(truevisionnews.com) കനത്ത ചൂടിന് ആശ്വാസമായി ഒടുവില്‍ മഴയെത്തിക്കഴിഞ്ഞു. ഈ കുളിരുള്ള കാലാവസ്ഥയില്‍ ഒരു ചൂടുചായയുടെ കൂടെ നല്ലൊരു പലഹാരം കഴിച്ചിരിക്കാൻ ആർക്കാണ് ആഗ്രഹം തോന്നാത്തത്?

എന്നാല്‍ നമ്മള്‍ കഴിക്കുന്ന സ്നാക്സുകള്‍ ആരോഗ്യത്തിന് ദോഷം ചെയ്യാത്തതായിരിക്കാൻ പ്രത്യേകം ശ്രദ്ധിക്കണം. കാരണം, മഴക്കാലം അസുഖങ്ങളുടെ കൂടി കാലമാണ്. ഈ സമയത്ത് ജാഗ്രത പാലിക്കേണ്ടതും പുറത്തുനിന്ന് ഒഴിവാക്കേണ്ടതുമായ പ്രധാന ഭക്ഷണങ്ങള്‍ ഇവയാണ്:

1. സ്ട്രീറ്റ് ഫുഡുകള്‍ (പാനിപൂരി, ഭേല്‍പൂരി)

റോഡരികില്‍ നിന്നും മറ്റും കിട്ടുന്ന പാനിപൂരി, ഭേല്‍പൂരി പോലുള്ള സ്ട്രീറ്റ് ഫുഡുകള്‍ മഴക്കാലത്ത് പൂർണ്ണമായും ഒഴിവാക്കുന്നതാണ് നല്ലത്. ഈ സമയത്ത് ഈച്ചയും മലിനജലവും വഴിയുള്ള രോഗവ്യാപനത്തിന് സാധ്യത കൂടുതലായതിനാല്‍ വൃത്തിക്കാണ് പ്രാധാന്യം നല്‍കേണ്ടത്.

2. മുറിച്ചുവെച്ച പഴങ്ങള്‍

വഴിയോരങ്ങളില്‍ ദീർഘനേരം മുറിച്ചുവെച്ചിരിക്കുന്ന പഴങ്ങള്‍ വാങ്ങി കഴിക്കരുത്. അന്തരീക്ഷത്തിലെ പൊടിയും ഈച്ചയും കൊതുകുമൊക്കെ ഇതില്‍ വന്നിരിക്കാൻ സാധ്യതയുള്ളതിനാല്‍ ഇവ രോഗങ്ങളെ എളുപ്പത്തില്‍ ക്ഷണിച്ചുവരുത്തും.

3. തണുത്തുപോയ എണ്ണക്കടികള്‍

ചായക്കടകളില്‍ നേരത്തെ ഉണ്ടാക്കിവെച്ച്‌ തണുത്തുപോയ സമൂസ, വട, ബജി പോലുള്ള എണ്ണപ്പലഹാരങ്ങള്‍ കഴിക്കുന്നത് ദഹനക്കേടിനും മറ്റ് വയറിളക്ക രോഗങ്ങള്‍ക്കും കാരണമാകും.

4. നോണ്‍-വെജ് വിഭവങ്ങള്‍ (ചിക്കൻ, മട്ടൻ)

മഴക്കാലത്ത് പുറത്തുനിന്ന് ചിക്കൻ, മട്ടൻ വിഭവങ്ങള്‍ കഴിക്കുന്നത് പരമാവധി കുറയ്ക്കുക. ശരിയായ രീതിയില്‍ തണുപ്പിച്ച്‌ സൂക്ഷിക്കാത്ത ഇറച്ചി പെട്ടെന്ന് കേടാകാനും ഭക്ഷ്യവിഷബാധയ്ക്ക് കാരണമാകാനും സാധ്യതയുണ്ട്.

5. മത്സ്യ വിഭവങ്ങള്‍

മത്സ്യം കഴിക്കുകയാണെങ്കില്‍ ഫ്രഷ് ആയിട്ടുള്ളത് മാത്രം വാങ്ങി ഉപയോഗിക്കുക. ട്രോളിങ് നിരോധനവും മറ്റും വരുന്ന സമയമായതിനാല്‍ പഴകിയ മീനുകള്‍ വിപണിയില്‍ എത്താൻ സാധ്യതയുണ്ട്. സംശയമുണ്ടെങ്കില്‍ മീൻ വിഭവങ്ങള്‍ ഒഴിവാക്കുന്നതാണ് സുരക്ഷിതം.