ ഭാവിയുമായി ബന്ധപ്പെട്ട വിഷയത്തില്‍ സർക്കാരിന്റെ നിലപാട് പാർലമെന്റില്‍ വ്യക്തമാക്കണമെന്നാണ് പ്രതിപക്ഷത്തിന്റെ ആവശ്യം.

Content Highlight: Kharge Slams PM Modi Over Exam Paper Leak, Demands Statement in Parliament

#Latest News#Mallikarjun Kharge#PM Narendra Modi#Exam Paper Leak#Parliament#Student Protest#NEET