വേനല്‍ക്കാലം എത്തുന്നതോടെ മലയാളി വീടുകളില്‍ ചക്കകൊണ്ടുള്ള വൈവിധ്യമാർന്ന വിഭവങ്ങള്‍ തയ്യാറാക്കി തുടങ്ങുന്നു. ചക്കപ്പുഴുക്കും ചക്ക വറുത്തതുമെല്ലാം നമുക്ക് പരിചിതമാണെങ്കിലും ചക്ക ഉപയോഗിച്ച്‌ തയ്യാറാക്കുന്ന ബിരിയാണി ഇന്ന് ഏറെ ജനപ്രീതി നേടിക്കൊണ്ടിരിക്കുകയാണ്.

ഇറച്ചി വിഭവങ്ങളോട് കിടപിടിക്കുന്ന രുചിയും ഘടനയും ഉള്ളതിനാല്‍ സസ്യഭുക്കുകള്‍ക്ക് പരീക്ഷിക്കാവുന്ന ഏറ്റവും മികച്ച വിഭവമാണിത്. ഉത്തരേന്ത്യയില്‍ 'കടാഹല്‍ ബിരിയാണി' എന്ന് അറിയപ്പെടുന്ന ഈ വിഭവം ശരിയായ രീതിയില്‍ തയ്യാറാക്കിയാല്‍ ചക്കയുടെ സ്വാഭാവിക രുചിയും മസാലകളുടെ ഗന്ധവും ഒത്തുചേർന്ന് നാവിലൂറുന്ന അനുഭവം സമ്മാനിക്കും. പച്ചച്ചക്കയുടെ ഇടിച്ചക്ക പരുവമാണ് ബിരിയാണിക്ക് ഏറ്റവും അനുയോജ്യം.

നാരുകള്‍ ധാരാളമായി അടങ്ങിയിട്ടുള്ളതിനാല്‍ ആരോഗ്യകരമായ ഒരു ഉച്ചഭക്ഷണമായി ഇതിനെ കണക്കാക്കാം. ബിരിയാണി പ്രേമികള്‍ക്ക് തികച്ചും വ്യത്യസ്തമായ ഒരു രുചി അനുഭവം നല്‍കാൻ ചക്ക ബിരിയാണിക്ക് സാധിക്കും.

ചേരുവകള്‍

പച്ചച്ചക്ക (കഷ്ണങ്ങളാക്കിയത്) - 500 ഗ്രാം

ബിരിയാണി അരി (ബസുമതി അല്ലെങ്കില്‍ കൈമ) - 2 കപ്പ്

സവാള - 3 എണ്ണം

തക്കാളി - 2 എണ്ണം

ഇഞ്ചി-വെളുത്തുള്ളി പേസ്റ്റ് - 1 ടേബിള്‍ സ്പൂണ്‍

പച്ചമുളക് - 3-4 എണ്ണം

തൈര് - അര കപ്പ്

മല്ലിയില, പുതിനയില - ആവശ്യത്തിന്

മസാലപ്പൊടികള്‍ (മഞ്ഞള്‍പ്പൊടി, മുളകുപ്പൊടി, മല്ലിപ്പൊടി, ഗരം മസാല) - ആവശ്യത്തിന്

നെയ്യ് അല്ലെങ്കില്‍ എണ്ണ - ആവശ്യത്തിന്

കറുവപ്പട്ട, ഏലക്ക, ഗ്രാമ്പൂ - 3-4 എണ്ണം വീതം

തയ്യാറാക്കുന്ന വിധം

ആദ്യം ചക്ക കഷ്ണങ്ങള്‍ അല്പം മഞ്ഞള്‍പ്പൊടിയും ഉപ്പും ചേർത്ത് മുക്കാല്‍ ഭാഗം വേവിച്ചെടുക്കാം. മറ്റൊരു പാത്രത്തില്‍ അരി കഴുകി വെള്ളത്തിലിട്ടു വെക്കുക.

ഒരു വലിയ പാത്രത്തില്‍ നെയ്യ് ചൂടാക്കി ഗ്രാമ്പൂ, ഏലക്ക, കറുവപ്പട്ട എന്നിവയിട്ട് വഴറ്റുക. അതിലേക്ക് സവാള ചേർത്ത് നന്നായി മൊരിഞ്ഞു വരുമ്പോള്‍ ഇഞ്ചി-വെളുത്തുള്ളി പേസ്റ്റും പച്ചമുളകും ചേർക്കാം. ശേഷം തക്കാളിയും മസാലപ്പൊടികളും ചേർത്ത് പച്ചമണം മാറുന്നത് വരെ വഴറ്റണം.

ഇതിലേക്ക് തൈരും വേവിച്ചു വെച്ചിരിക്കുന്ന ചക്ക കഷ്ണങ്ങളും ചേർത്ത് നന്നായി യോജിപ്പിക്കുക. മസാല ചക്കയില്‍ പിടിച്ചു കഴിഞ്ഞാല്‍ ആവശ്യത്തിന് വെള്ളമൊഴിച്ച്‌ തിളപ്പിക്കുക.

വെള്ളം തിളച്ചു വരുമ്പോള്‍ കുതിർത്തു വെച്ചിരിക്കുന്ന അരി ചേർക്കാം. പാത്രത്തിന്റെ വായ മൂടിക്കെട്ടി 'ദം' ചെയ്ത് കുറഞ്ഞ തീയില്‍ വേവിച്ചെടുക്കുക. അരി വെന്ത് വെള്ളം വറ്റിക്കഴിഞ്ഞാല്‍ മല്ലിയിലയും വറുത്ത അണ്ടിപ്പരിപ്പും മുന്തിരിയും ചേർത്ത് അലങ്കരിക്കാം. സ്വാദിഷ്ടമായ ചക്ക ബിരിയാണി തയ്യാർ! ഇതിനോടൊപ്പം തൈര് പച്ചടിയും പപ്പടവും ഉണ്ടെങ്കില്‍ വിഭവം പൂർണ്ണമായി.

jackfruit biryani,Jackfruit recipe