( www.truevisionnews.com ) ഫിലോവിരിഡേ വൈറസ് കുടുംബത്തില്‍ പെട്ട ഒരു ആർ.എൻ.എ വൈറസാണ് എബോള. മനുഷ്യരിലും മറ്റ് പ്രൈമേറ്റുകളിലും (കുരങ്ങുകള്‍, ചിമ്പാൻസികള്‍) , കഠിനമായ രക്തസ്രാവത്തോടു കൂടിയ പനിയായ എബോള ഹെമറാജിക് ഫീവർ ഉണ്ടാക്കാൻ ഈ വൈറസിന് ശേഷിയുണ്ട്.

ബാധിക്കപ്പെടുന്നവരില്‍ മരണനിരക്ക് വളരെ ഉയർന്നതാണ് ഏകദേശം 50% മുതല്‍ 90% വരെ.

1976-ല്‍ ആഫ്രിക്കൻ രാജ്യങ്ങളായ കോംഗോയിലും സുഡാനിലുമാണ് എബോള വൈറസ് രോഗം ആദ്യമായി തിരിച്ചറിഞ്ഞത്. കോംഗോയിലെ യംബുകു എന്ന ഗ്രാമത്തിന് സമീപത്തുകൂടി ഒഴുകുന്ന 'എബോള' എന്ന നദിയുടെ പേരില്‍ നിന്നാണ് ഈ മാരക വൈറസിന് എബോള എന്ന പേര് ലഭിച്ചത്. ആദ്യമായി കണ്ടെത്തിയതിനു ശേഷം പലപ്പോഴായി ആഫ്രിക്കൻ രാജ്യങ്ങളില്‍ ഈ രോഗം റിപ്പോർട്ട് ചെയ്യപ്പെട്ടിട്ടുണ്ടെങ്കിലും, ചരിത്രത്തിലെ ഏറ്റവും ഭീകരവും വ്യാപകവുമായ എബോള പൊട്ടിപ്പുറപ്പെടല്‍ ഉണ്ടായത് 2014-2016 കാലഘട്ടത്തിലാണ്. ഗിനിയ, ലൈബീരിയ, സിയറ ലിയോണ്‍ തുടങ്ങിയ പശ്ചിമാഫ്രിക്കൻ രാജ്യങ്ങളെയാണ് ഈ മഹാമാരി അക്കാലത്ത് ഏറ്റവും കൂടുതല്‍ തകർത്തത്.

എബോള ഒരു വായുവിലൂടെ പകരുന്ന രോഗമല്ല മറിച്ച്‌, കാട്ടിലെ ഒരുതരം പഴംതീനി വവ്വാലുകളില്‍ നിന്നാണ് ഈ വൈറസ് പ്രകൃതിദത്തമായി പടരുന്നതെന്ന് കരുതപ്പെടുന്നു. രോഗബാധയുള്ള വവ്വാലുകള്‍, കുരങ്ങുകള്‍ എന്നിവയുടെ രക്തം, മാംസം, ശരീരസ്രവങ്ങള്‍ എന്നിവയുമായുള്ള സമ്പർക്കത്തിലൂടെയാണ് ഇത് മൃഗങ്ങളില്‍ നിന്ന് മനുഷ്യരിലേക്ക് എത്തുന്നത്.

തുടർന്ന്, രോഗബാധിതനായ ഒരു വ്യക്തിയുടെ രക്തം, തുപ്പല്‍, വിയർപ്പ്, മൂത്രം തുടങ്ങിയ ശരീരസ്രവങ്ങളുമായി നേരിട്ടോ, അവർ ഉപയോഗിച്ച വസ്ത്രങ്ങള്‍, സൂചികള്‍, കിടക്കകള്‍ എന്നിവ വഴിയോ രോഗം മനുഷ്യരില്‍ നിന്ന് മനുഷ്യരിലേക്ക് വേഗത്തില്‍ പകരുന്നു. വൈറസ് ശരീരത്തില്‍ പ്രവേശിച്ച്‌ 2 മുതല്‍ 21 ദിവസങ്ങള്‍ക്കുള്ളില്‍ കടുത്ത പനി, കഠിനമായ തലവേദന, തൊണ്ടവേദന, പേശിവേദന, ഛർദ്ദി, വയറിളക്കം, ചുവന്ന പാടുകള്‍ എന്നിവയ്ക്ക് പുറമെ ആന്തരികവും ബാഹ്യവുമായ രക്തസ്രാവം പോലുള്ള മാരകമായ രോഗലക്ഷണങ്ങള്‍ കണ്ടുതുടങ്ങാം.

എലിസ , പി.സി.ആർ തുടങ്ങിയ രക്തപരിശോധനകളിലൂടെയാണ് രോഗനിർണ്ണയം നടത്തുന്നത്. എബോളയ്ക്ക് കൃത്യമായ ഒറ്റമൂലി ചികിത്സയില്ലെങ്കിലും, ഒആർഎസ് നല്‍കി ശരീരത്തിലെ ജലാംശം നിലനിർത്തുന്നതുള്‍പ്പെടെയുള്ള സപ്പോർട്ടീവ് കെയറിലൂടെയും ലക്ഷണങ്ങള്‍ക്കനുസരിച്ചുള്ള മരുന്നുകളിലൂടെയുമാണ് രോഗിയെ പരിചരിക്കുന്നത്.